فقرة مهداة للجيش تلقيها فاطمة خالد من كلمات سعد الشرقاوى

معنى الجيش....

قولت لولدي حقيقة بلدي
وفيه كام معنى لإسم الجيش
لمّا تحب ترابها وتعشق
صورة نيلها مع الكورنيش
لمّا تشوف الجندي ف ليلة
صاحي بيحمي حدود أوطانك
ولسان حاله ساعتها يقول لك
الأرواح بتهون علشانك
بدّل خوفك كله أمان
وأنا فى الخدمة أبات سهران
كله يهون لأجل الأوطان
يعنى أموت بسْ انت تعيش
شوف كام معنى لاسم الجيش
,,,,
جيشك شرفك هوّ سلاحك
هوّ صمودك هوّ نجاحك
هوّ الضهر الحامي لأرضك
واللي يسطـّر مجد كفاحك
حارس خادم للأوطان
جه فى السّـُنة وفى القرآن
إوعاك تسمع أيْ جبان
بايع وطنـُه عشان بكشيش
شوف كام معنى لإسم الجيش
,,,,
جيشك يعني حدود أراضيها
وعين الدولة اللى تشوف بيها
حامى ترابها وحامي سماها
وحامي المايّه اللي ف موانيها
جيشك درع وسهم ومدفع
شعبٌه ينادي يلبيّ ويسمع
عمرٌه ما يحني الراس ولا يركع
ضهري وسندي وغيره ماليش
شوف كام معنى لإسم الجيش
,,,,
جيشك هوّ اللي يعلـّيك
جيشك شوكة ف زور أعاديك
والليّ بيكره جيشك يا ابني
تلقاه دايما قاسي عليك
الوطنيّة يعني عطاء
يعني محبّة يعني فداء
أمّا الحاقد يا ابني وباء
دايما ياخـُد ولا يدّيش
شوف كام معنى لإسم الجيش