قصيدة حلم للشاعر /عبد الفتاح عبد الشافى /والفائزة بجائزة التميز

(( حــــلم ))
**********
*****
***
**
*
حلم
قال شُفت خيــر
وكأني جنب المزلقان
وبفتكر أيام زمـــــــان
لما كان الكُل راضي
لما كان الكوبري فاضي
وجنبه كان قُله وزِيــــــر
أنا شفت خيــــــر
بصيت بِعيني مِن سُكات
والقطر كان عدّا وفــــــاتـ
شفت زحمه وناس كِتيــــــر
ناس بتمشي . وناس تطيــــر
وناس معاها عربيات
وماسكه فـــ ايديها حاجــات
سألت قالوا ..الانتخابات
أنا قلت خيـــــــــــر
والبلد عاوزه كِتيــــــر
يا أهل دشنا والقري
ياهل النجوع الطيبيــــن
عاوزين شباب متنوريـــــن
علي الأصول متربيـــين
وفــ العلوم متثقفــــين
وللبلد متحمســـــين
للخطــر متنبهـــــين
ومش مهم يكونوا ميـــن
من دشنا كان ولا النجوع
أو القري ولا الربـــــوع
أو اسم عيلته يبقي ميـــــــن
أبوه لوا ولا غفير
وأهو كله خيـــــــــــر
المهم بناء بلدنــا
دشنا مستقبل ولادنا
وزي ما الريس وعدنا
يد واحده وإيد فــ إيد
العمل هيزيد أكيد
والبرلمان هيكون كبيـــــــــر
اللعبه مش فتّــــة فطيــــر
وأهو كله خيــــــر
ناديت لحمدي وريم وغاده
ومينا وعليوه وحمـــــاده
وقلت شوفوا واسمعوني
إختاروا صح ومتخافوش
وع الاسامي متسألوش
وع القديم متنوحوش
لجل تاني متندموش
وبلاش مجامله بلاش خساسه
بلاش عِماله بلاش خباثه
ثورتنا قامت ع الوراثه
والمصري كان ملهوش نظيــــر
كان كله خيـــــــــر
عاوزين جدع مِش كُبّانيه
متكونشي عيلته عُصبجيه
ميكونشي واسطه لبلطجيه
أو مستغل لِفرن عيش
أو مغتصب أرض الحكومه
وكل يوم يعمل عزومه
واحنا مش لاقيين نعيش
شكله ايه أو عيلته ايه ميهمنيش
المهم يكون ولد
في الحق عمره ما يختشيش
ويكون له هيبه في الكلام
ويهز صوته البرلمان
حتي لو وِسْط السعير
وأهو كله خيـــــــــر
يعرف بلدنا عاوزه إيه
يعرف ولدنا إسمه إيه
دشنا مش استاذ وبيه
دشنا مركز..دشنا قريه ..دشنا نجع
دشنا أمي ..دشنا أمك
دشنا بيت لِلّي مداريه
إتوحدوا علي قلب واحد
وبلاش تخلوا فــ وسطكم ناكر وجاحد
دا وجوده بينا شئ خطيــــــر
هتلاقوا خيــــــر
وقعدت أقول هتلاقوا خيـــــر
واضرب بِإيدي ع السرير
وصوتي كان زي الهدير
صحيت مراتي والعيال
أتاريه دا حلم من الخيال
وقالوا لي خيـــــر...خيــــــر ...خيـــــر
************
عبد الفتاح

» جائزة التميز للاستاذ /عبد الفتاح عبد الشافى من مشروع بناء دشنا الحديثة
» مفاجأة / قصيدة اهداء الى سيدة القصر على اليوتيوب /عبد الفتاح عبد الشافى
» مباركة خاصة للاستاذ عبد الفتاح على جائزة التميز
» المستحيل \ عبد الفتاح عبد الشافى
» ومضات شمس/ عبد الفتاح عبد الشافى