طلقنى ومنك لله \محمد سيد سرور

لما الدنيا بتدى الواحد
ينسى عطاء ربه وافضاله
مش يحمد لكن كده جاحد
ع النعمه ويعمل ما بداله
ودى فعلا هو اللى جرى لى
لما اشتد العود ساب دارى
فاتنى ما بين حرتى وافكارى
سابنى وساب البيت وعياله

كن زمان عيشيين ع القد
وكنت معاه دايما ع المره
كان الزرع وكنت الارض
ولا زعلته فى يوم بالمره
كان بيشلنى جوه عنيه
وانا برموشى كنت اداريه
واما القرش لعب فى اديه
جانى وجاب وياه كده ضره

واخدين بعض زمان ع حب
واما بيبعد ببقى معاه
كنت الروح وكان القلب
ودلوقتى انا مش لاقياه
مش عارفه ايه بس جرى له
واخد بنت قد عياله
وهى كمان وخداه على ماله
مش عارافه ايه بس غواه

قولى فى ايه انا اكون قصرت
اويوم عمرى غلطت معاك
دانت بتأمر ما اتأخرت
وان طول عمرى وان برعاك
شايله هموم البيت ع كتفى
وعمرى اهو ضاع وياك ولا يكفى
ومش هسمح لك انك تطفى
احلى سنين قضتها معاك

بعد العمر وبعد العشره
بعد سنين قضتها معاه
بعد ما قدت صوابعى العشره
بعد ما كنت اتمنى رضاه
بعد ما كبرت بنتى وابنى
جى بكل بساطه تسبنى
تتجوز غيرى وتتعبنى
طلقنى ومنك لله

الزجال
محمد سرور

بالفعل اى انسان بتكون ظروفه المادية صعبة وتتحسن اول

حاجة يفكر فيها هى انه يتجوز على مراته رغم صبرها

عليه فى ايام الفقر لكن هو بيحس انه محتاج يغير كل شىء

واول شىء بيفكر يغيره هو مراته والكلمات معبرة جدا

عن هذا الموقف الصعب على الزوجة . شكرا ام شروق

على نقل القصيدة الجميلة وكل الشكر للزجال محمد سيد

سرور على الكلمات الرائعة

طيب وليه اللى يحس انه يحتاج لتغيير يلجأ لتغيير الزوجة اول شىء
لماذا لا يحاول تغيير نفسه
لماذا لا يعتبر هذا مؤشر له ان خطاه غير ثابتة ويرسم لنفسه خطى اوضح
شكرا سعيد

علشان الظروف المادية بتجبر الانسان انه يتجوز واحدة

مش جميلة مثلا فلما الظروف تسمح هو طبعا اول حاجة

بيفكر فيها انه يصلح الغلطة دى ويحقق ما منعته الظروف

من تحقيقه ويتجوز التانية الاجمل طبعا .

لا هى مش مسألة جمال
دى فراغة عين
طيب ما يحسن الاختيار من الاول

بعيد عن الجمال او عدمه فهو لم يخطئ طالما انه لن يقصر مع زوجته في

حقوقها ولم يخدعها فمن حقه ان يتزوج عليها وهو خيرا

من ان يرتكب اثما او يخدعها ويتزوج عليها دون علمها

كما ان من حقها ايضا ان تطلب الطلاق اذا لم يعجبها

هذا الوضع وتري انها لن ترتاح في العيشة مع ضرة

شكرا ام شروق

مش عارفه ليه آرائك انت واخوك دايما تميل للزواج الثانى
روح يا ايمن ان شاء الله ربنا يبتليكم بزوجات يطلعوا عينيكم يارب

ايه الحكاية هتعترضي علي كلام ربنا

مثني وثلاث ورباع

وبعدين برده دي دعوة تدعيهالنا طيب طالما هيطلعوا عينا

يبقي مية في المية هنتجوز عليهم

ههههههههههههه

لا اللى تأدبه واحده
يحرم ويكره الفصيلة كلها
ويمشى يكلم نفسه ان شاء الله
اشوف فيكم يوم قريب

الاستاذه الافاضل
صدقونى دى قصه حقيقيه
لموكله عندى تأثرت بحكيتها
وكتبت عنها
بما انى محام رفعتلها خلع وخلعت زوجها
شكرا استاذه زهره لنقل الزجل
تحياتى للجميع

نشكرك استاذ محمد سرور على التوضيح
ويستاهل الخلع صاحبنا
فالزوجة سكن وينبغى ان يعلمها بنيته اذا اراد الزواج عليها
ولها ان تقبل الاستمرار معه او الرفض

» كل الحجاج للزجال محمد سرور
» اتمسكن كده واتمكن/محمد السيد سرور
» مرحبا بالزجال الكبير \محمد سيد سرور
» ردا على مقال محمد خضر الشريف جريدة المصريون فى حق شيخنا الشيخ محمد محمد الطيب
» سرور مشوب بشكوك