كل جديد ومتميز وحصرى تجدونه هنا فى ومضات السها


واحـــــة الإبــداع والفــن والتــألق
 
الرئيسيةالتسجيلدخول

شاطر | 
 

 سيجال شعري مع الشاعرة سوسن سحاب

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
عبد الفتاح عبد الشافي
مؤسس المنتدى
مؤسس المنتدى
avatar

عدد المساهمات : 11454
العمر : 57
الموقع : قطر

مُساهمةموضوع: سيجال شعري مع الشاعرة سوسن سحاب    الثلاثاء ديسمبر 22, 2015 11:24 am

نوفمبر ·


[ندعوك للتسجيل في المنتدى أو التعريف بنفسك لمعاينة هذه الصورة]

كلمــــــات - سوسن سحاب
10 نوفمبر ·
الجزء الأول من المساجله
أتمني ان تنال اعجابكم
قراءة شيقة ان شاء الله
============

عبد الفتاح
عطار رماني الهوا وعشت الغـــــــــرام تاني
وبإيدي بوصــــــف دوا ومعرفش دوا حالـــي
تايب بقالي سنين غير نفسي ما بشوفشي
معرفش اهل الهوي كيف عرفوا عنوانـــــــــي
........

سوسن سحاب
وازاي ما يعرفوش
العطار وعنوانه
والعطر والمسك
مرصوص في دكانه
والريح يحمل عبيره
مهما يبعد مكانه
==
عبد الفتاح
يعني إيه تصــــدح تغرّد!؟
يعني إيه تعـزف نشيد !؟
إنت عـــــــــــاوز مشنقه
الحبل فيها يكــون شديد
عشان تبطل زقــــــــزقه
وكفايه بس تموت شهيد
سبقك كتير للمحــــــرقه
وهياجي غيرك من جديد
==
سوسن سحاب
حتى ولو آخر نفس
لازم اغرد كل يوم
ولو محدش بيا حس
صوتي ما حيسكت يوم
ولو عشت سنين الحبس
حغني....
لحد ما قيامتي تقوم
==
عبد الفتاح
وإيه يفــــــيدك م الغُــــــنا
تتعب ويوم هتروح بلاش
راحت خلاص ساعة الهنا
ونسينا كلمـــــــه مقلنهاش
وجاتنا ايام الضــــــــــــنا
وايام غناي مبنســـــهاش
كان اللُّقا يـــــــــوم المُنَيَ
فوق السحاب اللحن عاش
عزفت وبصـــــــوتي أنا
من غير حذر أو اندهاش
فجأه صحيت من حلم انا
وكلمــــة وداعه مقلتهاش
==
سوسن سحاب
ومين بيتعب من الغنا
لو كان ب يتنفس غنا
لو كان بيتكلم غنا
لو كان حياته للممات
كلها غنا في غنا
أحزانه ولو يوم فرح
ح يقضيه برضه غنا
فما تلوموش ع الحزين
لو تبسطه لحظة غنا
==
عبد الفتاح
نفسي كـــــل الناس تغني
نفسي كل النـــــاس تعيش
عصفاير تزقزق إيد تهنّي
وأي جرح يكــــون مفيش
قدر الطــــيور لازم تغني
ولحزنها تغطيه بريـــــش
===

عبد الفتاح
لو مد إيده الزمن
هيلاقي مية حته
هيلاقي مية شوقه
ويلاقي مية لهفه
وكإنهم قاعدين
جوّا طبق فتّه
لو مد إيده الزمن
هستقبله بهمسه
ماهو اصل انا لسه
لا نسيت ولا بنسي
ولا لاقي لي مرسََيَ
لو مد إيده الزمن
هيلاقي جوايا
بسمه وضحكايه
وشجره وضلايه
ودفا بشمسايه
وسجده بمصلايه
لو مد إيده الزمن
هصحي له من بدري
واسهر عليه عمري
واهدي له من وردي
نسمايه من فجري
من غير ما يدفع تمن
لو مد إيده الزمن
لو مد إيده الزمن
هحكي له عن بكره
وعن ماضِ والذكري
دنا عندي مية فكره
لكن إيدين الزمن
عند اسمي ويوقِِّفْْْ
ويخبي منهم إيد
اصل ف غرامه عنيد
يتحجج وبالتنهيد
ويقول كلام ما يفيد
إيد واحده ما تسقف
راح ياجي يوم يازمن
تندم علي افعالك
هيدفعوك التمن
وهياخدوا موالك
خلي إيديك يا زمن
دنيا ......ما ديمالك

===================
سوسن سحاب
مد انت بس الإيد
حتلقي ايد الحبيب
بتشاور من بعيد
ولا تعتب ع الزمن
العتاب ما راح يفيد
واللي ح يدفع الثمن
قلب ح يصبح شهيد
==
عبد الفتاح

مديت سنين وسنين
وتعبوا إيديْ لِتنين
قلب وعيون دايبين
وعارف طريقه فين
بس الخجل والقدر
وحاطط ف قلبي حجر
وحساب لناس تانيين
انا عارفه يتمني
وان قلت يستني
وامله ف يوم لمّا
اشاور انا بصابعين
إن كان ف حبه عنيد
أنا كرامتي حديد
حتي اللي مت شهيد
أرحم لنفسي ممات
ما اعمل انا شحات
وامد تاني إيدين
==
سوسن سحاب
مين على قلبه قدر
ومين اللي قلبه حجر
لما انت عارف انه
في الهوب دايب
ولا عشان اكمنه
في الغرام خايب
وهو من غلبه
كاتم جوه قلبه
ومداري عليك حبه
وعمل قال بيكابر
وهو يا عيني حاير
وانت بدل ما تحايله
وتكون عليه صابر
تقسى عليه وتقول
لو كان في حبه عنيد
انا كرامتي حديد؟؟
==
عبد الفتناح

........
انا عمري ما اقسي عليها
وياما حاولت اراضيها
غيره وشكوك وظنون
عاملالي فيها ليلي
وكأني انا ...المجنون
لا هيّ مش خايبه
ولا ف الغرام حايره
هي فاكره انه خلاص
ملَكَت قلوب الناس
وجاها كده احساس
راح اشيلها فوق الراس
حتي ان كانت عايبه
لا لا ورب الناس
دي ف مخها وسواس
وشيطان رجيم خناس
حكايتها مش سايبه
لكن بحب عنيها
والفلب دايب فيها
غير بس هو العند
آآآآآه لو تمد إيديها
هتلاقاني ف تفاريحها
وعاشق منها ملامحها
وروحي هايمه مع روحها
ولجلك انتِ وبس
خليتي قلبي يحس
واقول لنفسي هُس
وأروح أصالحها
==
سوسن سحاب
لو حتجيني
حتنسيني
كل البعاد
لو ح تصالح
انا حسامح
وانسى العناد
==

عبد الفتاح
فيكِي أوصـــــــاف المليحه
وم الطفـــــوله انتي البريئه
وم العيون انتي الجــــــريئه
والقعــــــــده وياكي مُريحه
فيكي عِشق وفيكي شُوق
وقلــــــــــوبنا تاخديها لِفُوق
والآهه في صُــــوتِك جريحه
الوفا والصــــــــــــدق فيكي
والحنان كله ف إيديكـــــــي
والكدبه في شــرعك قبيحه
أدب تِلاقِي واحــــــــــــترام
وجـــمال يخليك ف انسجام
والعيبه في قولِكْ شحـــيحه
فيكي ده وعيوني شـــاهده
عيبك انتي حاجه واحــــــده
إنّك انتي مُش صريحـــــــــه
==
سوسن سحاب

عيبي إني مش صريحة
بس طبعا لي أسبابي...
لما بتسأل لو بحبك
قلت لا...
والحقيقة
إنك إنت أعز أحبابي

============
عبد الفتاح
يا قطر هدّي حداهـــــــم
قدامك خلاص المحطــــه
فيه ناس قلوبنا معاهــــم
ومعبيينها ف شنطـــــــه
لا ف يوم بصوا عليـــها
ولا منهم جاتها جلطــــه
وقف ينوبك ثــــــــــواب
واغلط لو حتي غلطـــــه
عاوزين شنطكــم خدوها
قلوبنا مش ناقصه ورطه
ملعون ابوك ياســـــــــفر
دا الباقي ف العمر شَرْطَه
==
سوسن سحاب
الحياة بقت مجرد
شنطة سفر...
راحت أمي وراح أبويا
ووراهم ضاع العمر
ولسه بوضب
شنطة سفر
==
عبد الفتاح
مبقاش كلام
مبقاش سؤال
ولا ملام
او حتي صوت بيحن لك
وسط الزحام
اتساوي عندي كل شئ
الصمت صار زي الكلام
ايه يعني لما الليل يطول
ايه يعني لو تاهت عقول
كل ده ولا يسوي حاجه
واهي حكاوي والسلام
مبقاشِ نبض القلب بَسْ
او حتي كان إحساس وهَمْس
زي شاعر لما قال
لما قلبي يحب يفرح
اغنيلها ألم نشرح
ترد وتقول لي عَبَسْ
أو هُسْ..... بَسْ
طب يعني ايه؟
طب عاوزه ايه؟
عارفك يادنيا من زمان
عارف غناي ما يهمكيش
عارف بكايَ ما يساويش
حقك علي
يمكن انا مفهمتكيش
==
سوسن سحاب
وليه نبكي على الدنيا
وهي علينا ما بتبكيش
وليه نقاسيها ونعاني
وهما يومين وادينا بنعيش

بفتح دولاب الذكريات
نطت من جواه حاجات
لعب قديمة
تذاكر سيما
ورق كوتشينة
كتب...قصص
ومذكرات.......

صور كتير
مناديل حرير
وشرايط كاسيت
قبل زمن السيديهات
أم كلثوم والآهات
محمد فوزي
وردة ونجاة
محرم فؤاد
يا واحشني....
إزيك سلامات
وفايزة أحمد
خلينا ننسى
ننسى اللي فات
وعبد الحليم....
وذكريات
وشوية كتب
ومجلدات...
بين السطور
مكتوب حكايات
وفي الصفحات
ورد دبلان
على جوابات
في كل كتاب....
وردة مطوية
وفي كل جواب...
قصــص منسية

وشريط فيديو
غزل البنات
أفلام شادية
وماجدة ....
وفيلم المراه

عروستي القماش
بفستانها البني
واللي كانت
بتنام في حضني
مسحت التراب
فوق الحاجات
نفضت عن عقلي
غبار وتراكمات
ولقيتني بنت صغيرة
رجع بيها الزمن لحظات
رجعت لأيام المدرسة
حاضنة الكتب
ماشية بثبات
أسمع كلام على النواصي
كلام يرضي
غرور البنات
ومحاولات ومحاولات
وردي الوحيد كان ...السكات

كل شوية
نفتح دولاب الذكريات
ونعيش يومين في زمن فات
كل ذكرى
وكل فكرة
وكل امبارح أصبح بكرة
كل ده وكتير حاجات
رجعت لما فتحت.....
دولاب الذكريات
==

=================
عبد الفتاح
وشوية كتب
ومجلدات...
بين السطور
مكتوب حكايات
وفي الصفحات
ورد دبلان
على جوابات
في كل كتاب....
وردة مطوية
وفي كل جواب...
قصــص منسية.......
وشريط حرير احمر
كانت تضفر بيه شعرها
وحظاظه بمبي ياما
زَيّنت بيها يدها
ودبلتين من ورق الشجر
لبستني ولبستها..
وقزازة عطر فاضيه
لسه قاعده ف رفها
وحجات كتير
مكتوب عليها
حرف مني وحرف كان من اسمها
وبروش مدهب
جبته ليها
عشان يزين صدرها
ولقيت كمان
دمعة نازله
من عينيها .....لما يوم صورتها
اصل القدر يوم خدها مني
وغصب عني سبتها.......

[ندعوك للتسجيل في المنتدى أو التعريف بنفسك لمعاينة هذه الصورة]

_________________
[ندعوك للتسجيل في المنتدى أو التعريف بنفسك لمعاينة هذا الرابط]
***ما ندمت علي شئ ندمي علي يوم*** ***غـــــــــربت شمـــــــــــــــــــسه نقص فيه اجلـــــــي***ولم يزد فيه عمــلي***
الرجوع الى أعلى الصفحة اذهب الى الأسفل
 
سيجال شعري مع الشاعرة سوسن سحاب
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الادب والفنون واقلام الاعضاء :: سحر الكلمات لشاعر الومضات-
انتقل الى: