شفت يا ريس أوباما\عادل صابر ابن دشنا

لفتي الاسمر سلامة
قصدي اقول لسمر اوباما
نفسي يا ابو خاله اشتكيلك
من هنا ليوم القيامة
نفسي يا ريس اوباما
... نفسي اقولك ع اللي حاصل
واللى مدفون ف الحواصل
الحديت تاه منى واصل
والحنك لابس لجامه
نفسي يا ريس اوباما
مين يا خال للحق قايل
متهومين واحنا القتايل
محبوسين من غير دلايل
والعدو دق الاقامة
شفت يا ريس اوباما
وانت عارف اللي جرالي
ماانت اصلك ولد خالي
وانت ابو زيد الهلالي
الفتى الاسمر سلامة
قصدي اقول الاسمر اوباما

مش حاقلك تملى جيبي
رغم عارف انك قريبي
بس عايزك تحمي شيبي
لجل احافظ ع الكرامة
نفسي يا ريس اوباما

نفسي اقلك ع اللي بيا
واللي عمله ابن الغبية
لسة ناركم قايدة فيا
فاحتة جوا الجوف علامة
شفت يا ريس اوباما
اتفلت ف بلادنا بوش
زي تور محبوس في حوش
جاب مدافعه والجيوش
شفنا يا ما وياما ياما
شفنا يا ريس اوباما

جه غراب الشوم حدانا
هد على روسنا الخزانة
ع التراب سالت دمانا
والزتون مات والحمامة!!
شفت يا ريس اوباما

دمنا تنعر سواقي
شبع الارض الشراقى
واسأل النخل العراقي
بلحه ليه ضلمة وقتامة!!
اسأله يا خال اوباما

جانا بوش يا ولد خالي
جه قتل ضحكة عيالي
وافترى علينا الضلالي
هو وشوية لمامة !!
شفت يا ريس اوباما

جه علينا بكل قوة
جه وقال عامل فتوة
زي ديب سعران وهو
في الحروب زي النعامة!!
مش كدا يا خال اوباما!

جه ضرينا بالكيماوي
لجل قال يلقى النواوي
جه وكان ع الشر ناوي
ويحايلنا باابتسامة!!
شفت يا ريس اوباما

قوقوا الغربان وحامو
زلزلو البرج وحمامه
وف زنازن جوانتانامو
بهدلوا الشيخ والعمامة
يرضي مين يا خال اوباما!!

طيارات من غير فرامل
خلت العرسان ارامل
نزلت حمل الحوامل
نشفت دم اليتامى
ليه كدا يا خال اوباما!!

العجوز هدموا زمانه
والصبي كسروا حصانه
والعشى خنقوا ادانه
والوطن ياللا السلامة !!
شفت يا ريس اوباما

طفل نايم فوق سريره
كيف تشيله ذنب غيره
حتى لو غلطان كبيره
ليه نضيعه بالغشامة
يرضي مين يا خال اوباما
قولي يا ريس اوباما

البلاد عمال تهاتي
والدبيح شغال يوماتي
حتى واد عمك زناتي
طخه ولا خافش ملامه
شفت يا ريس اوباما

اللي يصرخ ف الشوارع
واللي يبكي ف الجوامع
والخسيس اطرش ما سامع
والشعوب حال الندامة
ليه كدا يا خال اوباما!!

ناس تقول الصبر طيب
والضلام هيغور قريب
والخراب في الكون يشيب
والطريق وحلة وعتامة
شفت يا ريس اوباما

دحنا ياخي ناس فقارة
في الحروب ملناش مرارة
لا ضربنا هنى التجارة
او طمعنا ف الزعامة
صح يا ريس اوباما!!

وانت عارف الظلم فين؟؟
والصاروخ طالع منين
دانت حتى ابوك حسين
يا ما شاف منهم لئامة
صح يا ريس اوباما

نفسنا تنفذ وعودك
دحنا يا ابن الخال جدودك
مش تموتنا ببارودك
لجل ما تقتل اسامه!!
مش كدا يا خال اوباما

كلمات جميلة جدا ورائعة ولكن للاسف لا حياة لمن تنادى

واوباما ليس خالنا ولن يكون ولوحتى مجازا فالطينة كلها

واحد والمنبت واحد ولا يحك جلدنا الا اظافرنا .شكرا

ام شروق على نقل القصيدة وتعريفنا بالشاعر الدشناوى

عادل صابر

شكرا للاستاذ عادل

علي هذه القصيده.....اوباما ليس افضل من سابقيه

عيال عبد الواحد كلهم واحد علي رأي المثل المصري

انها سياسة دوله وكل يأتي لينفذ منها جزءا

وبصرف النظر عن صلة القرابه المجازيه التي جاءت في الابيات

الا ان القصيده فنيا رائعه جدا

شكرا زهره
...............