حملة ضد الغش فى الثانوية الأزهرية

(الساكت عن الحق شيطان اخرس )
الى كل طالب مجتهد الى كل ولى امر قد بذل جهدا مع اولاده اذا لم نتحرك الان ونبذل قصارى جهدنا لمحاربة هذا المرض الخبيث وهو الغش فسيضيع مجهود كل طالب مجتهد ومجهود الآباء المطلوب هو القضاء على هذا الوباء الذى اصاب الازهر كل من ناحيته اطالب الطلبه برفض الغش وتقديم الشكاوى واطالب اولياء الامور بارسال تلغرافات وشكاوى الى شيخ الازهر مباشرة والى كل من بيده المسئولية
لاللغش
لاللغش

[b]

طيب يا استاذ سليمان ومابالك بالكتابة على السبورة للطلبة فى الازهر

يعنى غش بالعافيه والاكراه

ضاعت المستويات ...وضاع الفارق بين المجتهد والمتكاسل

والنتيجة خريجى ازهر غير مؤهلون

ما يفعله شيخ الازهر فى الدفع بدور الازهر وجامعاته الى الامام فى تحدى للعالم كله

يسقطه مسئولى الازهر فى الادارات والمراكز والمدن بهذا الفعل الشنيع

وما يزيد الطين بلة لجان التفتيش تتقاضى رشاوى جبرية يجمعونها من الطلبة والطالبات

بدعوى ثمن رقم الجلوس ... وهل ثمن رقم الحلوس اصبح خمسة جنيهات اجباريه على كل طالب

وهل كبار المسئولين على علم بما يحدث من فوضى الامتحانات

شيخ الازهر الله يعينه بيحارب فى جبهات كثيرة لكن اين الباقون افلا يتقى الله من اعطاه سلطة فى اى مكان ازهرى

وان يعتدل الميزان كنوع من المساهمة مع شيخ الازهر فى استعادة مكانته واشراقه

ارجوا ان يكون هذا الموضوع مفتوحا لجمع كافة المعلومات والآراء

السلام عليكم ورحمة الله وبركاته

يوميات مدرس فى الامتحانات
' ركبت السيارة كالمعتاد وعقلى مشغول بما سيحدث اليوم فنحن كل يوم فى لعبة القط والفار . وصلنا اللجنة بحمد الله وقابلنا رئيس اللجنة بابسامته المعتاده وقال لنا كما يقول من اول اللجنه ( كل واحد فيكم حر فى لجنته )
ولك ان تفهم المعنى يعنى تظبط نفسك يغشو من بعض ماشى حد يمليهم ماشى لو اضطر الامر لكتاب ممكن نفكر هههههههههههههههههههههههههههههه
المهم دخلنا اللجنة واكرمنا الله بمراقب دور امين متدين يحب الازهر ( يحارب الغش ) فكانت سعادتى كبيره بدا الطلبه فى الكل وطبعا لم يكفو عن محاولات سرقة كلمه من هنا جملة من هناك وانا وزميلى نحاول بشتى الطرق منعهم مع الحفاظ على الهدوء الا انه فى لجنة الادبى كان الامر مختلف سمعت اصوات عالية وبعد انتهاء الامتحان سالت زميلى عما حدث فاخبرنى بالاتى

هناك طالب طلب ان يشرب فشرب ثم طلب ثانية ان يشرب فجاوا له بماء فشرب ثم طلب ثالثا ان يشرب (شكلها غلاسه صح ) وبعدين طلب شاى فجابوله شاى المهم لما فشل فى عمل ذعر فى اللجنة قال عايز اسلم الورقه ونصف الوقت ماانتهاش قالوله لما نصف الوقت يخلص قام وقف وبدا يتكلم بطريقه مش كويسه فمراقب الدور طبطب عليه وقاله اقعد يابنى حل فلما انتهى نصف الوقت خرج الى بيته مباشرة واخبر والده ان مراقب الدور ضربه فجاء الاب مسرعا الى اللجنىه حاملا سيف الانتقام وشتم وهدد كل من كان فى اللجنه وطبعا مهما يفهمو فيه هو طبعا مصدق ابنه الا ان موجها رد عليه بطريقه شديده فتوقف عن السب وكان السؤال على كل الاذهان ( ماذا ينتظرنا خلف الاسوار ( سنج - مطاوى - طوب ) توكلنا على الله وخرجنا لنركب السيارة عائدين الى بيوتنا وفى الطريق وجدنا والد الطالبب ومعه اثنات وقام بالاعتذار لمراقب الدور ولمراقبى اللجنه وقال ران ابنه مثل ابنهما (طامعا فى ان يكون الغد افضل من اليوم ) فهل ياترى هل سيظل هكذا عندما يعرف ان ابنه لم يغش اليوم التالى
هذا ما سنعرفه فى قصة الغد ان اكرمنى الله ونجوت من معركة الغد والا فاسلو لى الله ان يتقبلنى فى الشهداء
[b]

قصة طريفة من دروب الخيال دى يا استاذ سليمان ولا ايه

يا نهار اسود على العيشه اللى بالشكل ده

الدنيا صارت بالمقلوب

واصل يا استاذ سليمان عايزين نسمع

مسالة ضغط الشيخ والمدرسين من اجل الغش مساله متكرره وقد حدث معى ذلك فى بداية تعيينى وفعلا كنت اظل طول اليوم احس بالذنب الا اننى ذكرت نفسى بان رضا الرب مقدم على رضا العبد ربما يغضب البعض فسيكون هذا الغضب ظاهريا اما من الداخل فسيكنون لك الاحترام وان لم تعبر عنه الالفاظ ( فى يوم من الايام قابلت طالبا كنت ادرس له فى الصف الثانى الثانوى سلم على لكنى لم اتذكر اسمه فذكرنى بنفسه وقال لى 'عندما كنا فى المعهد كنا لانحبك لانك كنت تمنعنا من الغش لكن عندما دخلنا الجامعه عرفنا انك كنت تفعل الصواب وعرفنا ان من كان يغششنا هو من كان يضرنا ' مارايك فى هذا والله لقد غضب منى اقاربى غضب منى زملائى حتى اصدقائى خارج العمل اقصد من كان لهم ابناء ولم يغشو الا انهم الان يكنون لى كل احترام وايقنو ان هذا مبدأى ولن يتغير فاصبرى واحتسبى وعلها تكون البداية
ولنا قول القائل
سئل الحق يوما ' أين كنت حتى تعالت شجرة الباطل ' قال ' كنت فى باطن الارض أجتث جذورها'

القصة حقيقية وقد حدثت فعلا فى الامتحانات الماضية

السلام عليكم ورحمة الله وبركاته
اليوم احكى لكم ماحدث اليوم بعد ان عدت سالما والحمد لله
كالمعتاد وكما ذكرت فى القصة السابقة استقبلنا مسئولو اللجنه بترحيب متمنين ان يكون اليوم افضل من الامس يعنى (المفروض نبحبحها شويه ) مع ان العملية شكلها اكتر من البحبحة اخذت لجنتى وكلما مررت على لجنة اشعر بدعاء الطلبة ( يارب ميكونش علينا ) ولما اعدى احس بيهم بيقولو الحمد لله ( ربنا ياخده ويريحنا منه ) المهم دخلت لجنتى وكانت ادبى وزعت الورق وبدا طالب يتحدث عن حكاية الامس ويقول مراقب الدور امبارح ضرب طالب قلتله يابنى دا كان بيطبطب عليه غريبه اوى اليومين دول لما المدرس يطبطب على الطالب يبقى ضربه اما لما الطالب يشتم المدرس ويمكن يضربه كمان يبقى صاحب حق ( الفين خساره على التعليم ) اه نسيت اقولكم مراقب الدور اللى ظبط اللجنه امبارح كان احتياطى انهارده ( اصلة اخل بالنظام امبارح لما منع الغش) وبسرعه كما يحدث كل يوم الشاى جه بسرعه وطبعا زى مابيحصل كل يوم بنقولهم شكرا لاننا بنشترى فى كل لجنه الشاى والسكر من معانا لاننا عارفين الشاى بتاع المعهد بييجى منين ( ؟؟؟؟؟؟؟؟؟) فكروا انتو فيها المشكلة ان الطلبه فى اول ربع ساعة طلعو (البرشام ) ملخصين الكتاب بتاع المنطق احلى تلخيص والله لو استغلو الوقت ده فى المذاكره كانو نفعو ; خدت منهم البرشام ومرضيتش اعمل حاجه اكتر من كده ومع ذلك زعلو واعتبرونى من اعداء النجاح وظلت نظراتهم طوال اللجنه مختلفه عما سبق نظرات حقد ربما تهديد اما الطلبه المجتهدين فكنت ارى فى عيونهم السعاده وكأنهم يقولون (برافو عليك يا مستر ) . انتهى الوقت بسرعة اصله ساعة ونصف انهارده سلمت الورق لمراقب الدور واسرعت خارجا من بوابة ( السجن ) اقصد المعهد
متمنيا الا اعود اليه مرة ثانية.

السلام عليكم ورحمة الله وبركاته

ها قد اتى اخر يوم فى امتحانات الثانوية الازهرية وكلنا عارفين ماكان يحدث فى يوم المستوى الرفيع من غش وكتب وبرشام وطبعا مش هقدر احيلكى اللى حصل جوه اللجان بالتفصيل لانى بقالى فترة احتياطى لأنى من اعداء النجاح ................... اقصد اعداء الغش لكن زملائى يعنى بعضهم مش هقول كلهم حكولى عن كمية الكتب والمذكرات اللى طلعوها من الطلبة وفيم ناس منعو الغش فى لجانهم

المهم اللى عايز اقوله

ياجماعه اهو انا مغششتش ومش لوحدى فيه غيرى مغششوش والحمد لله منسخطناش قرود ولا ودونا مشتشفى المجانين ولا قطعونا بالمطاوى او ضربونا بالجنازير حتى لو كانو عملو كده كنا هنحتسبه عند الله وكلنا فداء للازهر اللى للاسف فيه ناس كتير ميعرفوش قيمته بس فيه فرق بينا وبين الجماعه اياهم احنا طالعين مرفوعى الراس لاننا لم نذلها لغير الله اماهم فاعتقد انهم اذلو انفسهم لمجموعه من الحثالة الفاشلين واناشدهم ان يراجعو انفسهم ويتوبو ا ويعقدو العزم ان يناضلو ا معنا لاصلاح الازهر .

الله اكبر ويحيا الازهر

هذه كانت بعض مما حدث معى فى الامتحانات الماضية

دا كدا احنا عايشين في زمن اغبر والله
شكرا استاذ سليمان لجهودك معنا
وطرحك للموضوع فهو يحتاج عدة مناقشات

لي عوده اخري للموضوع ان شاء الله لكي نتحدث بأستفاضه اكثر من ذلك

يا استاذ سليمان ما يحدث اكثر من ذلك
من الابتدائى للثانوى وعلى مرئى من الجميع

لكن لن نستسلم وسنواجه الفساد فى كل الجهات واولها الازهر

واصل كلامك

شكرا اخى سليمان على فتح هذا الملف الهام ونتمنى ان يتم التحقيق

فى مثل هذه الامور حتى نتخلص من كل الفساد الموجود فى كل

المؤسسات وخاصة المؤسسات التعليمية والتى من اخطرها الغش

والدروس الخصوصة .

دى حكاية الأستاذ رفيق كتبها على صفحة الحملة على الفيس بوك
رفيق محمد احمد
هذا كل ما اتمناه ولكن المشكله تكمن فى بعض المعلمين معدومى الضمير لقد ذهبت الى رئيس التفتيش نفسه وحضر الى المعهد وكا ن طلبى هو ان كل تلميذ ياخذ حقه كانت النتيجه ان المعلمين بالمعهد قاموا بكتابه الاجابه على السبوره واجابوا على كل الاسئله حتى الملغيه وقالوا لى بالحرف لو جيه شيخ الازهر حنعمل اللى احنا عوزينه وتخيل تلميذطالع الاول فى الترم الاولبسبب الغش لا يحصل على ترتيب واخر كانت درجته 20من50 بالغش تكون 50من50فى الترم الثانىوكل هذا فى الابتدائى وعندما طلب ابنى عدم الغش فى اللجنه كان نصيبه الاهانه والسب والطرد من اللجنه قبل مرور ربع الوقت

اصعب ما يواجه الطال المتميز

ان يرى مظاهر الغش من حوله

وماواته بمن اقل مستوى منه

وضياع جهده امام سيل الغش العارم

شىء مؤلم لا يستشعره الا المجتهد

شاركونا فى حملتنا على الفيس بوك

لمحاربة الغش فى الأزهر

https://www.facebook.com/pages/%D8%AD%D9%85%D9%84%D8%A9-%D8%B6%D8%AF-%D8%A7%D9%84%D8%BA%D8%B4-%D9%81%D9%89-%D8%A7%D9%84%D8%AB%D8%A7%D9%86%D9%88%D9%8A%D8%A9-%D8%A7%D9%84%D8%A3%D8%B2%D9%87%D8%B1%D9%8A%D8%A9/147629295309119

» الدكتور الطيب يلغى إمتحانات الثانوية الأزهرية فى القرى
» عاملين حملة للدعاء على موظفين الكهرباء فى دشنا ..وانا هعمل حملة للدعاء على موظفين الميه كمااان
» نظارة الغش!!!!
» الثانوية العامة سنة واحدة من العام الدراسي المقبل
» جدول امتحانات الثانوية الازهرية للعلمى والأدبى