يعيش جمال عبد الناصر

من يمدحه يطلع خاسر
ويشبروله ايامه
يعيش جمال عبد الناصر
يعيش بصوته واحلامه
( فى قلوب شعوب عبد الناصر )

مش ناصرى ولا كنت فى يوم
بالذات وفي زمنه وفي حينه
لكن العفن وفساد القوم
نسانى حتى زنازينه
( فى سجون عبد الناصر )

ازاى ينسينا الحاضر
طعم الاصالة اللى فى صوته
يعيش جمال عبد الناصر
يعيش جمال حتى فى موته
(ماهو مات فعاش عبد الناصر)

اسمه جمال وجميل فعلا
ياما شجعان خوافة
عظيم وكان انسان طبعا
المجد مش شغل صحافة
(عشان ده عاش عبد الناصر )

اعداؤه كرهوه ودى نعمة
من كرهه اعداؤه صادق
فى قلبه كان حاضن امه
ضمير وهمة ومبادئ
(ساكنين فى صوت عبد الناصر)

ملامحنا رجعت بعد غياب
دلوقتى بس اللى فهمناه
لا كان حرامى ولا كداب
ولا نهبنا مع اللى معاه
( انا باحكى عن عبد الناصر)

عشنا الحياة وياة كالحلم
فلا فساد ولا رهن بلاد
يومها انتشينا ثقافة وعلم
وف زمنه ما عشناش احاد
( كنا جموع فى زمن عبد الناصر )

كان الامل فى خضرته بكر
ومافيش للصوص للقوت والمال
ومصر ابطال ورجال فكر
ومثقفين ستات ورجال
(جيوش جمال عبد الناصر)

كان الهلال فى قلبه صليب
ولا شفنا حزازات فى بلادنا
ولا شفنا ديب بيطارد ديب
ولا جرس خاصم مدنة
( وحدنا صوت عبد الناصر )

دفعنا تمن الحرية بدم
مش بدينار ودولار
يوم وقفته فى المنشية
خلى الرصاص يهرب من عار
( اعداء جمال عبد الناصر)

رغم الحصار كنا احرار
وفى الهزيمة الشعب ما جاعش
كان اسمها بلد الثوار
وقرار زعيمها ما بيرجعش
( قرار جمال عبد الناصر )

خلى بلاده اعز بلاد
ليها احترام فى الكون مخصوص
لا شفنا وسط رجاله فساد
ولا خطط سمسرة ولصوص
(كان الجميع عبد الناصر )

لولاه ما كنتوا اتعلمتموا
ولا بقيتوا دراكولا
ياللى انتوا زعما وانجازكوا
دخلتوا مصر الكوكاكولا
( وبتشتموا فى عبد الناصر)

عمر ما جاع فى زمنه فقير
او ما التقاش دوا للعلة
دلوقتى لعبة " اخطف طير "
والامة فى خدمة شله
( تكره جمال عبد الناصر )

يتريقوا على طوابيره
علشان فراخ الجمعية
شوفوا غيره دلوقتى وخيره
حتى الرغيف بقى امنية
( يرحم جمال عبد الناصر )

فى ناس بتنهب وتسوف
ولايهمها مين عاش ومين مات
رضا العدو عنا يخوف
معناه اكيد اننا قفوات
( من يوم ما مات عبد الناصر )

الارض رجعت للاقطاع
وقالو رجعت لاصحابها
وصاحبك الفلاح اهو جاع
ضاعت العقود واللى كتبها
( وخط ايد عبد الناصر )

انا اذكرك من غير ذكرى
والناس بتفتكرك بخشوع
والامس واليوم وده وبكره
يبكوك بعظمة مش بدموع
(يكفي نقول عبد الناصر )

دلوقتى رجعوا الفقرا خلاص
سكنوا جحورهم من تانى
رحل معاك زمن الاخلاص
وجه زمان غير انسانى
( ماهوش زمن عبد الناصر )

صحينا على زمن الالغاز
يحكمنا فيه اهل الاعمال
وللعدو صدرنا الغاز
بفرحة وبكل استهبال
( نكاية فى عبد الناصر )

بنمدها بغاز الاجيال
تحويشة الزمن القادم
اتوحشوا فى جمع الاموال
ورجعنا سادة وخوادم
( ضد اتجاه عبد الناصر )

يا جمال نجيب زيك من فين
يا نار يا ثورة يا ندهة ناى
البوسطجى اللى اسمه حسين
ابوك منين جابك وازاى؟؟
( عمل جمال عبد الناصر )

لو هاكتبك ما تساع اقلام
ولا كلام غالى واوراق
الامر ومافيه.. انا مشتاق
فقلت امسي عليك وانام
( نومة جمال عبد الناصر )

رحم الله ابو خالد

طبعا كلام كله مضبوط وفي محله تماما

اسعدني الحظ كثيرا حين كنت في القاهره

في ديسمبر الماضي تقريبا فقد شرفت بزيارة ضريح

الزعيم والقائد جمال عبد الناصر هو وزوجته

وأديت له التحيه كما يفعل جنود القوات المسلحه

وقرأت الفاتحه علي روحه الطاهره وصليت الجمعه

بمسجده ..رحم الله هذا الرجل
..........

طيب فكر معايا كده يا ابو جمال
مين من الرؤساء او الزعماء يفكر الانسان يزوره بعد موته
سبحان الله عاش محترما محبوبا ومات كذلك وكتب اسمه فى التاريخ بحروف من نور رغم انف الحاقدين
شكرا ابو جمال

لا اعتقد ان هناك من الرؤساء من يزورهم بعد وفاتهم

خاصة في مصر اللهم الا الفراعنه ليس حبا لهم او فيهم بل

لكي تري الناس عظمة حضارتهم ونقوشهم وقبورهم

اثناء صلاة الجمعه بمسجد جمال عبد الناصر

حدثت اشياء غريبه معي من بعض المصليين

لو ذكرتها لك لتعجبتي اشد العجب

ولكن ليس هذا مجال الحديث عنها
..................

ليه مش مجالها
شوقتنى اكتر للمعرفة
قول يا ابو جمال

بعد ان قمت بزيارة قبر الرئيس الراحل كما قلت دخلت الي المسجد مسجد الرئيس عبد الناصر

ولم يكن متبقيا علي اذان الجمعه سوي 20 دقيقه تقريبا . لم يكن حينها بالمسجد سوي اعداد

قليله من الناس لا تتجاوز الثلاثين رجلا او الاربعين تقريبا رغم اتساع المسجد الرهيب توجهت

الي القبله وصليت تحية المسجد وبعد ان فرغت من الصلاه توجه الي احدهم مسلما ومصافحا

بحراره كأنه يعرفني حق المعرفه .. الرجل تقريبا ويبدو انه واحدا من الرتب العسكريه

بالقوات المسلحه وذلك واضح جدا من بنيانه وطريقة مصافحته لي .. نسيت ان اذكر لك

انني الوحيد بالمسجد الذي كان يرتدي الجلباب الصعيدي والعمامه وهذا هو تقريبا ما جعل الرجل

يتقدم الي دونا عن كل الحاضرين ليصافحني بهذه الحراره البالغه ..احسست من نظراته لي

ان لسان حاله يقول هؤلاء هم اهل عبد الناصر لذين لم ينسوه حتي الان ..كان واضحا علي هيئته

انه من محبي جمال عبد الناصر ووجد في صورتي الصعيديه هذه من يشاطره هذا الحب

أو فلنقل اراد ان يوصل لي رساله مفادها انكم لستم وحدكم تحبون عبد الناصر بل نحن ايضا

وها انا اصافحك لاعبر لك عن ذلك رغم اني لم اعرفك معرفة سابقه هذا ما استشفيته من نظراته

وطريقة مصافحته ...انتهت الصلاه وخرجت مودعا مسجد وقبر عبد الناصر واذ بي اراه منتظرا

عن باب الخروج ...رفعت له يدي محييا فتقدم اليّ مصافحا مره اخري وداعيا لي لتناول فنجان

شاي معه شكرته بحراره ولكن الفضول دعاني الي القول ..انا ما تشرفتش بسيادتك فتبسم وقال

انت ليه جاي تصلي هنا ؟؟ فقلت امنيه عندي ان اوزر قبر ابو خالد واصلي في مسجده

فقال .. لقد رأيتك حين زرت قبر الرئيس ورأيتك وانت تؤدي التحيه العسكريه لسيادته رحمه الله

. وهذا ما دعاني الي مصافحتك لانني اعرف انكم تحبون هذا الرجل الذي تربينا علي

مبادئه وتعلمنا منه الكثير ولازلنا نتعلم منه رغم انه ليس موجود بيننا الان ...فأنتم اهل الصعيد

اهل القيم والمثل والمبادئ والثبات علي القيم التي نعتز بها ...فشكرته علي كلماته ثم اردفت

لازلت لم اتشرف بسيادتكم ...فضحك وقال هتفرق معاك يعني ؟.. فقلت ابدا والله ولكن من باب العلم لا اكثر

فتبسم وقال عميد فلان الفلاني ...شددت علي يده بحراره

وانا اكاد اسمع دقات قلبي المتسارعه من شدة الفرح ... ذلك ان هناك رغم مرور كل

هذه السنوات علي وفاته الا ان هناك رجال اوفياء مثل هذا الرجل

تصافحنا وشكرته مودعا
...............

الجميل فى الزعيم ان المخلصين له بقلوب صافية باقين الى الآن وليس رياء او تملق للأحياء
وهكذا يكون الزعيم وتحية لك ابو جمال على هذا الوفاء وهذا التعلق

وتحيه ايضا لكل محبي الرئيس والزعيم

جمال عبد الناصر

شكرا زهره
...........

يكفي جمال عبدالناصر فخرا انه مازال يغيش في قلوب وعقول الملايين من العرب