عايز انام

موضوع: عايز انام الأحد ديسمبر 29, 2013 9:17 pm

الدكتور الشاعر صلاح عبدالله
راجل عسل.
مهداة إلى حزب الكنبة.
عايز أنام.
عايز أنام.
قومي غطيني يا أم هشام.
مالي ومال أم التحرير؟..
ناسه قليل ولا كتير؟.
وإزاي ممكن أعوز تفسير.
طول ما أنا باصص عالإعلام؟.
إيه نعمل في الزمن الطين.
إلا النوم تحت البطاطين؟.
ربي احفظني من الشياطين.
الواقفين ضدك يا نظام.
عايز أنام.
أعصابي أساسا حساسة.
ودي ناس بتهرتل بغلاسة.
قال عايزيني أفهم في سياسة.
دا أنا معرفش القوطة بكام.
عايز أنام.
يستنى المجلس أو يخلع.
وبلدنا دي تنزل أو تطلع.
أنا مال أمي ومالها، ما تولع.
طول ما مراتي حاشية حمام.
عايز أنام.
طول ما المعدة متعبية.
وفي حضنك بارتاح يا ولية.
أنا نفسي طبعا مرضية.
حتى إن عملوا لحسني مقام.
عايز أنام.
حد من أصحابي في يوم جاني.
قال لي نحشش، قلت انساني.
أنا مصطول أصلا رباني من غير لا حشيش ولا برشام.
عايز أنام.
وإلي يموت ما يموت، مال أمي!!.
ما يكونش بينزف من دمي!!!.
دا أنا مالفار باتخض وأسمي.
حتى إن شفته في الأحلام.
عايز أنام.
ناس بتقول لك ما توطيش.
وأغلى من الحرية مفيش.
وأنا عايز بس إني أعيش.
حتى ولو راح أعيش خدام.
عايز أنام.
أنا ما أقدرش أغلط دي الغلطة.
وأتهور وأخرج عالسلطة.
دي عيال خايبة أدانها في ملطة والشيخ قال لي خروجنا حرام.
عايز أنام.
لا برادعي أعرف ولا طنطاوي.
ولا حمل مصايب وبلاوي.
هاتكلمني في كيلو كلاوي.
تسمع مني أحلى كلام.
عايز أنام.
قال عايزيني أنزل، هأو.
غوروا إن شا الله ياكلكو العو.
دول أسيادنا حتى ولو.
جابوا يهودي يصلي إمام.
عايز أنام.
طب بالذمة أنهو الأولى؟ التحرير ولا ألعب طولة؟.
هو أنا هابقى وزير في الدولة؟.
ولا أنا هابقى من الحكام.
عايز أنام.
لا مظاهرات هانزل ولا ندوة.
أنا كسلان وكسلنا دا عدوة.
دا أنا باحتاج لدراسة جدوى.
لو ناوي أروح الحمام.
عايز أنام.

منقووول