قصيدة (إبليس غرمان) فؤاد حداد (من ديوان رقص ومغنى)

مره واحدْ قال لابوه جوّزني يا بابا، قال له:
يا ابني دا الجواز يكلف كتير، – يكلف إيه يا با؟ قال له:
يكلف سَمْنه ومَمْنه ورزّ ومزّ وجهاز ومهاز، قال له:
خلاص يابا، النصّ بالْنصّ، عليك الرُزّ وعلى المُزّ،
عليك السمنه وعلىَّ الممنه، عليك الجهاز وعلى
المهاز، … إضرب مهماز يا إبليس وغني.
البني آدم يا بتنجانْ
عايز يبقي علىَّ الرز عليه المزّ
علىَّ السمنه عليه الممنه
يعيشْ الدنيا ويضمن جنهّ
بالْمجّانْ
عايز يرجع صبي تلميذ
يمشي يهزرّ مع مزاميز
تضحك في خدودْهم
غماميز
يلبس شجري ويركب
مجرى
عقله الحجرى غوى
التقميز
البني آدم يا بتنجانْ …
شميت قلبه لقيته بارودْ
خدته أشعه طلع نمرودْ
جوه العقده لبد مفرودْ
ولا فلاَّيه رايحْه وجايه
في جبلايه ملانه قرودْ
البني آدم يا بتنجانْ …
أيها فرده عاوزه تعيشْ
تمشي تغني تقول تهويش
وحياة دقني لتصدقني
إبليس عتقي ما رقعنيش
وحياة داءها لتصدقها
وتفرقها من البراطيش
البني آدم يا بنتجانْ …
يا ما شكالي الحما والضُر
كلمني في ينفع ويضُر
بيني وبينه بدرت الدُر
بعد موالسه رفع الجلسه
قال يا أبالْسه خلفا دُر
البني آدم يا بنتجانْ …
البني آدم يا بنتجانْ
عايز يبقي علىَّ الرُزّ عليه المزّ
علىَّ السَّمنه عليه المَمْنه
يعيشْ الدنيا ويضمن جنهّ
بالْمجانْ

منقوووووول

قصيدة (رقصة الجوافة) فؤاد حداد (من ديوان رقص ومغنى)

يا حلو حلوانْ يا جوافة
يا حلو حلوانْ
يا حلو
في ركن حمامْ
شوّحنا الاكمام
وفي درا العينْ
نرمي الدراعينْ
في رجل برجالْ
نرقص بخلخالْ
يا حلو بصحيحْ
نرقص بمراجيحْ
في ودن حلوانْ
نرقص بحلقانْ
مناديَّه
باحب أوزن من ديَّه
والقرش قرش أفنديَّه
آه يا جوافه يا جوافتهمْ
آه يا جوافتى يا جوافتهمْ
في الجو فتنه
وجوفْتنا
ورجعت ملتنا بلطافهْ
ورجعت انادي
من السنه دي
يا حلو حلوانْ يا جوافهْ
والسعد جافي
السعد وافي
السعد جا السعد جا وافي
ألبس في عطفكْ
واشم عطركْ
وانْسي العطور الخوًافهْ
واقول غيتيني ولا غايتْ
وأمدّ برقبتي لغايةْ
ما السمسمه تبقي زرافهْ
يا ميت خرافهْ
قصدك تقول ع العربْيَّه
شفت الجوافه اللعبيهْ
قصدك يا واد تسرح بيَّه
ما اقدرش اهاودكْ
ما قادرش اهادوك
دا انا في هودْج
شفت العروسة المتخترة
وبنت مالْكْ
ساحْره الممالْكْ
يا ابو الفوارس يا عنتره
وسيف يماني
لمَّا انْ رماني
لمت جروحي المبعتره
سباني وشمكْ
من تحت خشمكْ
يا ام الدقون المخضره
راحْت ليالي
وجت ليالي
وكل حاجه مقدّره
فتحنا عكا
حجينا مكّه
زرنا المدينه المنورنة
شفت الكواكبْ
على لوالبْ
ترقص ومدّت لي قنطره
لا شيء في علمي
ولا في حلمي
برجلي برجل ومسطره
ع الأرض واقعْ
صاحب مواجعْ
وفي قلبي ساعه مأخَّره
فالح أغنِّي
وغصب عنِّي
فالح في قولة يا هل ترَى
شوفْ ريقي سايلْ
على الرسايلْ
زى العجوزة المدردره
وهمومي طايحْه
والشمسْ رايحْه
تسحب ديولها المجرجره
باحلم ونايمْ
سبع جناينْ
في لحم خفني مشجره
حلم الجواعى
مع الجوافه
مع الطريَّه المعطّره
مع الفكيههْ
اللي مش فقيههْ
توفْقيها يا غندره
مع اللي لافتْ
من كتر شافتْ
السيئات المكفره
مع ام لعبهْ
اللي مش في علبه
أم الراويح مشمّره
مع اللي آمّا
بعد المرمّه
رمّت عظامنا المكسره
مع اللي صاحْيَه
مع اللي ساهيه
مع الحداقه المسكره
قمحيَّه خضرا
مجنونَه شاطره
كبيره طبعًا صغيّره
يعني بالأغي
وانْشر بلاغي
على النفوس المحيّره
غلبت اعبّرْ
وارقيك يا عنبرْ
أرقيك وقلبي في المجمره
غنيت فرايحْي
لقيت فضايحْي
بعرض الاسطح منشره
وطار حمامي
زىّ الحرامي
من غير ما يقطع لي تذكره
يعني الجوافهْ
ماهيش جوافهْ
مادام جرى لي الذي جرَى
آه يا جوافه يا جوافتهم
أه يا جوافتى يا جوافتهم
في الجَوِّ فتنه
والله خيبه
اللي خوفْتنا
وبعد غيبه
رجعِتْ وافتنا
ورجعت انادي
من السنة دي
يا حلو حلوانْ يا جوافهْ
من غير ما احْاربكْ
قلبي انْسحر بكْ
هلّيت اسلّم بلطافهْ
يا للي انت بزر
يا للي انت بزّ
يا اللي انت بالأسم جوافه

قصيدة (الكستبان) فؤاد حداد (من ديوان رقص ومغنى)

مدهب منغبش قد عقلة صباغ، لولا
صُغيَّر كان رزين الطباعْ، قال لي أنا
يا سيدِّي معدن رزين، أنا تاج على عقلة
صباع الطرازين، وانا شيخ فرح، وانا درع
لولاي انْجرح، اللي بيدبس، واللي بيلْبس،
وانا بسبب عقلي ، أم البنات تضحك لي ، وانا
بسبب خفتى أتحفك، بطقطوقةْ
قاهرْيه، مؤنسه وبكريهْ
انا كستبانْ ، وباغني غنوه لغصن بانْ،
وباقول لها :
أنا أفرح في أنامَلِكْ
وابتسم للي ابتسم لك
كستبانْ
قال يا ترتر مين يطرَّزْ
ويا لولي مين يخرَّزْ
وانا حارقص مين ينقرَّزْ
ع البيانْ
والسلالمْ والسلاملِكْ
وانا أفرح في أنامَلِكْ
وابتسم للي ابتسم لكْ
كستبانْ
قال هوايتي مش هوايهْ
دي الالْف بيه والهجايهْ
العرايس رايحْه جايهْ
من زمانْ
وانت احْلي من اللي قبلكْ
وانا أفرح في أنامَلِكْ
وابتسم للي ابتسم لكْ
كستبانْ
قال يا كبدي هأتى إبرةْ
نينه، نينه البنت كبرتْ
مشاوير الدنيا شاورتْ
نهدبانْ
والجدع يطمع في وصلكْ
وانا أفرح في أنامَلِكْ
وابتسم للي ابتسم لكْ
كستبانْ
والجدع في الوصل طامعْ
زى توب في إيديك طاوعْ
يسهرْ الليلْ الملاوعْ
ديدبانْ
لمي جرحه يلم شمَلِكْ
وانا أفرح في أنامَلِكْ
وابتسم للي ابتسم لكْ
كستبانْ
بنتنا ترضى بقليلةا
قلبها الرايق دليلةا
لو ونهارها جنّه ليلةا
جنّتانْ
والا مش عايزه أجامَلِكْ
ولا أفرح في أنامَلِكْ
وابتسم للي ابتسم لكْ
كستبانْ
مش طبيب لكن باداوي
الزاير بالْعراوي
مش دهب إنْما غاوي
لمعانْ
اطلبي الدنيا اناولكْ
وانا أفرح في أنامَلِكْ
وابتسم للي ابتسم لكْ
كستبانْ
باشغي من تحتي لفوقي
لو قنيت شوكي وشوقي
كنتي ما اعرّضْشِ طُوقي
للزبانْ
يا حلاوه خِفِّي نحلكْ
وانا أفرح في أنامَلِكْ
وابتسم للي ابتسم لكْ
كستبانْ
دول بيتجرّح حجرهمْ
من رموش الطير يا جارهمْ
دول بيوت رقه وشجرهمْ
سيسبانْ
وانا صبّارك ورمَلِكْ
وانا أفرح في أنامَلِكْ
وابتسم للي ابتسم لكْ
كستبانْ
بنت مُرَّه يا جليلَهْ
يا اللي بكِّيتِي القبيلْهْ
شوفي أيامنا خميلَهْ
من أمانْ
يبقي خلخالك في رجلكْ
وانا أفرح في أنامَلِكْ
وابتسم للي ابتسم لكْ
كستبانْ

قصيدة (بين القمرين) فؤاد حداد (من ديوان رقص ومغنى)

-لأدانْ الديك وانا صاحْيه
أحلم ألاقيكْ في الناحْيه
=تلاقيني فقيرْ وحكايتُه
تشبه للزيرْ ونقايته
وهمومي كتيرْ ونهايتُه
مش صاحب مالْ
-أنا راضيه
لأدانْ الديك وانا صاحْيه
أحلم ألاقيكْ في الناحْية
=على طول النيلْ مشواري
ولا عندي قلوع ولا صاري
وجمعت غداي وفْطاورى
يا ما كلت رجوع
-أنا راضيه
لأدانْ الديك وانا صاحْيه
أحلم ألاقيكْ في الناحْيه
=قلبي المجروحْ وانا باعزق
في حبابي الغيط يتبعزق
وحملت الفاسْ أسترزق
دا انا شخصى قليلْ
-أنا راضيهْ
لأدانْ الديك وانا صاحْيه
أحلم ألاقيكْ في الناحْيه
=يبقي اسمك إيهْ
-قمريَّه
=وجهاتك فينْ
-استنّي
=شقشقة الليلْ
-بدريَّه
=بين القصرينْ
-والجنَّة
=يبقي اسمك إيه
-قمريَّه
=وجهاتك فينْ
-بنغني
=شقشقه الليلْ
-بدريَّه
=بين القمرينْ
-والنني

قصيدة (رقصة الست العجوزة) فؤاد حداد (من ديوان رقص ومغنى)

ليلْ عريض ، في القلب منه نجفه بزغاريد، في القلب
منه تفاريح مفرحه. وكل حبهّ كل عين تطلع مع الدربكه
سلمتي وتدورْ مع الشرباتْ.
ومن الحنانْ والاَّ من الرقه، الدنيا قالت للعجوز:
ودّني ، يا ام العروسه حترجعي تِهنني
أم العروه قالت : من قبل ما اهنن
دي ليلة في حياتي
ليلة مش ليلاتْى
دا فرح بناتي
عنك يا فلانه
دلّع يا ابني دلّعْ
في العودْ المخلعْ
شخلل يا ابني شخللْ
للطير المزغللْ
يا نجف ملعلعْ
يا نجف مصهللْ
آه يا شمس دا انا
جنبك شمعدانه
يانا يانا يانا
يانا يا عجوزه
قايمه وإيدِّي ترعشْ
حبّة عيني ترمشْ
أرقص لك يا مشمشْ
فيكْ الوعد جانا
يا شمس اللي تِوْلدْ
حترجع تولدْ
وترجع تقلد
البنت الشيطانه
يا شمس العصاري
كان نفسي أداري
أتاري أتاري
بيبيعوا الملائه
ابنك باني قبّه
لمشايخ أوروبْا
والحصاله هبّه
على الأجزاخانه
صحن ملهبيّة
من أيد الصبيَّه
شمس المغربيَّه
شقة برتقانه
وادي شعري حنّه
آديسناني سنّه
يا اللي بتمتحننا
نسقط في الحضانه
للفقير فقيرَه
يتقاسموا الحصيرَه
للهجين خميرَه
للجعانْ جعانه
ويسْمع دعانا
ويلطف معانا
يانا يانا يانا
يانا يا عجوزه
نقلب الاسطوانه
***
يانا يانايات
راحْت الجايات
فينْ وفينْ يابنات
فينْ وفينْ وفينْ
السَحَر وسحرني
النهار ونحرني
الصباحْ صحّاني
الضحى ضحّاني
زىّ ما ضحكني
زىّ ما بكّاني
شمس يا شموسه
بدّلي لي سناني
بدّليها تاني
عنقي ياما لويتِ
قد ما اتلويتِ
فينْ وفينْ انا وانت
فينْ وفينْ
رقصتي تاتا تاتا
والحياه توته توته
فرغت الحدّوته
فينْ وفينْ
فينْ وفينْ …