واتقابلنا / حلمى قاسم

عند دكتـــــــور الولاده
كنت رايح بالمــــدام
وامــــــا جينا للعياده
قولت للقاعدين ســـلام
وسعوا وردوا سلامى
قمت داخل ع التمرجى
اللى بينادى الأسامى
قولت عايز يا إبنى كام؟
والمدام هتخش إمتى
وإمتـــى هيخف الزحام
وفضلت اتكلم واسأل
فجأه رن فى ودنى صوت!!
قـــومت باصص ناحيته
شوفتها خدنى السكوت
وارتبكت وفكرى سافر
راح لماضينا المسافر
عينى جت ف عينيها قالت
عامل ايه يا وحشنى موت
الكلام كان جوه منها
ايوه كان باين ف عينها
شوق ودمعه من زمان
يوم ما قــــولتلها الوداع
غصب عنى يا حبيبتى قلبى باع
واللى ضاع كان حب طاهر
حب خالى م الخداع
القدر فرق مابينا وانتهينا م البدايه
كات نهايه للحكايه واتقفل ع الحب باب
كل واحد خد طريقه
غصب عنه ساب رفيقه
و انتحر جــــــوانا شوقنا
وافترقنا /جوه بحر جراح غرقنا
ليلنا كان رافض شروقنا
واما فوقنا /كان خلاص الوقت فات
حُبنا اصبح رفات……… بات معانى وذكريات
يعنى صوره وكام جواب
والامانى الحلوه ماتت
خلف سجن الاغتراب
وايه يفيد منه العتاب
كل شىء اصبح سراب
والتفت مره تانيه بعد ما استرجعت قلبى
قولت خبى يا عينى خبى
المدام ممكن تشوفنا
مستحيل تغفر هوانا
او تقـــــــــدر لو ظروفنا
وانسحبت من المكان ده
بس كان جوايا صــــوت
صوت بيسأل ويناديها
ليه ما سلمتش عليها
ليه بتهرب قبل حتى بالسلام تلمس ايديها
وتواسيها… صوت بيسأل ويعاتبنى
مرر القلب وتعبنــــــــى
شىء غلبنى قمت ماشى
قولت لمراتى تعالى الحكيم لساه مجاشى
قـــــــومى بينا نروح لغيره
والحقيقه كنت دافن سرى جوه قعر بيره
وانتهينا وكل واحد فينا عاش
بس شـــــــوقنا منتهاش
لسه فينا /كل ذكرانا وماضينا
وف عينينا الحب باقى مهما صدينا وابينا
*******

» حكايتى مع البندر للشاعر الدشناوى \ حلمى قاسم
» مساجلة عن تدنى مستوى الشعر بين اجمل الشعراء \ محمود وحيد \ حلمى قاسم \ عبد الفتاح عبد الشافى
» حلمى المليجى وتقليد الفنانين
» ابتهالات الشيخ حسن عبدالعال قاسم
» نغمة أحمد حلمى قول الووو