يادى الولد / بقلمى

قالوا على ام البنات 
عايرونى ياما 
ساعات اقول مالها البنات 
وساعات كنت اقلبها دراما 
وف يوم على ضى القمر
ودمعتى ع الخد سايله
وحرقة الشوق والسهر
يارب ليه انا حيطتى مايله
قلت ياربى ولد عايزه ولد
مش شرط ازاى يكون
ولا عايزه شكل ولا حلمى لون
كافى يكون عندى ولد
وبسر كلمة كن يكون
جانى الولد
قلبى انتشى ضهرى انفرد
حبانى ربى بالولد
كنت اغنى له ليلاتى
اهدهده وافضل اهاتى
لما قالولى ولد اتشد ضهرى واتسند
كبر الولد
فارد قلوعه فى البلد
ماشى يعاكس فى البنات
ولا حد لامه
ولما ييجوا يشتكوا لى
اضحك واقول اصله ولد
وهجوزه ست البنات
بشرط تهدى له الولد 
ياااادى الولد يا ام الولد
وبسرعه جوزت البنات
والعمر يجرى من سكات
اما الولد ماشى ف طريقه
وصاحب السوء كان رفيقه
ضاع الولد فى سكه تانيه 
وعرفت ان الدنيا فانيه
وانى غلطت ف نظرتى
ونسيت ف قلب دعوتى
ادعى بتقوى والصلاح
مش كافى ادعى بالولد
ولا خدت بالى م البنات 
ولا عرفت اربى الولد
والعمر راح
وتانى على ضى القمر
فى عتمة الليل والسهر
مستنيه القطر يفوت
علشان اموت
زهرة