انتخبوا مرتضى منصور لرئاسة الجمهورية

انتخبوا مرتضى منصور لرئاسة مصر
بجد بجد انتخبوا مرتضى منصور ...طاب ليه مرتضى منصور ؟؟؟
علشان لما يبقى رئيس مصر هنضمن انه هيفضح كل رؤساء العالم بسيديهاته وحبشتكاناته اوعى وشك ولا اوباما ولا اردوغان مرتضى منصور هيدخلهم اللومان وكمان هيمسك سيديهات على كل حكومة تتشكل ويزرع لهم كاميرات مراقبه فى كل مكان علشان يفرش لهم الملايه فى ماسبيرو انتم عايزين رئيس دوله فيه مميزات اكتر من كده ؟؟؟؟ بتدوروا على ايه ؟
عداله اجتماعية وعيش وحرية ؟ هو فيه اجمل من اننا نفضح بعض وندور على اخطاء بعض ونخون فى بعض فيه تسالى تنوم الشعب اكتر من كده هو فيه حد فى البلد دى عايش تحت خط الفقر؟ طاب فيه حد متوسط الحال ماشى جنب الحيط بيدعى ربنا ليل نهار يسترها معاه لاخر الشهر علشان يكفى طلباتالبيت والعيال . طاب فيه حد اتظلم وعاش حياة القهر والذل ونفسه يكون فيه دولة انصاف ؟
مطلوب رئيس يا خلق يا هو لا مش رئيس بس هو المطلوب على فكره مطلوب كمان شعب يتضافر مع الرئيس المنشود مطلوب نغربل السوس اللى بينخر فى جدار الوطن مطلوب محدش يقول انا مالى الكل يمد ايده بلاش اتكالية وفوضى وكله يستنى التانى يتحرك ابدأ باصلاح نفسك ابدأ بالقاعده والاساس ثم انتظر النتائج




زهرة

كان نفسي اشوف المقال ده يوم ما اتكتب قبل انسحاب مرتضي بيه

لكن اهو خد الشر وراح

انا قلت اتجنن دا ولا ايه  هى نقصاه
واهو زى ما انت قلت يا ابو جمال
 خد الشر وراح

ربنا كريم
اللهم عافنا واعفو عنا
تحياتي ام شروق ونرجع ونقول قدر الله وماشاء فعل

ايوه فين تعقيبك التفصيلى يعنى يا عبقر
مفهمتش انا حاجه كده

يعني خلي الطابق مستور يا زهرة وربنا امر بالستر

اوعى يكون لك سيديهات عنده علشان كده خايف

والنبي ما انا عارف
بس للامانه يعني كل شيئ جايز ووارد
خليها تعدي مستوره جدعه اختي الله يكرمك

لا مش هخليها تعدى
 انا مليش سيديهات  عنده  ملفى نضيف اتكلم براحتى
  قول فضفض  دا انا ستر وغطى  وتقول لى السر تلاقيه فى غربال على طول

مهو علشان كده انا عارفك ومتأكد ان السر هيكون في غربال
غربال دا ايه
دا هيكون في مصفي كبيره خالص بتخر لوحدها
روحي ربنا يسامحك

مصفاية مكرونه
الله يسهل لك

والنعمه شكلك كده هتودينا في داهيه
انتي فلول ياست انتي ولا ايه حكايتك
مالك انتي بالناس الكبيره دي بس هههههههه

اذا كانت الناس كبيرة فأن الله اكبر

الله اكبر والعزة لله والنصر قادم
حي علي الفلاح
حي علي الجهاد
فنغزوا تلك القريه ونخرج منها الفرنجه الكفره