حاجات يامه

موضوع: حاجات يامه الإثنين سبتمبر 26, 2011 5:30 pm

الشاعر سعيد شحاته

بنتغرب =
وحضن الشمس يتدارى ف خطاوينا
ونتقابل=
نبص لبعضنا حبة ونتصعب
عشان كدبة قالوها اتنين ما عشقوش بعض زيينا
وأعيش فاكرك=
وراسم بين رموش العين ملامح كدبة هدامة
وتنسينى برغم انك ما زلتى بتعشقى فيا حاجات يامه
كلام الشعر والتنكيت وغنوة تمللى أغنيها لثومة ف فيلم سلامة
حاجات يامة=
سجايرى الفرط لما أكتب نكت سكة
وضحكك لما بستأذن ولما تقولى رايح فين وأقول هفتح بلاد عكا
وجيبى اللى اتزرع جواه شوية قرشينات فكة
وقلبى اللى اترسم بسمك على الحيطة وع الدكة
وضحكة تمللى أطلعها وأخبيها
وأخاف يسرقها ديب واقف بيسرق ضحكة العشاق على السكة
وشخبطتى على الكلمة=
وخوفنا من الفيران فى الغيط ومن حواديتنا فى الضلمة
ومن شكى ما بين الرسم جوا ملامحك النيلى وبين لونى
ومن بصة عنيكى السودا لعيونى
وتنهيدك وتنهيدى=
ووقفة شعرى لحظة ايدك المرمر ..
..ما تلمس ف الهوا ايدى
وهزة شفتى يمك =
وهزة شفتك يمى ولا همك
كلام الناس هيجرحنا ..هيدبحنا ..
.تقولى ان أنتى شريانى وأنا دمك
ومش بدرى ولا بتدرى=
ورعشة جسمى لما يمروا كفينك على صدرى
ونتكلم كلام يمكن ما نفهمهوش
وكلمة تجر ميت حدوتة وحكاية=
وأنا بين النجوم والورد تايه فيكى يا آية
ومحتار فى السنين بالطول
ودايخ فى الساعات بالعرض=
وأقيم لك فى الصلا يمكن
تؤمينى ...تضمينى ...
تخلينى أحس ان الصلا (ف) حضنك عليا فرض
وبسأل نفسى معقوله تكونى زينا (م ) الأرض ؟
ولو كنتى =
سمانا دى سما لينا ولكن فوق ضفيرتينك سما وبجد
تايه فيكى يا آية=
سمانا دى عشان خاطرك سما مراية
وأنام حبة تهزينى
أفوق ماسك كتاب فى الشعر والتانى كتاب دينى
وقدامنا كتاب صاحبه ما هوش عارف
يفرق يعنى ايه عالمة وعلامة=
ونقراه ننفجر (م )الضحك أحس انك
ما زلتى بتعشقى فيا حاجات يامه=
تبصيلى ونتنهد ...ونتكى على ايدينا
تتوهى ف حضنى أتوه فيكى ونتدارى ف بعضينا

كلمات جميلة جدا يا ام شروق وانتقاء فى غاية الجمال

انا اول مرة اقرأ قصيدة للشاعر سعيد شحاته بس عنده

اسلوب جميل وانتقاء ررائع للكلمات .كل الشكر على

الانتقاء الجميل والرائع

اصل بالامس الشاعر سعيد شحاته

خد المركز الاول فى ساقية الصاوى عن شعر العامية

قلت نشوف ونعمل له تشكيلة

شكرا سعيد

» انا مسافر يامه
» حاجات فى الفيزيا خدناها
» فوازير شريهان حاجات ومحتاجات
» ياللا نجيب فى حاجات رمضان /زجليات رمضانية
» أسامى حاجات للشاعر سعيد حامد شحاتة