أحب كرسى الرئاسة موت

أحب گرسي الرياسة موت
أثار إعلان الواد (عوضين أبو ركب) ابن كفر المهياص ترشيح نفسه
لرئاسة الجمهورية العديد من ردود الفعل واسعة النطاق.
فقد أدانت حركة (بعيد عن شنبك) بشدة ترشيح السيد أبو ركب لرئاسة الجمهورية
وأعلن المتحدث الرسمي للحركة بأنه سيطعن في صحة ترشيح أبو ركب
لرئاسة الجمهورية لأنه مزدوج الجنسية ويحمل جنسية بنها العسل إلي جانب
الجنسية المصرية ، ثم واصل هجومه الحاد علي أبو ركب قائلا: وبعدين يطلع مين ده
أبو ركب علشان يرشح نفسه للرئاسة.. ده واد نصاب وحلنجي وهربان من الخدمة
في طوابير البنزين 80 !! وكان زمان بيسرح بعربية بوظة في سوق التلات!!
وبعدين ده ماعندوش خبرة خالص لأنه عمره ما اشتغل قبل كده في أي حتة.. رئيس جمهورية!!
وكمان ده راجل جاهل دا جيرانه بيحلفوا علي الختمة الشريفة انه قبل مايخش علي
الفيس بوك بيقلع مداسه بره علي الباب
ويزعق بعلو حسه ويقول دستور يا أهل الدار!! حد خالع راسه ؟ طيب هو علشان
يعني بقي بسلامته دخل فيلم قصر الشوق زمان وهو عيل بريالة عاوز دلوقتي
يقرطسنا ويخش القصر الجمهوري !! طيب يقولنا هايحل ازاي
النقص الحاد في المعسل اللي بيعاني منه أهل الكفر؟! ، وازاي هايحل الارتفاع الجنوني
في أسعار المارلبورو !! وهايعمل ايه في أزمة اللبان الدكر!! بعد ما اللبان النتاية غزا البلد ؟
وردا علي هذا الهجوم الحاد وتلك الانتقادات بادر عوضين أبو ركب المرشح المحتمل
لرئاسة الجمهورية بعقد مؤتمر جماهيري
حاشد وسط حضور مكثف من مؤيديه وأنصاره وبادر الحشود قائلا: اخواني.. حبايبي
اهل الكفر .. دلوقتي بتوع حركة (بعيد عن شنبك) بيعارضوني.. طيب ليه؟!!
لأنهم مش عارفين تاريخي كويس ومش عارفين اني معايا ماجستير في علوم
المريسة من جامعة احلام الدولية !! وأنا بأوعدكم ان الخير هايبقي للركب علي
إيدي إن شاء الله.. وهعالج عجز الموازنة بالأعشاب الطبيعية علي حسابي !!
وها ألغي الطوابير الاستثنائية للمواطنين المدنيين!! وهبني 4 ملايين قهوة
بلدي وكافي شوب علشان الشباب يلاقي حتة يفرغ طاقته فيها وبكده.. نحل أزمة
البطالة!!
وها أحل أزمة الكورة والتعصب وإن شاء الله جميع المباريات هاتتلعب بدون لاعبين!!
أنا يا اخواني راجل بحب كرسي الرياسة موت.. والقصر الجمهوري اتخلق علشاني..
وبإذن الله لو حطيت رجلي اليمين جوه
القصر واتربعت علي الكرسي.. ناوي أبني عشرة آلاف قصر جمهوري إيواء عاجل
وأوزعهم زكاة عن الكرسي بتاعي !!

منقووول

ايه يازهره الجمال ده

لقيتيه فين الموضوع الجامد ده

والله ضحكت من قلبي

شكرا جزيلا لك

.......

موضووووع مضحك فعلآ ( أضحك الله سنك )

المآسى فى كبسوله مغلفه بالضحك
بيقولوا شر البلية ما يضحك
ولعبة الكراسى الموجوده حاليا ولدت الكثير من السخرية والتهكم فى قالب كوميدى
شكرا ابو جمال
شكرا استاذ احمد