رباعيات في مدح الحبيب المصطفي زهرة وابو حسام

حبيبي كما البدر ف السما عالي ومنور
الاسم محمد شفيع الخلايق والعين بتدور
علي يوم اللقاء وياه ...... وزيارة الغالي
اطوف البيت والبي ...يشرح القلب وينور
لانه غالي عليا وف القلب ساكن ومتمكن
طالب شفاعه منه وللزيارة متمني بقول يمكن
دعوة حبيبى ف يوم تناديني تجلي الهموم وتعمر
وعجبي،،،،،،
=====ابو حسام =====

روحى فداه والقلب والننى
وليا مين غيره فى الدنيا يطمننى
وبكف ايده الشريفه اشرب من الكوثر
غاية مناى رضاه بالتقوى يارب جملنى

حبيبي يارسول الله وليك انا مشتاق
ليك ف القلب مكانه مليانه بالاشواق
نفسي ازورك سيدي واتملي انا بنورك
اكفف دموعي والملم وافوق انا العشاق

قلبك دليلك يا مؤمن على حبه بيدلك
بهداه تنور طريقك وبيه يزول همك
دا اللى ما شاف الحبيب مضاقش يوم فرحه
صلى على كامل النور تلقاه كتير جنبك

صلي عليك الله يا غالي علي قلبي
وسلم وبارك عليك ياساكن هنا ف قلبي
بعيني لم نظرتك يوم لكن حبك بيكفيني
اتمني اللقا وارتاح لو مرة تنظرك عيني

طه حبيب القلوب الرحمه عنوانه
لو نظرك كحيل العين تلاقيه يا حنانه
الوصف كامل مكمل للجروح شافى
طب الاطبا الزين فى الكون يا جماله

لاسم احمد والمصطفي ومحمود
ومحمد نبينا ختامه مسك وعود
يانبينا الزين صلي عليك ربي
يا خير البريه وشفيعنا يوم لا نعود [ يوم لا رجعة فيه]

نور على نور حقيقة نبينا طه الزين
بعثه الاله للأنام يهدى السليم والشين
قال له الهدايا منى وانت عليك البلاغ
يوم الزحام مين غيره شفيعنا مين

المولي اصطفاه من البشر نبي لينا
بالحكمه والسُنه وعلي نهجه كده مشينا
المصطفي محمد حبيب القلوب وطبيبها
يارب تقبلنا ويوم العرض يكون شفيع لينا

جانى الحبيب فى المنام والعقل طار منى
العطره فاح منه بالبسمه طمننى
سالت دموع عينى بالفرح ناجيته
هام الفؤاد فى هواه والكلام تاه منى

يا بخت اللي الحبيب في المنام ياجي ويزوره
يشوف المصطفى بدر ومالي المكــــان نوره
اتكتب لك وجاتك يا غالي من العالي
يارب توعدنا ما تحرمنا تجعل فى القلوب نوره

شوق القلوب سر الوصول للجناب عالى
واللى يروم القبول يقدم المهر غالى
روحك فى كفك بصدقك للحبيب تهدى
بعد الرضا والقبول ايه راح نعوز تانى

اسمه محمد صلوا عليه جمله يا حاضرين
دي حلوه صلاة النبي في قلوب العاشقين
تخلي القُليب ينشرح ويضحك مع الايام
كفايا شفيعنا النبي عليه صلوا يا موحدين

ازكى صلاة وسلام ع النبى العدنان
بعثة نبينا محمد هدية م المنان
يجرى اللسان بالذكر ويصلى بالفرحه
طب القلوب يا محمد فى سائر الأكوان

قالوا عنه صادق ولقبوه اهل مكه بأمين
ابو بكر كان صاحبه وكانوا سوا الاتنين
في الغار والمولي سبحانه نجاهم
والعنكبوت عشش والحمام غطا هم
ما تسلموا بقي وصلوا عليه ليوم الدين

ثانى اثنين ع الطريق وكان الغار مأواهم
ومن شر الكفار والمكايد رب الكون نجاهم
وسر إرادة الإله بتستر بعنكبوت وحمام
تاهت خطى الكفار وعن نبينا ربك عماهم

خاف علينا النبي وقال بصوت الادب والهمسه
لطفك ياربي لامتي وصلت الصلاة لخمسه
شفيعنا يوم القيامه من بين الرُسل محمود
بصلي عليك في جهري وفي صمتي وبالهمسه

قال امتى يارب م المحنه نجيهم
واسمح يارب بشفاعة لى امل فيهم
صدق اللى قال ع الحبيب الرحمة المهداة
رفع ايديه بالدعاء م الفتنة تحميهم

بناجي طيفك يا حبيبي زي القمر في علاه
وفي الخيال انا شفتك بدر فالسما ونجم ما احلاه
اعلي من كل البشر والمولي راضي عليك
حبك يامحمد في قلبي سكن والله ما اغلاه

عين الحبيب رقرقت وقال مشتاق لأحبابى
نظروا اليه الصحابه قال انتم اصحابى
حبايبى سمعوا عنى ومن غير شوف حبونى
فى اخر الزمان يتمرغوا على ارض اعتابى

في عز الليل والعقل سارح فيك
والقلب هايم والفكر مشغول بيك
اسمك محمد يا طه يا خير البريه
لو سكت لساني القلب يصلي عليك

القبة لاحت فى قلبى والعقل فيك شارد
اشرق يا نور القلوب والإيد اليك مادد
تلثم يمينك شفايفى والجسم بيقشعر
غاية منايا يا طه واكون شاكر حامد

في ذكـــــر المصطفي حبـــي وشوقي غلبوني
امدح فيك طول الليل ما انت الـــــضي لـــعيوني
غالي ومقامك عالي وفي القُليب مـــــــــــوجود
روحــــي وفـــؤادي اليك قـــبل الـــجسم سبقوني

تاهت الأرواح منا دكت الأشباح فينا
طار العقل منا يجرى اين ركب السائرينا
اين هاتيك المطايا للوصول لروض احمد
كيف لى ارقى سبيلا فى رحاب الزائرينا

اااااااااااه وحرقة الاه والشوق اليك غلاب
الصلاه عليك من القلب تمحي نار وعذاب
بتــــمني يــــوم اللقا وطــــــال عليا الليل
من كتر شوقي في حبك القلب مني دابـــــ

لجذع حن ومال وبالأنين صرح
سمع بكاه النبى مين غيره كان يلمح
طبطب عليه هداه وللقليب ضمه
ادفع حياتى يا هو والقلب له يرمح

بمدح في النبي ويا مين يصلي معايا عليه
يخلي الليله تنقضي بنور يكون حواليه
ياسعده ويا هناه اللي يزوره لو مره
يصلي في مسجده يـــــرد نبينا عليه
ما تصلوا بينا يا قاعدين وزيدوا النبي الف صلاة عليه

ماشاء الله عليكم
ايه الجمال ده كله ؟
عليه افضل الصلاة والسلام

عليه افضل الصلاة والسلام
يارب ينفحنا بطيب وصله صلى الله عليه وسلم

» القصيدة التي أبكت الحبيب المصطفي عليه الصلاة والسلام
» يا زهرة يا زهرة يا بنت نبينا بصوت الدكتور عبد العزيز سلام
» بيجو وابو لمعة حلاقييين
» اشتباكات بالأسلحة بين الحجيرات وابو دياب
» نميم الليثى وابوحسن وابو خلف وطبل الرجوج