عدودة لموت نص الشمس

كانت بترسم ف سقف البيت
اخر ضحكه باللون الرمادي وبالسكوت
وفي دهشة الواقفين وطيت
ولعبت ف ايديها
كان الصباع الاولاني بيشاور لفوق
والتاني متعفر بسواد تراب الفرن
وف دهشة الواقفين وطيت وبكيت
ماتت
مين اللي ح يحكي لى عن امنا الغوله ؟؟؟؟
يا وشك المرتاح عضت ف جلده السنين
وعضمك واقف بيشهد ع الزمن والناس
عشقتك وانتي
بتموتي ف سكات
زي ما عشتي ف سكات
بايعه نص عمرك لنار الكانون
والباقي مرهون ليوم الشفا ..
يدب ع العتبات
فاكرك
الدنيا يا ابني زمان كانت صبيه وناس
سطور ومكتوبه
والقمر وليف الي يسهر
كان القمر ونااااااااااااااس
........
جواب يا حسين اقراه
مكتوب من سيد انا شميت ريحته اقراه
اياه
عمره ماساب فرشته وملقته
شايف كل حاجاته معايا تملي
حتي كتابه وجلبياته لساه معاي معلقته
اقراه
سامحيني يا امي:
..غيرت الجنسيه امبارح ..سجر البلح طارح طارح
حتي ان كنتي بعيده ارعاه
اقراه
تلغراف من سيد يا امه
وعنيكي بتنزح
.. دمع ..
.وكبرتي ف دي اللحظه سنين
.واتغير لونك
خشمك مفتوح من غير صوت
لكأنك شخبطتي الضحكه الطالعه
ف مكتوب سيد
الواد الزاد الزواد
عكازك لما العافيه تحيد
........
انت صغير ع الحب يا واد
فاطمه.. بتلعب بيك
بطه .. بتخطف اي فؤاد
بطه ..دي فارت فور ...
و(........) تهز الموج
ومسير ها المبخوته تجيلك
ما تصلي علي سيدك
.................................
الناس ساكتين وانا واقف ثابت جنب الحيط
وسمعت صراخ الفرن
وكانون كان قايد ليل ونهار
والناس ساكتين
واقفين حوالين الشيخ
ودعت بكل بكاي الحيط
واللنضه العشره
وصورة سيد واتقفل الباب
.......................
عارف يا حسين انا كنت زمان باتعلم ف الكتاب
كنت اكتب حرف وحرفين من الالف لغاية السين
كان ابو سيد اول بختي واخر بختي
يوم ما جه سيد كان يوم عيد كنت اتملي ف صورته الحلوه
ف عينيه كنت اكل واشرب وانام
كنت ساعات باصيف فيهم وساعات .....اشتي
عشر سنين قاللي ساعتها
البلد زي خرم الابره يا مه وانا باتخنق
سلامتك الف سلامه يا قلبي
راح اسافر..المعافر يتنصف باللقمه يا مه
سافر يا سيد ح يفكرك بيا الحنين
(ما تبكيش بكره الطير الشارد يرجع )*
الباب المقفول بيرفس كل الناس
تعاديد كتير والقلب بيعدد
نسوان تبل خدودها دموع
زي عيدان القصب الصبخ البدرى
وصوتها اتبح
ماتت قفلت بابها عليها وماتت :
شافت قطر الخمسه الصبح وماتت
..............................
عيال الحاره بتضحك من تحت لتحت
وخميس ..بيدس صباعه ف خشمه
ويديه لعينيه تعمل دمعه تشوفها الناس
وسعيد ..بيخبي عينه
وسماح ..بتنط الحجله ف صحن الحوش
وتبص بعيد
وانا لسه وحيد
نفسي اجري لجوه واقول استني
فيه لسه كلام ما اتقلشي
الحلم صغير ما تقلشي
وابوس مكتوب سيد
واتنح اتنح ف عنيها لاخر مره
خلص التغسيل
بعد دقايق يتمدد لحم الجته بطول مترين والناس ح تشيل
..................
يا ما نفسي ايا سيد اشوفك قبل ما اموت
...........
تحت الشحره الناس ساكتين
واقفين تماثيل
لكن باصين لهناك
(للقطر ( القطر زي التنين يا حسين جوفه حريقه ..وبيطلع دخان
.................. .....................
حلمت امبارح ان سي سيد جه
ومعاه مصلايه وسبحه
قمت دبحت البحه .....صحيت
.............................
وف دهشة كل الواقفين وطيت
ومسحت دموعي ف طرف التوب
بصيت لبعيد ..لهنااااك
وعني بتلحس كل الطوب..لهناك لبعيد
شفت الشمس كانت نص
بيولع كما عين الفرن
والنص التاني معتم خش عليه الدم
غمضت عيني
وف دهشة كل الواقفين وطيت
ومسحت دموعي بطرف التوب
________________________________
* سطر من اغنيه شعبيه
..............................................................
الشاعر / النميرى متولى

شكرا للشاعر الرائع علي هذا الوصف الجميل

وهذه الكلمات البسيطه المعبره

وشكرا لزهره علي تعريفنا بجانب من شعر الاستاذ

نميري
.........

شكرا ابو جمال
كنت خايفه تقولى بطلى نكد يا زهرة مش ناقصه هى الحكاية