وجــــع القلوب
اول كلامي هبديه بالصلاة عالنبى
بعد بسم الله
هــرجع للحكايه من الاول
واسمع كلامي وخليك وياه
جــــوايا عذاب وحيره
وتعباني قولة ...أه
اعز الناس بيروح منــى
والفكر سارح وقلبي معاه
قدام عيني بيتألم
ويصرخ ليلاتي بقولة اه
ودموع العين ساريه فى خدى
وكأن ياناس مش لاقي امل في دواه
صرفت مالي ... وما في جيبي
وياريت يجيب الشفا وياه
سمعني طبيبي.... وزعل
وبكلمتين جبر خاطري
وبصوت حزين علي حزني
طبطب بأيده علي كتفي
وقال يا بنى ادعى المولى بالشفا
اكيد هتلقاه
يكلمني وانا دموعي نازله من عينى
ياريت تحكيلي يا طبيبي
وتقولي علي الغالي وايه في حشاه
وتريح الفكر اللي كاويني
وترحم صدري من نار جواه
هاود طبيبي وعاود للكشف من تاني
جاب الجهاز والرسم عاده من تاني
طبيب صغير كان جنبه
يقول له هتعيد الكشف ليه من تاني
ماهي حاله وخلاص خلصت
تتعبنا ليه معاه تاني
الشيب مغطي خلاص راسه
عاوزين ايه ؟؟ يعود له الشباب تاني
وبكل بساطه واستخفاف
وقلبه للحس والشعور عمره ما شاف
راح علي الغالي ويقوله
ويحكيله علي الوجع كله
راحت الرحمه من قلبه
ونسي رب منه نخاف
صرخ طبيبي في زميله
ويقوله هات ابنه من بره ياخي واحكيله
انت قلبك .... ايــــــــه
حجر صوان .. علي الوجع بتحكيله
فين القسم اللي اقسمته في يمينك
اللي بتقوله دا عار علي الطب ويدينك
الطب رحمه فى الاساس
مش منظره وسماعه في يمينك
كلامهم مرار وانا حشايا داب
قاعد حيران وقلبي كله عذاب
دعيت لرب الكون في سماه
يسمع دعايا ويرحمني من قولة اه
سمع بكايا الغالي وشاف دمعي
حيران .......في عيوني
وبداريه وبضحك وانا ويـــــــاه
لمحت ف عينه نظره حزينه
بتقولي يابني يانور عيني
خلاص كدا خلصت
وفوضت امري انا لله
انفجرت دموعي وخلاص سالت
مش حاكم علي نفسي
ولقيتها خلاص مالت
اترميت مابين احضانه وف ثانيه
ابوس انا ف ايده واقوله
تعيش وحسك ف الدنيا
وبأيدي بمسح له جبينه
وعيوني ثابته علي عينه
دموعي حايره في جفوني
ودموعه نازله من عينه
ونازل ابوس انا فى ايده
وادعي بالايمان الله يزيده
سكت... وقالي خلاص
كل شيئ بمواعيده
ولقيته يحلفلي كدا بالله
قلبه سليم
ومفيش حاجه خلاص وجعاه
يقول يابني انا مؤمن
ياضناي انا راضي بقضاء الله
اصرخ انا والدمعه تغلبني
وموجوع القلب من قولة اه
وفكري يسرح ...هتحرم من قولة ولدي
وضناي وكمان ....ابني ؟
واتمنيت يكون دا حلم
افوق انا منه خلاص وانساه
وفي لحظه العيون ثبتت
وقلت اهو نام الحمد لله
جاني طبيبي وشاف نبضه
وقالي خلاص البقاء لله
صرخت بعزم صوتي
هزيت العالم بقولة ....اه
وكأن ضهري انقسم
وقلبي مقسوم وطالعه منه الاه
واتمنيت اكون انا ... وياه
يرفعني طبيبي وبيبكي
ويقولى ياولدي الدوام لله
اعقل ياولدي خليك كدا مؤمن
لامفر خلاص من قضاء الله
عرفت انا دلوقتي ان الحكايه
خلاص خلصت وما دايم غير الله
ابو حســام