حكايتى مع البندر للشاعر الدشناوى \ حلمى قاسم

زى كتير من اهلى و ناسى
بحب الارض و بعشق فاسى
حياتى بسيطه كده على القد

فقرى وراثه اباً عن جد
يومى بيعدى مابعرفهوش
ماليش فى حساب ولا بعرف عد
اصل نهارده شبه امبارح
ويوم الاتنين كان زى الحد
سنين بستنى ارتاح واتهنى
وحقق كل اللى انا بتمنى
زى الحَب ف عوده الاخضر دايما سارح
يمكن بكره ييجنى برزقه و خيره الطارح
لحد ما مره انا كنت مروح ع الصبحيه
قابلنى محمد يونس افندى ابن عطيه
لابس جزمه و لبس جديد و مهوش جلابيه
اصله بيدرس طالب جامعه و فى الكليه
حاطط ريحه و داهن شعره وكان متغندر
قاللى تعالى قوام ماتخفش
يالله معايا نروح ع البندر
قولت يا عم انا سيبنى فى حالى
مال البندر بيا ومالى
قاللى انا عارفك عندى و فقرى
يالله طاوعنى تعالى يا خضرى
وهاتك زن هايخرم ودنى
شد دراعى وخدنى معاه كده اهه بالعافيه
وصلنا البندر ربنا يستر رجلى الحافيه
والله جميل يا خواتى البندر حاجه تحير
خلت روحى تروح وياها و جسمى يقشعر
شفت يا خلق هناك الناس اشكال والوان
اشى رجاله واشى نسوان
وناس بتهاتى تقول فى كلام
واحد بينادى يقول يا سلام
معايا بليله وحمص شام
وواحد تانى يقول ده بكام
وعيل راسه فوقيها صينيه يقول يا مدام
معايا هريسه طعمه لذيذه وحلوه تمام
زحمه كبيره وخلق كتيره
ناس جايين على ناس رايحين
هيصه ودوشه شمال ويمين
عينيا سابتنى وزاغت منى
اه يا عنيا قاعده تبص لديا وديا
وعقلى ضرب معرفش انا مالى
حصل لى جنان
سارح افكر فيا وحالى
وجانى توهان
ماشى بتمتم اعض صوابعى
و اقول يا خواتى
واسب واشتم ف ام مراتى
كرهت حياتى ولادى بناتى
فكره وجاتنى قولت خلاص
لازم ابص لنفسى يا ناس
هابيع الارض وابيع البيت حتى البلاص
وهاشرب ميه من الحنفيه
واكل كشرى معاه طعميه
فجأه محمد قاللى تعالى
يالله نروح قولت يا عم كفايه رزاله
سيبنى شويه كمان فى البندر
نفسى امتع عينى و اتمنظر ولا حرام
ضحكلى وقاللى كفايه تمام
سيب البندر قولوه سلام
رجعت معاه مش طايق نفسى
وكل شويه اخانق بختى
جانى وسواس ووجعلى الراس
خلاص مش طايق شكل الفاس
نفسى اعيش اتمتع واسهر
عايز اجرب عيشة البندر
يوم ورا يوم الزرع بيدبل
حتى ديونى اهى بدأت تتقل
طول اليوم قاعد وبفكر
وها يجرى ايه؟ ايه اللى هايحصل
لما اسيب انا اهلى وناسى واعيش ف بالندر
فكره وجات ابيع بسكات
هابيع الدار ويا الغنمات
سمع بحكايتى الشيخ فرحات
جه ونادى لى و قال تعالى
تروح على فين
وتخلع توبك ليه يا حزين
وحد ربك يا ابن الناس
قوم واتعذبن م الوسواس
بندر مين يا اخى جاك الطين
تهجر بلدك شوف الواد !
تكونش نسيت قصة عواد
ارجع يا ابنى لعقلك وانسى
سيب البندر ده دهب قشره
اسمع منى حكم ومواعظ
حاجه قالوها جدودنا زمان
اللى يبيع ويفارق داره
يعيش متهان
تقل كرامته يضيع مقداره
يكون حيران
فاهم يا ابنى؟!..قالها وسابنى
سمعت كلامه انا اتندمت
وقولت اهى توبة ومنها النوبه خلاص حرمت
لا رايح بندر ولا هاتمنظر.. وبحمد ربى كريم وبيستر
كنت هاتوه انا من غير ما اشعر
00
وادى حكايتى عقلى قليل زى العيل
لما يشوف اللعبه يميل يبكى عليها
يلعب بيها وبعد شويه يقوم يرميها
ويبوظها ويكسرها ما يخليها
ويرجع تانى ويطلب غيرها ويشبط فيها
--
خدها نصيحة اسمعنى هاقولك
اوعى تخلى النفس تزلك
دنيا دنيه ومش هتدوملك
عيش بقناعه وصبر احسن لك
ارضى برزقك واحمد ربك ع المقسوم لك