الليلة دى حكاية هنادى

هبدأ حكاية الليلادي بالصلاة عالزين
هحكي حكاية بتحصل كل عام واتنين
وادي الحكاية اللي حصلت ييجي من قرنين
فاللي هيسمع هيدفع حاجة يراضينا
واللي هيسمع لابد يصلي عالنبي نوبتين

آدي حكاية الليلادي

عن الصبيه هنادي

اللّي الأمير حبّها

وعيونه كات منّها

وهيه رافضه اكمنّها

القلب مش راضي

كان فيه صبيه بهية اسمها هنادي

الشعر متر ونص وعودها مش عادي

والسنه لولي وورد خدودها بينادي

وعيونها زرقا بلون زرقة مياه النيل

نظرتها ساحرة وفوقها ألف رمش كحيل

والمشية أحلي وصوتها يغلب بنات الليل

والوسط ميّة وتقسيمته تهدّ الحيل

شافها الفتي الجمّال

قلبه اتخطف في الحال

وساب جماله وقال

لازم أروح ليها

علي شانها اعدّي جبال

وبعمري أفديها

ردوا عليه الصحاب ما بلاش تروح ليها

أصل الأمير حبها ومافيش نصيب فيها

قال مستحيل يا بشر دانا بموت فيها

لازم اروح ليها لو حتي اروح فيها

وان مارضيتش بيا

هيكون كفايه عليا

اني وقفت جنبيها

راح الفتي الجمّال وف إيده ياسمينه

قالتله يا ابن الحلال الحب مش لينا

سبّلها وغمزلها وعملّها البحر طحينه

وبعد ساعة زمن بقت في إيده عجينة

دابت بنظرة عين وقالتله آه يا جدع

ياللي كلامك زين وبسببه قلبي اتوجع

قول لي انتا جيتلي منين ولفين موديني

خايفه عليك م العين .. حرّص يا نور عيني

لكن عيون الناس واسعه قوي مفنجلة

راحت لقصر الأمير وقالتله فيه مشكله

وحكتله عاللي جري وزودت حبة

قال الأمير يتعدم ..أفتينا في المسألة

واتنفذ الإعدام علي غير رضا القاضي

والدمع والأحزان هتفيد بإيه هنادي

ومرّت الأيام والشعب مش راضي

والكره واللعنات علي الأمير حلّت

والفاتحة والدعوات علي اللي مات نزلت

وحكاية الحبيبين بعد السنين فضلت

تتغني للموعظة مش حكي عالفاضي

وادي حكاية هنادي اللي بدأت بالصلاة عالنبي

واللي سمعنا يراضينا بحاجة لجل النبي

واللي مفلس بدعوة ننول شفاعة النبي

وقبل ما تحلّ كيسك وتطلّع المعلوم

بعلو صوتك ياريتك تسمّعنا الصلاه عالنبي

أحمد فرج

» هنادى خدها الوبا\ بقلمى
» برنامج الليلة مع جنا
» كل أم الليلة عروسة
» اوبريت الليلة الكبيرة
» تهمة العيب فى الذات الجمهورية