وايه يعني ..؟

موضوع: وايه يعني ..؟ الأحد أبريل 09, 2017 7:15 pm

وإيه يعني !؟
***
**
*

تفكيري بيهديني
اقول الشعر
وأوصف فيكي احساسي
ومن قدمي لساس راسي
دايب فيكي ...
وحواليكي !!
ألاقي سَد م العالي
لا أيد طايلاه ولا جه مره علي بالي
ونا خالي
ولا يوم كنت بتمناه
ولا فكرت أترجاه
ولا اتخيلت لو لحظه
راح يكون لي دوا لحالي
وإيه يعني !؟
وايه يعني أقول الشعر
واعبر عن مواجيدي
وتنهيدي
ولا بيدي ..يسيل الدمع من عيني
ويكويني
بأشواقي وبحنيني
بيقتلني كتير مرات
ويحييني
ونومي مني يجافيني
وإيه يعني !؟
وايه يعني اقول الشعر
ولا اخبيش
وجوايا كلام دراويش
ويحلالي ....
ما يتقال إلا في الحضره
وللغالي ..
وقلبي يتوب علي ايده وما يحرمنيش
لا عاوز حاجه من عنده ..
شويه بس من قلبه ..
وفي ذكره ..
يسيبني اعيش
وإيه يعني !؟
وايه يعني اقول الشعر
وأنظم للقوافي حروف
ومن غير خوف
اقولهاله
أنا الملهوف
واتغزّل بكل سرور
وأتوسل وانا المكسور
وأشحت من الزمان كلمه
تكون للقلب عيديه
علي هديه ......
أنا قضيه ......
قضيتي مش قضية عشق
مرويه وورديه
قضيتي غير قضايا الناس
قضيتي دفن للأحساس
قضيتي حبس للأنفاس
من غير قاضي ينطقم حُكم
ومدافعيني صم وبكم
ولا جلسه ولا قضيه
ولا ليها تار ولا دِيّه
وإيه يعني !؟
هقول الشعر وأغني
كفايه بحبي متهني
ومليان شوق وحنيه
*******

» شوفوا شندويلي وايه الحكايه
» رئيس توافقي .. يعني ايه؟؟
» اكسروا الملل شويه مع الحبايب " بلدياتنا يعني "
» غالى غالى وايه العمل يا احمد