ياللا نجيب فى حاجات رمضان /زجليات رمضانية

يلا نجيب فى حاجات رمضان
التلاجه عايزه كمان
والمطبخ فاضى وقلقان
محتاج اكل اشكال والوان
وف رمضان الكل جعان
مابيقبلشى بغير اطنان
تملا البيت والمعده كمان
ياكل لما يقول تعبان
ايه معنى صايم رمضان
يعنى تجرب الحرمان
تيجى تتقرب م الرحمن
يعنى تحس بحد جعان
وتجرب ظمأ العطشان
يعنى تعود روحك تدى
مش تكنز وتبات شبعان
يلا نجيب ف حاجات رمضان
عامل كشف طويل علشان
نملا السفره اشكال والوان

منقوول

حضرت طاقيه وسبحه
جبت مصليه وطرحه
وعزمت النيه خلاص
ح ابعد عن كل الناس
وح اصوم وح اصلى بأخلاص
مبقاش غافل ولا بكاش
ولا حيروح الشهر بلاش

ياعم الصلاه مش بالسبحه
والصوم ده نيه تكون واضحه
حدش ح يبص عليك
غير اللى مصوّر فيك
ح يشوف اعمالك وخصالك
عارف عنك اللى ف بالك
يعنى لاجلبيه ولا مصليه
ولا سبحه وعمّه وطاقيه
ربك عارف ايه النيه
ومعاك على طول انت وهيه

التليفزيون جهّز شياطين
حيحارب بيها البنى ادمين
ويادوب يفطروا
يفضلوا قاعدين
قدام الشاشه بغرا لازقين
وكأن لاصلاه ولاصوم ولادين
ولااهل السما مستنيين
يكتبوا حسناتكوا فى غمضة عين
اوعوا الفوازير تغلبكوا
والشاشه تملا حياتكوا
فيه رب كمان لوجودكوا
سخراشياء لراحتكوا
له حق الطاعه عليكوا
قبل القيامه وموتكوا

بكره ح اصوم
وافضل نايم طول اليوم
عند المغرب ح اصحى واقوم
علشان لااعطش ولا اتعصب
ولا استنى المدفع واغضب
ولا احس بجوع جامد واتعب
.....

مين قال صايم يعنى تنام
وتفرط فى طاعات رمضان
امتى ح تقرا ف القران
امتى تصلى فى كل آذان
وازاى يبقى الصوم دا حلال
وانت فى نومك كده غرقان
فكرك اجرك م الرحمن
ح يكون كامل لو هربان
او متعصب او زهقان
او متكدر او قلقان
صايم غصب وصوم زعلان
الصوم جنُه
يعنى وقايه
بيقرب رجليك م الجنه
وبيعمل للاخره حمايه
اوعى تفرط فى رمضان
فرصه اتقرب م الرحمن

شباك مطبخنا
اللى مدوخنا
ف اول يوم رمضان
من اول يوم
تقليه وتوم
ولسه الباقى كمان
ياخوانا حرام
الدنيا صيام
والعالم كله جعان
وجيرانا تقول
طابخين على طول
والريحه بطول فدان

هنا شامم طاجن باميه
ورقاق م الناحيه التانيه
ممبار بالصلصه الحاميه
والضانى فى شقة ساميه
طلعالى الريحه كباب
وسمك من عند الباب
ودا غير طشّت ملوخيه
من اول يوم دا عذاب
ياجماعه الشهر طويل
وانا عقلى كده ح يطير
صايم وطبيخكواكتير
الرحمه اعملوا توفير
يجعل ايامكوا بخير

كام ساعه صيام
وجعان عطشان
وقلق ومرار
الاكل يكفى والاقى فطار
واشبع واحلى واطفى النار
وفضلت انقى واسيب واختار
وسمك وفراخ
ولحوم وخضار
ويادوب سميت
بعد ماصليت
بصيت للاكل كده اتخضيت
ايه كل دا وحيروح على فين
وكأن دى سفره لاهل الصين
مع شربة ميه
هما بلحتين
وشبعت تقول واكل خاروفين
يعنى الاصناف دى فراغت عين
كلها اسراف تخاريف صايمين
والعاقل لازم يبقى امين
يتصرف زى البنى ادميين
رمضان مش اكل كتير وخزين
رمضان ده شهر بيحيى الدين

مجموعة جميلة جدا من الزجليات الرمضانية

وانتقاء جميل كالعادة .شكرا ام شروق على

هذه المجموعة الجميلة من الزجليات الخاصة

بشهر رمضان وعلى الانتقاء الجميل

شكرا سعيد

والشاعر وصف حالا قائما للسلبيات التى نريدها ان تنمحى فى رمضان

» ياللا نراجع حفظ القرآن فى رمضان
» زجليات رحال
» زجليات ممتازة للشاعر للدكتور/ صلاح عبدالله
» حاجات يامه
» ياللا ناكل