ع الأصل دور\بشير عياد

ع الأصلِ دوَّرْ "

وشوفِ الأصل مِين أصلُه !!
واحسِبْها بالعقل
واعرَفْ معدنه وْفصله
تعرف طريقك
وتمشي لآخره وتواصْلُه
إيَّاك تُغرَّكْ مظاهرْ تنخَدعْ بيها
وِتْصدَّق الكدَّابين
في حاجات تضيعْ فيها
صدق اللي قال قبلنا
" إللي اختشوا … ماتوا " !!
" والنّدل مهما عِلِي …
ينضَحْ عليه أصلُه "
ـــ
" عَ الأصل دوَّرْ "
وشوف مين اللي أولى بيكْ
يكون مِرايْتَكْ
وقلبَكْ
ومُهْجتَكْ
وعْنيكْ
يفرح لِفَرْحَكْ ،،
وساعةْ شِدّتكْ يواسيكْ
ويقاسْمَكِ الصَّعْب ،
ويشارْككْ في أحْمالَكْ
ويشيلْ همومَكْ
ويصبحْ حالهْ مِنْ حالَكْ
كأنُّه إنتَ ،،
يصونْ عِرْضَكْ
يصونْ مالَكْ
وتلاقي عُمرُهْ شموع ..
ويَّاكْ في طول لياليكْ
ــــ
" ع الأصل دوَّرْ "
وإوعى تْصاحبِ المَنَّانْ
طمَّاعْ
وقلبُه حسودْ
وكمان بألف لسانْ
يضْحَكْ في وشّكْ
ويتكلِّمْ عليك في كُلّ مكانْ
يِظْهِرْ لك المَسْكَنَة
يبكي بْخجلْ وكسوفْ
وتْلِيْقْ عليكِ الحِيَلْ
وتْقابلُه بالمَعْرُوفْ
وفْ لحظةْ يِقْلِبْ عليكْ
عَلَنًا
وعَ المكْشوفْ
ويدوسْ عمايلكْ وينسى الفضل والإحسانْ
ـ
" الناس معادن "
ولا زيِّ اللي قلبُه رحيمْ
الرحمة بَلْسَمْ حنان ،،
وشعورْ مثالي عظيم
بيهدهدِ المجروحين ، ويطمِّن المظاليم
ويطوف في ليل الحيارى بالأمل ويدورْ
ف بحور معانْدة
وْرِياحْ
فيها الشراع مكسورْ
ينزل سَكِينة وْأمانْ ،،
الليل يعوم في النورْ
والفجر يسبق معاده
والشروق تقاسيمْ
ــــ
" عَ الأصل دوّرْ "
وخلِّي الأصل ميزانَكْ
وصونْ معاني الأدبْ
تلقى الأدبْ زانَكْ
ويعلا شانكْ ،،
يضحِّي الكلّ علشانَكْ
وانْ كنت جادّ وْأصيل
ح يبان بأعمالَكْ
وصنع إيدك يكون من قبل أقوالك
وخلِّي صدقك يشعّ النور في أوْصالَكْ
ح تبقى قدوة وْمَثَلْ
بعَطاكْ وإتقانَكْ
ــ

كلمات جميلة جدا ورائعة من الشاعر بشير عياد وفعلا

عالاصل دور وصاحب الاصيل دايما يصونك ويكون

لك صديق واخ ولكن تصاحب الندل هيضرك وهتشوف

فى صحبته ما لايسرك ويتعبك ويعلك . شكرا ام شروق

على نقل القصيدة الجميلة للشاعر بشير عياد

» عزف منفرد \ بشير عياد
» خاااايف\بشير عياد
» الليل\بشير عياد
» يا تأسيسية يا \بشير عياد
» من رباعيات الشاعر بشير عياد