كل جديد ومتميز وحصرى تجدونه هنا فى ومضات السها


واحـــــة الإبــداع والفــن والتــألق
 
الرئيسيةالتسجيلدخول

شاطر | 
 

 الوطن فى دموع ياسين \ حمدى حسين

اذهب الى الأسفل 
كاتب الموضوعرسالة
زهرة بنت ساحة الطيب
...........
...........
avatar

عدد المساهمات : 26069
العمر : 38

مُساهمةموضوع: الوطن فى دموع ياسين حمدى حسين    الإثنين فبراير 23, 2015 6:30 pm




الوطن ف دموع ياسين
.....................................
الشمس طلعت ع الرصيف
والناس كتير
اجناس كتير
زى الورق..
والكل قاعد ع الرصيف
الكل بيبيع العرق
مين يشترى ؟
مين يشترى ؟
مين يشترى منى المرار
بزوز دينار
ولا بدولار
ولا بجنيه اعور لعين
مين يشترى
ليل الرجال البردانين
المحرومين نظرة عنيها الطيبين ؟
مين يشترى
عودى النحيف
طرح الخريف
ابنى اللى طيفه جنب منى ع الرصيف
يمكن يلاقى حداه رغيف او توب نضيف ؟
مين يشترى
منى الندم ..خطوه بتلعنها القدم
وانا المسافر ف السكك
كفين دعا ..متشعبطين فوق الجبين ؟
مين يشترى
منى الوطن ..جنة عدن والموعودين ؟
مين يشترينى يفتدينى
قبل امى ما تلاقينى
جثه هامده
والملايكه فوق كتافى مضللين ؟
يا ياسين ..
فين ياسين ؟
مين ياسين ؟
فين عرقنا ؟
فين شقانا ؟
مين سرقنا ؟
ومين ف أرض الخوف رمانا
فوق حصير المطحونين ؟
خبرينى يا بهيه .. يالعيون المريميه
يا دموعنا المحبوسين
اسأليلى الواد ياسين
مين بدم المغربيه حنا بالهم اليدين ؟
مصر هى الجانيه
واحنا اللى جنينا
من سنين الغلب رعب الهربانين
والقنال والسد والارض العفيه
والايادى العنتريه
والجباية المفتريه
والكنوز الفرعونيه
واليالى النرجسيه
كل خيرها راح لمين ؟ لمين ؟
واحنا فين ؟
فين مكانكم ؟
فين مكانى ؟
اتعصر قلب السنين
واتفتح جرحى الزمانى
والجيوب الدفيانين
دفيانين
بالدولار الامريكانى
خلق تانيه
وعيشه تانى
ف القصور البرتكانى بالخدم متنعمين
واحنا فين؟
روحنا جينا
وف عنينا
دمعتين متجمركين
لينا ايه ف بلادنا باقى ؟
افترقنا ..واتحرقنا ..واتخنقنا ف الشراقى
وأما جه وقت التلاقى
قم نلاقى ..دمنا مالى السواقى
والسواقى مردومين
روحنا جينا
وف عنينا
دمعتين متجمركين
هم طابق فوق صدورنا
وفوق ضهورنا حمل طين
جبنا ايه لولادنا واحنا مروحيين ؟!
هدمتين !!
العيال ف بلاد جهنم
للهدوم مش محتاجين
مديونين للغربه روحنا ..مديونين
نشترى بلسم جروحنا
المفتوحين
روحنا جينا زى ما احنا
مش هقولك مديونين
احنا جينا مدبوحين
مصر هى الجانيه واحنا
اللى جنينا
من سنين الغلب رعب الهربانين
يا ياسين
يا ياسين
كلنا فى الهم واحد
ميه مالحه وجرح واحد
والرحايه اللى بتطحن عضمنا
قلبها ..حجرها واحد
ع الرصيف الكل .. واحد
وآما يد الرزق تنده
فجأه تلقى
كل واحد داسلو واحد
كل واحد داسلو واحد
كلنا فى الغربه واحد .. كدابين
كلنا فى النصب
واحد
بس بيكتر صلاتو
وف صلاتو يقرا فاتحه
ع اللى ماتو
وبعدها يقرا عدّية ياسين ..
شعر ..حمدى محمد حسين
كتبت فى ليبيا عام 2001

_________________
الرجوع الى أعلى الصفحة اذهب الى الأسفل
http://wamadat.forumegypt.net
 
الوطن فى دموع ياسين \ حمدى حسين
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الادب والفنون واقلام الاعضاء :: حصريات خاصة-
انتقل الى: