جوز الست

موضوع: جوز الست الخميس نوفمبر 03, 2011 7:05 pm

جوز الست ثريا جارتنا
دايما ماشى وضارب بوز
لو صبحت عليه ما يردش
لو كلمته ف حاجة يبربش
أى سؤال بيرد يجوز
..................
راجل لما تشوفه تدمع
غلب الدنيا اتلم عليه
ربك رزقه بست قوية
ليل ونهار بتبهدل فيه
............
تبدأ يومها صريخ وصوات
يلا يا بت ويلا يا واد
وانت كمان وياهم قوم
يومكم باين كله سواد
...........
ينزل جرى عياله معاه
اللى ما داق لقمة يا ولداه
يمشى يكلم نفسه ف سره
حتى ف سره يبص وراه
..................
راح بعياله على الاسكولة
ابنه ف تالتة وبنته ف أولى
راح على شغله بدرى شوية
قالها ف سره تموت مشلولة
...................
بعد الشغل ما يخلص يجرى
علشان يلحق فرن العيش
اصل الست مراته قالت له
لو ما لقيتش العيش ما تجيش
....................
من على باب الشارع شافها
شابطة ف جارة بتاكل فيها
حبة خلاص..طب معلش
ولا فيش كلمة تأثر فيها
................
بعد العركة ما خلصت جت له
يلا يا اخويا عشان نتهبب
قصدها يعنى عشان يتغدوا
وان قال لأ نهاره مهبب
...................

.................
وأهو ع الحال ده بقاله سنين
راجل طيب بس حزين
قمت قايل له ف مرة يا رااااجل
خد لك موقف وابقى متين
................
قاللى الموقف يعنى طلاقها
قوللى عيالى يروحوا لفين
سيبنى أربى عيالى يا عم
يوووه نسيتنى انا رايح فين
...............
كبرت جدا جوه دماغى
قلت أساعده واروح اكلمها
شوفى يا خالتى ثريا هأقولك
بصت بصة انا روحت فاهمها
..................
بس كأنى ما شفتش حاجة
روحت مجمد قلبى وقايل
جوزك طيب أخر حاجة
وانتى يا حاجة عاملة عمايل
................
شقهت شهقة بعزم ما فيها
هو المخفى داير يشكينى
ليلته دى سودة بكل ما فيها
غور من وشى ولما يجينى
....................
راحت زقة ايديها ف صدرى
طق شرار من جوة عينيها
هوب لقيتنى ف ثانية انا باجرى
وحاجات طايرة كانت ف ايديها
................
لما وصلت الشارع شفته
ماشى ف حاله زى العادة
قلت له أوعى تقرب بيتكوا
اصل الحالة جت بزيادة
................
ولا عبرنى ولا استعبرنى
كمل برضه طريقه ف حاله
قلت يا ريتنى ف حاله انا سبته
انا كان مالى بس وماله
.................
واهو من يومها ماشى مكلضم
واما يشوفنى يبص لفوق
والقاه دايما كده بيبلضم
زى ما اكون لبسته خازوق

حمدى شيبة

موضوع: رد: جوز الست الخميس نوفمبر 03, 2011 10:38 pm

ربنا يكون في عون جوز الست ثريا وعون جميع الازواج

امثاله اللذين ابتلاهم الله بالزوجة النكدية التي تحول الحياة

جحيم لا يطاق

شكرا ام شروق علي هذا الانتقاء الرائع

موضوع: رد: جوز الست الجمعة نوفمبر 04, 2011 9:06 am

شكرا ايمن
كفاك الله شرها وشر امثالها ان شاء الله

موضوع: رد: جوز الست السبت نوفمبر 05, 2011 9:02 am

اههههههههههههههههههههههههههه

والله وصف جميل جدا لحالة جوز الست ثريا

ست ؟؟؟ ست مين ؟؟ دي ست اشهر زي مابيقولوا

شكرا زهره ...ووقاكم الله جميعا شر النكد والمنكدين والنكديه

والمنكداتيه ..واللي يحبوا النكد ...الله ينكد عليهم جميعا
.............

موضوع: رد: جوز الست السبت نوفمبر 05, 2011 9:37 am

يــــــــــــــــــــــــــــــــــــــــارب
يكفينا شر النكد واصحابه
ويهد كل مفترى ومفترية ان شاء الله
شكرا ابو جمال

» الست ام عطا
» قصة الست منيرة
» طلبات الست مراتى
» الست نظيرة بقت مديرة
» الست عدلات عرافة الفلول