القناه مش مجرى مائى ...القناة شريان حياه
توصل البحرين ومطمع... للاجانب والغزاه
الدول حاسدينا بيها... اللى طمعان يشتريها
واللى جاي يفتيلنا فيها... بعد تمثيل فيلم هندى
لاجل ما يسيطر عليها... أما كل الشعب مؤمن
ان رب الكون حاميها... وبعظمته وفضل منه
حبها واختص بيها ... مصر تحفرها بايديها
اللى مات فى الحفر فيها ... واللى عايش مش ناسيها
ياما ناس ضحت بروحها... من نصارى ومسلميها
مش جدودنا بس حفروا... كل جيل له بصمه فيها
اللى حفروا واللى خفروا... واللى صبروا واللى عبروا
واللى طرد اللى اغتصبها... واللى عمق واللى وسع
واللى كان من مرشديها... بعد سحب المرشدين
من فرنسا واليونان... فى سنة سته وخمسين
يوم ما أممها جمال ... جالها م البحريه أجدع
مرشدين داروا القنال... هي رزق عيال عيالنا
مصدر الرزق الحلال... وبكده صبحت قنالنا
كلها فى ايدين رجالنا... شغلوها وللامانه
طهروها م الخيانه... وبكده بقت القناه
اصبحت شريان حياه... للتجاره العالميه
والشعوب الاسيويه... ولاوروبا وشرق اسيا
والتجاره الامريكيه... قربت مسافات وهي
بالاضافة لأهرامتنا... أكدت للدنيا دورنا
فى الحضاره الانسانيه... واللى كانوا هيخطفوها
واللى كانوا هيبعوها... واللى ناويين يشتروها
وطنوا الارهاب يقلل... من قيمتها وحقروها
لاجل لما يقدروها... تبقى فعلا ما تساويش
شعبنا فهم المؤامره... قال لهم تخطيطكوا فاشل
أرض سينا امن قومى... أمن شعب وامن جيش
أما انا حذرت مرسى.. قلت له اقبل نصيحتى
قلت له ولا جوبونيش... والصالون البحرى حذر
الحكومه فى عهد مرسى... من سنه قال ما تبيعيش
لاالقناه ولا حتى مينا... القناه فى ايدين امينه
والرئيس السيسى بدد حلمهم... أصبح مافيش
والأمل فى الله وثم... فى الفريق مهاب مميش
دوره فى التنميه يبنى... يبنى عالشطين مخازن
كونتنر والترسانات... والمصانع والتجاره
والمزيد م المشروعات... تبقى مركز خدمه برضه
للسفن والتموينات... تبقى للدعم اللوجستى
جاذبه للاستثمارات... كل دا من توجيهات
الرئيس السيسى صمم... والجميع خد تكليفات
القناه تصبح لسينا واهلها...مصدر نماء
والشباب تكمل مسيرته... للحضاره ولانتماء
يبتكر اساليب جديده... غير جدودنا والاباء
يبنى مصر بشكل تانى... بالعزيمه والتفانى
بالعمل مش بالامانى...يصحى تانى الانتماء
برضه ينقصنا الاراده... والاراده فى القياده
والرئيس السيسى قالها... قال نشيلها فوق كتافنا
واحنا شوفنا... لما زارهم فى المواقع
قبل خمسه الصبح زارهم... كل معاهم داق فطارهم
راح يقوى فى الاراده ... قال لعمالنا يا ساده
العمل زي العباده... احنا عاوزين مصر تنهض
تستعيد عهد الرياده... والرياده يعنى كل الناس تعيش
واللى شفته وزاد سرورى ... الفريق مهاب مميش
بعد اخذ التوجيهات... خد اشارة البدأ فورا
ابتدا فى التجهيزات ... وابتدى تجهيز موانى
فى القناه حتى العريش... وابتدت شركات توسع
فى القناه بقناه جديده... هي دى النهضه الجديده
نهضه عظمى يقودها جيش... والرجال المخلصين
تبنى فى كل اتجاه... فى الزراعه والصناعه
نحمى مصر من المجاعه... والشباب يثبت وجوده
كل وقت وكل ساعه... هو دا طوق النجاه
والرئيس السيسى لما... روحنا فوضناه شكرنا
واستعان بالله وقالها... احنا مش ممكن نعيش
عالشحاته والبلاده ... او نقول لله ولكن
قال لنا كله انتباه... مصر قوه وقوه عظمى
مصر اقوى من الطغاه... اقوى م الارهاب واقوى
اقوى من كل الغزاه... مصر دى ام الحضاره
مصر للعالم مناره... من يوميها واحنا قوه
يد واحده وكلمه واحده... كله شعب وجيش وراه
نستفيد بمقدراتنا
والقناه.... هيا النواه
- See more at:
http://almashhad.net/News/801053.aspx#sthash.9QxSJRAG.dpuf