شيماء يا مكة لهشام الجخ

شيماء يا مكة

ليل الغوانى غوانى من صغرى عايش فيه
عذب فؤادى وكوانى بالله لتطـفيــــه
الكالكليتور والمذاكرة وصت لطيفه
والفجر لما غافلنى قطع هدوء الليل
قلبى قليل الحيل
سايق عليكى الوجع والغربة والمواويل
خليت عنيكى دليل .. عشمان تخلينى
لما اشتكيت حبى للصخر خر ولان
بالله دلينى
كيف الحجارة تلين وأنتى ال ما تلينى
الشعر دا شعرك مش ها انسبه لنفسى بس أنتى ملينى
ياللى شخبطتى فى قصايدى بزياداكى شخبطة
والاسم شعر
قسمونى قبل منك يجي ستين ألف واحدة
نفسى يوم يبقالى سعر
نفسى أزفك بين ضلوعى
نفسى أنجدلك مراتب قلبى ياما قلبى قبل منك لم بق
نفسى أحب حــــــــــــــب حق
بس خايف تبقى نانا ....
يادى نانا
نفسى أوضبلك ضلوعى فرش عرسك
ما اتفرش لواحدة قابلك .. نامى فيا
مدى رجليكى اسكنينى
وأحلميلى وانقشى اسمك على الغضروف حروف
با اعشقك رغم الظروف
بـ أعشق الليل ال نازل فوق كتافك شعر سايح
يا أم طيف كالسيف فى جوف الصدر سارح
بـ أعشق الضل ال مرمى فوق تراب الأرض منك
وأحسد الأرض ال تحته ... قلبى كان مقفول فتحته
ولى وجهك شطر قلبى واتلى آيات اليمين
وأنتى داخله قدمى الرجل الشمال
أصلى بـ أتشائم من الرجل اليمين
أصل قابلك لما خشت قلبى نانا .. يادى نانا !!!
تعبان من الترحال والغربة والمشاوير
شايق عليكى الجمارك والبحر والمينا .. كلت سواعينا
::.. نكاد حين تناجيكم ضمائرنا ........ يقضى علينا الأسى لولا تأسينا :: ..
بالله رسينا
بزيادة غربة وشوق زقينى جواكى
ما أنتيش كما مخلوق .. مين ال قواكى ؟ !
مين علمك اسمك ... مين علمك اسمى ؟
مين علمك جوا الضلوع القاسية تترسمى
ومين مايقدر يحبك لما تبتسمى
طب فاكره فى الرحلة كان الهرم غيران
وحجارته حسدانه
حتى الجمال والخيل حسدونا فى غنانا
ميل على الهرم وقالى فين نانا
قلت له مش وقته
قالى نسيتها قوام ؟!
قلت له ما نسيتهاش
لساها نانا ف صدرى بس مش صاحية
نانا ال مدفونة فى قلبى جثة همدانة
أنا أصلى زيك يا هرم خوفو سكن جوفك ومات
وجوفى خلته نانا جبانه

================

يا نيل يا مبحر بوس لى خدودها الحمر
لو ها احكى عن شوقى يلزمنى مليون عمر
رق الشجر يا نيل معها صوت شوقى
سكنتها فوق البشر .. فوق القمر .. فوقى
سكنتها عروقى
لما اشتكيت من بعدها زاد قربها حروقى
يا نيل يا أبو المساطيل دوقتنى خمرك ما تقولها دوقى
فاضل كمان ساعة والشمس ها تغرب
نركب سوا مركب الدفة ف إيديه .. وانتى ال بتسوقى
لو دقتى خمر النيل عمرك ما تفوقى
يانيل يا أبو الدروايش .. خمرك عرق براطيش
عمره ما يسكر حد
لو بوستها يا نيل وأنت فى عز الجذب يتقاد فى جوفك مد
لو شفتها يا نيل أباجوره بتلالى .. راح تنسى علو السد
بلا سد بلا عالى
وتفيض وتلمسها
تلعب على شطك .. وعينيك تغامزها
وتعوم على دراعك صدرك يغازلها
تطلع لى بردانه
أفرش لها رمشى ... خطى عليه وأمشى
وأوعى تخافى البرد صدرى طريق مبروك
من يومه طارح شوك
الليلة طراح ورد
دوسى ولا تخافى
يا قلبى يا صافى
محبوبتى جيالك وسع لها السكة
شيماء يا مكة

=============

طالب أحج البيت
حاسس كأنى مرابى عمرى ما حبيت
ربينى من تانى
نفسى ف سرير هزار أبكى تحايلينى
نفسى تضمينى ... عرق البنات فيا
عكر حوافيا
نفسى تحمينى
أرجع وليد أبيض أنعس على صدرك
أشكيلك الغربة .. تدينى من صبرك
كاس الغرام دقته .. صبولى فيه ياما
نفسى أدوق صبك
لتكونى مفتكره إنى فتوة من جوه
ما يغيركيش صيتى
ها تلاقى جوا الجوف واحد ماليه الخوف
لو جيتى بصيتى

((( مقطع محذوف )))

خصيمك قلبك اللين ورقة صوتك الملكوت
يا فاكرة العشق شئ هين .. كوانى العشق كيف الموت
منين أدخل سراديبك
منين أنفض جلاليبك
وأكون لك توب
خيطانه تدارى فتنة قدك اللولى
وينزل كبرياء صدرك على صدرى
وأحلامك تصور لى
بحبك حب فكرنى بقساوة شمسنا قبلى
ف حضن أمى ال عمرى ما اترميت جواه
ما ألاقيش جوا صدرك ركن يقبلنى
أنا عيل وصالح لسه فى استعمالك الهمجى
بنات الدنيا ما قدروا على وهجى
ياريتك تقدرى على
يا غنوة دافى با اسمعها
أنا قابل شروطك قبل ما اسمعها
ياريت تنسانا دنيانا تصير زيانا زى أنا
يا غيارة وما عرفانى عشان نانا
دى نانا ال أصولها تغير
بحبك لما بتردى تردى
وأحبك ياكش بتصدى

انا ناديتها ليه بتصد داعيها
بحبك حب م الشعر عاجز عن وصفه
طريق قلبى بقالوا شهور طريق مهجور
عشانك ها ابتدى رصفه

==================

تقيد نار الغرام فيا ... أنور ورد قنديلك
ولو صعبة عليكى السكة ... شاورى لى وأنا أجيلك
أتوج شعرك الشلال بتاج جيلك
ويكفاكى أكون عبدك
وأنا يكفانى تبجيلك