تعاريف ...الامير عبدالرحمن بن مساعد

الشوارع :

مستقبل الماضي المضارع .

الكراسي :

مصدر افراح ومآسي

لاهي تبارك لجالسها الجديد

ولا هي لأهل تاركها تواسي

الكراسي عامده

تهزأ بنا وهي جامده

الصرير اللي من قوائمها

يقول : مافي أحد منكم اساسي .

المواطن :

شخص تخفاه البواطن

شخص ماهو لمصلحة مستقبله فاطن

المواطن في جميع الازمنه والاماكن

دومه ماكل وشارب وساكن

ما يبي غير الذي يقدر يفكر له , يبين له , يقرر له

وش الفاتح من الالوان وش الداكن

المواطن كفء عاقل محترم لكنه شخص جاهل بالبواطن .

الذكاء :

انك تلاقي مكانك بين اكوام لغباء .

الجود :

العطاء بحدود

او بمعنى اخر انك تعطي اكثر من الموجود

الحياة :

الممر الكهل بين الولاده والممات

او بمعنى اخر نقدر نقول المسافه بين متجه صوب السجود وبين سجادة صلاة .

السياسه :

السياسه فن والدنيا مسارح

ولأجل تحقيق المصالح

تقدر انك تكرهه في داخلك ’ وتلعن الطيب في ساسه

لكن ان شفته عليك تقوم له وتحضنه وتبوس راسه .

الاقتصاد :

ناس تزرع من فجر ربي الين الشمس تغرب

وناس تصحى في العشاء تتولى تقسيم الحصاد .

السجون :

هي مكان لعزل من يخرج عن القانون

وأن غدا القانون جائر , تصبح القضبان دنيا تعزل الخارج عن المسجون .

الطواغيت :

ناس تتعلق صورها فكل قرنه وكل بيت

ناس تلقى في دولها العيون ماهي عيون والعقل مثل الجنون

واصغر الذنب اكبره

والحديث ذو سجون والعفو عند المقبره .

البخل :

تقتير مع وفرة دخل

او بمعنى اخر ووصفا وجيز

عكسه المطلق فعل سلطان بن عبدالعزيز .

الحداثه :

الرضوض الناتجه عن ارتطام الشهب بأسراب البعوض

ما هي طلاسم او غموض

أو بمعنى اخر نقول الحداثه , واحد زايد واحد يساوي ثلاثه .

الفقر :

الفقر هو غناء فاحش هناك ومستقر

الفقر مطلب ضروري , لجل تتسوق شعارات القناعه

والصبر لجل يطلب صاحبه انصاف ما بعد القبر .

الصفر :

الصفر كشف جليل , من اكتشافات العرب

يظل برهان ودليل , على الشروق اللي غرب

نقدر نقول ان الصفر انجاز تعدى وقته

في وقت غاب اللي اوجدوه , ومن يومها وهم تحته