حلم مع ايقاف التنفيذ

حلم مع إيقاف التنفيذ
للشاعر محمد أبو زيد الأسيوطي

و بحاول أدور علي نفسي
وسط المخاليق
مش بلاقيني
وبدور تاني علي كياني
وفي أي طريق
علي ضي نهار
يثبت لي إن انا
عايش بحقيق
أو كلمة حب تبل الريق
طارت عصافير
الأحلام من أغصاني
معدتش تغني ولا تزقزق
ولا أي عبير
عاد يتصدق
ولا أي نسيم
ولا نغم الحب في الحاني
بيقول تقاسيم
وارجع تاني رغم التعتيم
اللي في شمسي
اضحك علي نفسي
وأتبسم
وانده ع القمر
المتخبي جوه الدهاليز
بعد التركيز
بيرد صداة
حلمك مش قابل للتنفيذ
مش بستسلم
من بين كراكيب يأسي
بلملم
بعض الأفكار اللي أتخنقت
علي باب مقفول
وغرام في الروح اللي أتحرقت
وأمل مقتول
وبيتألم
من عزم الريح
وقصور أحلام
بدأت تنهار في ظلام الليل
اللي معتم
وأنا لسه برتل
قرآني
واقري التسابيح
وبحاول تاني أني
أنا ارسم
لوحة من الحلم
اللي أتهدم
تطلع شخابيط
والقي الوطاويط
علي كل جدار
غاوية التنطيط
لو خطوتي حاولت تتقدم
يتقطع الخيط
اللي ما بيني وبين
الأحلام
بعد المشوار
اللي ضانيني بلاقيني
جريح
مطعون بالسهم
اللي قتليني ميت مرة
زمان
وبحاول آخذ أنفاسي
يطلع دخان
بيخلي النار المكمورة
جوايا تشيط
وزماني يعيد نفس الصورة
والحزن شريط
غاوي التكرار مليون مرة
علي شاشة قلبي
اللي أتحرقت جوه وبرة
وأنا لسه شباب
وكلاب مسعورة
بتتسابق
جوه السراديب
علي مين هيفوز
وأنا المنبوذ
مكسور وطريد
من جنة أحلامي
العالية لطريق العوز
اللي ماشيني
بالطول والعرض
مين يشرب دمي
في شراييني
ويصلي الفرض
علي روح أراجوز
مرمي
علي الأرض
ويحلي بلحمي
المجزوز
ومعلق
فوق الأبواب
ويبارك روحي المدشوشة
في رحاية القهر
وكرامتي المنهوشة
في كوشة وفي عز الضهر
بدأت تتزف علي
احلي عريس
علي سيمفونية من الأحزان
يرقص وياي ويتراقص
دمعي اللي أتهان
من غير أحاسيس
علي لحن عذاب
مع صوت إبليس
مين فيكم بس القرداتي
اللي جايب لي اللوز
علشان اتنطط
قدامه
مانا لسه عبيط
وكمان كداب رغم التخبيط
اللي كاسرني
والهم اللي في سجنه أثارني
أنا مش مهزوز
لساني بعيش مفرود البوز
من غير كراميش
وبنام واحلم بمطر وسحاب
رغم التهبيش
بحلم والحلم لأمثالي
ولا باب ولا شيش
ولا حتى يجوز
وعشان درويش
أنا حلمي بسيط
بحلم لو أكون
إنسان فعلا
من غير لا شروط
ولا أي خنوع
واغني نشيد الحرية
علي ورق التوت
وبصوت مسموع
بحلم بالفجر اللي بيدين
والضلمة تفوت

منقوووووول

وأنا لسه برتل
قرآني
واقري التسابيح
وبحاول تاني أني
أنا ارسم
لوحة من الحلم
اللي أتهدم
تطلع شخابيط
والقي الوطاويط
علي كل جدار
غاوية التنطيط
لو خطوتي حاولت تتقدم
يتقطع الخيط
اللي ما بيني وبين
الأحلام
.....................

شكرا سعيد وشكرا لكاتب القصيده

روووووووووووووووعه بجد
.....................

الرائع فعلا هو انتقائك لاجمل كلمات فى القصيدة

شكرا ابوجمال على المرور الجميل بالموضوع

الله الله الله

جميل ورائع والله ياسعيد انت لقيت الحاجات الحلوه دى فين

انا بصراحه اول مره ااقرأ للشاعر/محمد ابو زيد الاسيوطى

بس بصراحه قصيده تستحق ان تعاد قرائتها لما فيها من اوزان وقوافى رائعه

وجميله تستوقفك لتشرد بخيالك لتفسر هذه الالغاز الشعريه الرائعه

اسلوب سلسل مبسط مغلف بالاحتراف الشعرى والالمام اللغوى بمفرددات الشعر العامى

تسلم ايدك يارحيق السها واختيار رائع ومتميز

وانا اعجبتنى القصيده فى مجملها ولكن شدتنى

__________________

وكمان كداب رغم التخبيط
اللي كاسرني
والهم اللي في سجنه أثارني
أنا مش مهزوز
لساني بعيش مفرود البوز
من غير كراميش
وبنام واحلم بمطر وسحاب
رغم التهبيش
بحلم والحلم لأمثالي
ولا باب ولا شيش
_________________

تقبل مرورى المتواضع على موضوعك الرائع

اخى مصطفى عدلى ازداد الموضوع جمالا بمرورك الجميل وانا مثلك

لأول مرة اقرأ للشاعر محمود ابوزيد الاسيوطى وهو شاعر جميل

ينتقى كلماته بحرفية شديدة وكلماته رائعة وفى الصميم واعجبتنى

هذه القصيدة فعلا فكم من حلم نحلمه ولكن مع ايقاف التنفيذ

شكرا فارس بنى هلال على المرور الجميل بالموضوع .

» أحلام مع إيقاف التنفيذ
» الزمالك يقرر ايقاف شيكابالا وبرادلي يتضامن مع شحاتة