ساعة زعل

موضوع: ساعة زعل السبت مارس 25, 2017 12:52 pm

ساعة زعل ..
***
**
*
مين يشتري ساعة زعل من
غير فلوس !؟
مين عنده كلمه ف الهويَ
تهدّي النفوس ؟
ومين علي راس القدر يقدر
يبوس ؟
يقدر يدوس ..
ع القلب لمّــا يتمِلِي لهفه
وحنين ..
علي كلمه حــافرها الزمن فوق
الجبيـــن ..
علي عـزف ناي الصبح لمّــا نغمِتُه
تِطلع أنيـــن ..
علي عمْـر ماشيه خطوِته ومتكتّفه
مِنّه الإيديــن ..
علي وش راسم بسمته فوق العيون
النعسانيــن ..
سيبك انت م السنين ..
سيبك انت م الخوالي
العيون اللّي قبالي
بحــر تايه فيه خيالي
رغم مرســـاهـ ضفتين ..
والمراكب ماشيه فيه شايله حمولها من
قلوب العاشقــــين ..
والسهر فارد قلوعه في السّما بيناجي
منها نجمتــــين ..
كُلّ علي ليلاهـ يغنّــي
ناس تبارك .. ناس تهنّــي
وامّا شوفتك غصب عنّـــي
نزلوا منّــي دمعتـــين ..
معرفش فرحه لما شوفتك ف المنام
فاردهـ الإيديــن ؛
ولّأ صبر ف قلب عِشقك
يوم سِمع علي غفله حِسّك
من لهفته بقي حِتّـــتِـين ...؟
وكل حته من زمن ..
الصبر ليه لابس كفن ؟
والسّــر ليه مات واندفن !؟
حتي الشجن
من غير عتاب خلانا نمشي ف سكتين ..
ملعون أبو كلمة زعــل ..
ملعونه كلمه تكون خبيثه وف القلوب نارها
اشتعل ..
ملعونه نفس تكون بتفهم وسايقه ع الدنيا
الهبل ..
ملعون يا قلب تكون فهمت وعاملّي قال
فيها بطل ..
مين يشتريها الكلمه منّي ومش هقول
انه فَـــعَـل ..
دا الصلح خير ..وقلوبنا يملاها الصفــا
وِنّوروها بشمعتين .. لجل المودة والدفا
ونعمروها بكلمتين .. من ابجديات الوفا
ونصلوا فيها ركعتين ..يبقوا زيادهـ
ف العمل ...
علشان ما تدخل قلبنا لحظة ملل
ولا ناموسه ف عيني تِكبَر .. وف عنيكي
تكون جمل ..
ده موش زعــل ..
دي حكاية مني ..
عشان لغيرنا تكون مثل ..
قطع الزعل ..
**********************
[ندعوك للتسجيل في المنتدى أو التعريف بنفسك لمعاينة هذا الرابط]
[ندعوك للتسجيل في المنتدى أو التعريف بنفسك لمعاينة هذه الصورة]
[ندعوك للتسجيل في المنتدى أو التعريف بنفسك لمعاينة هذا الرابط]

» ساعة من ألف ساعة \بشير عياد
» دقت ساعة الفرح ... دقت ساعة الزواج...زفه زفه
» ساعة نصر
» ساعة الفطار
» ساعة لا ينفع فيها الندم