اشعب القط بوحه

واحد صاحبنا عزم نفسه
على Party في .. سموحة

أصل البعيد كان طفس
ونفسه .. مفتوحة

كان إسمه أشعب قط
وأمه إسمها .. توحـة

وكان صحابه ينادوا له
يقولوا له يا .. بوحـة

كرشه يادوب مترين
وتحت ضهره .. فضيحة

وصداغه ع الجنبين
مرحرحة و .. رحروحة

وشفايفه شفتورتين
مشفترة و .. ملووحـة

وتحتهم صفين
من السنان .. دباحة

القصد راح الفرح
وياشوم دي الروحة

وفي الطريق شاف مامته
اللي اسمها .. توحة

نذهت عليه سألته
على فين يا .. بوحة

قال معزومين على دخلة
جارتنا .. صبوحة

قالت أطيعة دي أمها
ولية شرشوحة

القصد ركبوا الترام
ونزلوا في سموحة

وصلوا مكان الفرح
والوصفة .. مشروحة

كان البوفيه Opened
والريحة .. فواحـة

وأشعب وأمه يقولوا
دي نفحة منفوحـة

وشوية صاحب الفرح
قال البوفيه .. مفتوحة

أشعب هجم ع الحلل
وايديه .. سراحة

يحشر كأنه بياكل
في آخر زاد .. بصراحة

والناس يقولوا له
ياعم بالراحــة
وبعد ييجي نص ساعة
كانت الصحون .. ممسوحة

وكان هناك حاضرين
شلة عيال .. شبيحة

وكل واحد في جيبه
مطوتــه .. مرتاحة

والبانجو لف ودار
والبيرة .. مسموحة

والكل كان مسطول
وياوحوي .. إيوحـة

شافوا بوحة إتغمزوا
والعيال .. لماحـة

وقالوا نضحك عليه
سناكيح ولاد سنكوحة

راحوا حزموه وقالوا له
ترقص هنا في الساحة

صعب عليه نفسه
ونفسه .. مجروحة

وأمه بصوت حياني
تصرخ تقول يا .. بووووحة

واتقلبت الحفلة
لخناقة ومناحـة

وكرسى في أم الكلوب
والحريم .. رداحـة

والدم صار للركب
والعركة في الساحة

اللي في عينه انصاب
واللي دماغه مبطوحة

أشعب خد أمه وجري
وندالته مفضوحة

أصل الخلف لو عار
يجيب لأهله .. فضيحة

وتاب صاحبنا بعدها
وتوبته كانت .. نصوحة

ودي قصة الطفسين
مشكاح ومشكاحة ..

وقولوا لي ايه رأيكم
بس يكون .. بصراحة
بهاء الدين بدوى

دي مصيبه يا بهاء

ربنا يبعدنا عن الطفاسه

شكرا زهره
...........

يارب يجنبنا كل الخصال السيئة ويزكى انفسنا ان شاء الله
شكرا ابو جمال

» ان غاب القط العب يا فار
» اين القط فى الصورة ؟؟
» مسلسل القط الأسود\ فاااكرين
» لمحبى مغامرات القط والفأر (توم وجيرى )
» هانى القط من دشنا وهو يتسلم جائزة ساقية الصاوى