يا عين / بقلم الشيخ محمد عبد القادر

يا عين / بقلم الشيخ محمد عبد القادر
لما قلت يا عين جفانى الناس واتفرقوا عنى
وسيبونى وحيد معزول انا وفنى
وقالوا إياك تقول غير اللى إحنا بنقوله
حجر بناه الجدود ومن الصعب تحويله
أنا نويت الفرار من متحف التحنيط
اشباه بشر لا هم لابسين عمم
ولا لابسين برانيط
أنا قلت يا عين لما الليل كان نايم
وهل وفد العيون والوفد كان فاهم
قاللى كبير العيون انتوا ظلمتوا العين
والعين اساس الحياه ومن غيرها تروحوا فين
نويت نصر العيون وعيونى دلونى
وعلشان حب العيون حبست الشمس ف عيونى
ف نوح عليه السلام لما نفتكر عصره
كانت السما والعيون اجناد فى نصره
ظهرت عيون المها سحرت عقول وقلوب
خلت حكيم الزمان يقرا الوقت بالمقلوب
شفت العيون الكثيرة لكن مشفتش عين
تقرا جمال العيون فى حمرة الخدين
واجل ما فى العيون قالوا عيون البصائر
مخصوصة للعارفين والأولياء الأكابر
أنا عاشق العين لو كانت رسول قلبى
تقرب البعد تجمعنى انا وحبى
وكاس حبى أشربه وأملاه
وفى صحو سكرى انا المجنون اقول الله
يارب تكشف غطا عينى
علشان تذكر وتشوف كل الكون جنب الكبير اصغر
أنا قلت يا عين زى ما قلت يا فراج
العين غنية بنورها وانا اللى لضيها محتاج
يا بايع الكحل كحلك مش دوا للعين
دواها نظرة لحبيبنا أكحل العينين
واقول يا عين واقول يا عين
وأصلى على عين الوجود ألفين