و آخرتها ..

موضوع: و آخرتها .. الأحد أبريل 09, 2017 7:39 pm

وآخــرتها !!؟؟؟
***
**
*

وقلت امشي ورا قلبي
لحد ما اشوف آخرتها
وطاوع عيني لو حبّت
ترد عليها بصّتهــا
وأقعد ف الطريق محتار
عشان اعرفها سِكّتهــا
وخطــوتها
تقول زلزال ..
كأنه لسان لهب حامي
وطالع لسّــه من بركــان
وم الآخر..تركت عنان هوي نفسي
حجات تتحــس بالبرهان
وبالحيله
حجات تطلع لي كل أوان ..
أقول الحق شدّتني لشعــور تاني
كأني ف السّــما طاير
وتايه منّي عنواني
ويوم ما تغيب أكون حاير
وبرضه لسّــه ف مكاني
وفكري وكل وجداني
وأحلامي
ماليهم هم ولا سيره غير الشوفه لعيون تِلمع
طلع عفريتي م العلبه وقال
إسمع ..
هواك ف القلب ليه شوقه وله
منبع
إهدَيَ ورَسِّــي القلب وأوعَيَ
م الحدود تطلع ..
ولا مشاعرك ونبض القلب تقفلهم
ولا الإحساس لِيِه تمنع ..
كلام فكرني بالماضي وبالذكري
وحجات أزود ...
يومها شَعرِي كان اســـود ..
وفيه بركان جوّايَا بيتنطط
وكام شعره علي اللحيه
وشارب لسه متخطط
وقلب هواه من الأشواق
وم التنهيده متشحطط
كانت أيام تقول أحلام
وفيها غرامي متظبط
ومن تاني ..
رجعت أعد أيامي
لقيت عمري بلا أحباب
وشعر الراس من الدنيا وهوايلها
كمان أهو شـــاب
ولحية وشّــي والشارب
بِقوا غابه وسدّوا الباب
ورحت أبص ف مرايه
وأشوف نفسي وغِيِّتهــا
قلم خلصــان بِبَــرّايه
وكل حروفه مسحتــها
ودي أحوال سنين العمـــر
ودي الدنيــا وآخرتها
*********