لحظات مع مصطفى حسان

البحر ما بيكلمش حد




هاتصدقي لو قلت لِك
كان نفسي اريح راسي فوق صدرك
واعيط

واترمي فـ حضنك وانام ؟!
فعلا غبي

وانا مش هاقول لك ليه غبي
أصل انتي عارفه ان اللي شافك بسمه في الليل الكئيب
لازم يكون انسان غبي
وان اللي يشطب أي حلم عشان يكون فـ عيونك انتي المركبه
انسان غبي

علشان بحبك زي عيل فـ ابتدائي
وأي نظرة من عيونك تقتله
فيقول في أشعار الصبايا
والعيون الناعسانين
المليانين طيبه وشجن
ويقوم يقول لك وببساطه
- ممكن أتكلم معاكي ؟
لو سمحتي؟
ممكن افرد غربتي قدام عيونك
واتسجن ؟

بس انتي فكرتي ان اللي قال الكلمتين
انسان ضعيف

وماتعرفيش

ان اللي قال الكلمتين هو اللي كسّر ألف سد عشان يقول
الكلمتين

البحر زي ما كان زمان
رافض يلم الموج ويسمع غنوتي
يا بحر ليه موجك عنيد ؟
الحزن عمره ما كان كئيب
الحزن موجه عايزه توصل للشطوط
فمتسجنوش

ولو اني برضه بعشقك
علشان ما شفتش موجه بتبص لوره
مع إني ليا عتاب بسيط
بيقولوا إن البحر مليان بالهموم
ويحب يسمع أي شكوى
حتى لو كات من غريب
مع إني مش شايفك كده
أنا حاسس ان الموج غضب
وان انت كاره أي إحساس بالغضب
علشان كده بتحب ترمي الموج بعيد
وعشان كده

انا لما جيت اشكي الهموم
فكرتني موجه

ورحت عملت سد

أتاريك ما تكلمش حد
أتاريك ما بتكلمش حد
شعر / مصطفى حسان

شاعر جميل جدا وكلماته رائعة والقصيدة

الاولى كلماتها غاية فى الجمال والروعة

شكرا ام شروق على الانتقاء الجميل

شكرا سعيد
وساقية الصاوى افرزت لنا العديد من المواهب الجميلة