حدوتة شعب روووعة

الشاعر\سعيد شحاته

"مصر يا أمّه"
يا اللى كنتِ ملَبِّسانى
من زمن قفطان وعِمّه
يا اللى كنتِ معلّمانى
ف ساعة الغُمّه أستغمّى
يا اللى كنتِ بتجبرينى
إنّى أحضنك وأجرى أستحمّى
يا اللى كنتِ بتقتلى فيا الأمل بضمير وهِمّه
يا اللى كنتِ بتكسرينى ف لحظة الحسم المهمِّه
مصر يا إمامة الأئمه
مسلمين أو أهل ذمه
كلنا طالعين بنهتف ع السكك
من جيش لأمِّه
ضد غُمِّه
كلنا طالعين بنهتف ع السكك
من جيش لشعب لناس أبيِّه
ضد كل اللى انحنى وباع القضيه
كلنا طالعين بنهتف:
جمهوريه.. جمهوريه
كلنا طالعين محرَّكنا الحماس ع السمسميه
كلنا طالعين عشانك بالزلط والمدفعيه
بالقلوب الدافيه والجتت العفيّه
كل واحد فينا فارس
كلنا مش ثوْرَجيه
إحنا أولاد الطُرح والجلابيّه أم الكِمَام
إحنا أولاد بيرم التونسى وجاهين والشيخ إمام
إحنا أولاد البيوت العتمه وإقفاص الحمام
إحنا أولاد المزارع والمصانع
إحنا أولاد الكنايس والجوامع
إحنا جيش الانتقام
إحنا طلق الثوره فى إولاد الحرام
إحنا سيف ومسلّه ومشَنّة سهام
وإحنا قطَّاع الطرق وإحنا السلام
وإحنا بركان الغضب ساعة الصيام
وإحنا أحلامك وطيفك فى المنام
مصر يا مراية الكلام الحلو
يا عشوش اليمام
اللى مات فى الثوره عايش..
بس واقف فى الأمام
واللى عاش للثورة بيؤم القيام
واللى نادى بثورة شد لنا الحزام
واللى قام بالثورة..
ناس متعلمه ومن غير علام
يعنى ثورة شعب بيحب النظام
شعب بيؤدى التمام لتراب بلاده
شعب بيحرر ولاده
شعب بيبرّر حياده
شعب بيدرب جياده على العناد
"مصر يا أمَّ البلاد"
يا أم طاسه وقله وإشارة حداد
يا أم شُومه وفُلّه وعروق امتداد
اللى قام بالثوره واد بيشد واد
اللى قام بالثوره شعب بيبتسم ساعة الجهاد
شعب واقف يدعى ع النمرود وعاد
يعنى ثورة شعب كاره للموساد
شعب كاره..
للحياد المُر ولزيف الحقيقه
شعب عاشق..
راح يقدم روحه ويفادى العشيقه
شعب فجَّر ثورته يولَّع حريقه
شعب ما اتأخرش كَسْر من الدقيقه
من سُعاة القصر..
لشيوخ الطَريقه
طالعه أمتنا العتيقه
وعامله صُوله وصَولجان
بالملايه اللف واليشمك وكيس البرتقان
طالعه فلاحه بغلق من غير ودان
طالعه دلاله بحلق وبديل حصان
طالعه أمتنا العتيقه تؤمنا ف وسط الميدان
طالعه رابطه الرايه وصمام الأمان
طالعه بتسلحنا ..
بسيوف الإيمان والصبر والعهد الجديد
طالعه لأجل تحنِّى مصر الطيِّبه بدم الشهيد
طالعة تهتف بالجريد للنصر والشعب العنيد
طالعة م الزنزانه..
كاسره القيد وقضبانها الحديد
طالعة م الزنزانه..
تهتف عيد وعاده
مصر واقفه تباهى بولادها السِّياده
بس ليه ما اتمخضتش
بصوت يهز المنطقه قبل الولاده؟!
مصر يا سكر زياده
قلبى مخنوق م البلاده ولانحطاط
قلبى مخنوق م الوجع والذل لجام السكات
قلبى مخنوق ..
من وشوش الأنتيكات التايهه فى وشوش البنات
م الحاجات الدايره بتدوس ع الحاجات
من رصاص الموت وصمت الدبابات

م الجينات الخايفه وصمود الجينات
كلنا واقفين على حدود الحارات نهتف بقوِّه
مصر يا أرض النبوه
يا اللى واقفه معانا ضد الفتْوَنه وظلم الفتوّه
مصر يا أم النوَّه..
أجمد - م - المروِّه و - م - الكلاب
إحنا طين الأرض والطوب والتراب
إحنا ريحة الورد وسطور الكتاب
إحنا طرحه ولاسَه وشويِّةْ تِيَاب
إحنا ناب الحق وسنان الحساب
مصر يا اللى بتضحكى خلف الحجاب..
من غير حجابه
ثورتك..
ثورة وطن ضد الديابه
ثورتك..
ثورة وتر وقصيده وحكمدار نيابه
ثورتك..
ثورة ملايكه وخلق واقفين للعصابه
ثورتك..
ثورة نبى وثورة غلابه

شكرررررررررا ام شروق على القصيدة الجميلة

وهى حدوتة شعب عاش حياته فى ذل وانكسار فى

ظل خيانة من ابنائه ويحتاج للعود ليبنى نفسه من

جديد فليت ابنائه يساعدونه بدلا من ان يساعدوا

فى القضاء عليه

شكرا سعيد
وفعلا الشاعر جميل والقصيدة رااائعة

حرفيه عاليه جدا جدا جدا

وصور جميله ورائعه لحكاية شعب

اسردها الشاعر بكل دقه.......انا نفسي سعدت جدا

بقراءتها المتتاليه ...فلم اقراها مرة واحده فقط

شكرا زهره
.................

شكرا ابو جمال

ويبدوا ان ساقية الصاوى تفرز لنا كل يوم موهبة جديدة تستحق الوقوف والتصفيق لها

ربنا يبارك فيكم يا رب

شكرا أ/زهره على الطرح الرائع المتميز

لشاعر استطاعان يلخص انشدوه الثوره البريئه التى يحاول ان يدنس عبائتها المستنطعون

والمصلحجيه اصحاب المصالح الشخصيه والأجندات الخاصه

كلمات خرجت من قلب قلب العاميه التى كانت هى المحرك الاساسى للثوره

وتستحق دور االبطل بلا منازع كلمات بل طلقات وجهها الشاعر فى صدور النظام البائد

ورشها على صدور الثائرين مسكا ووضعها على رؤس الشهداء باقه ورود تكلل ارواحهم

الذكيه العطره التى اختارت الفداء من أجل ان نهنأ نحن بالحريه والكرامه

أ/سعيد حامد شحاته

سطورك عبرت عما يجول بخاطر كل من ينتمى الى مصر الثوره

سعدنا بطرح المتميز كما سعدتنا بتواجدك المتميز هنا عبر ومضات السها

تقبل منا كل التحيه والتقدير

» حدوتة الأرض والشهور القبطية
» أدرك وقتك ...روووعة
» ستاير روووعة
» ستاير روووعة
» كــن معـى روووعة