إلا النبى \ سعيد حامد شحاته

دا لأنك
أول واحد خشّ ضلوعى بجد وداس
ولأنك
أول واحد هدّ السد الفاصل بين الناس
ولأنك
أوّل بذرة حب اتزرعت جوّا الراس
ولأنك
أعظم كلمة أنا ممكن أقولها على الكراس
كلمة نبى
يا كل كائن فى ( الزمان اللولبى )
يا كل سلطان أجنبى
يا كل واحد
عاش غبى وهيموت غبى
الا النبى
أنا مش صبى وبيّاع كلام
عن أولياء الله وسيرة الأنبيا
ولا من هواة الضحك
فى وشوش الكلاب والأغبيا
ولا من هواة الهرتلة
ولا من هواة الأجوبة الفارغة
اللى مالهاش أسئلة
ولا نفسى أقف ع المدنة وأحدف قنبلة
أنا بس شفت المسألة
إن اللى شايلين الرايات واقفين غلط
وإن الكلاب فى الغرب قاعدين بالزلط
ومن العبط
إنك تشوف رايتك هناك متنكسّة
وإنك تشوف كل الجيوش متقدمة
وجيوشك أنت مكسكسة
وإنك تحطّ ايديك فى ايد متنجسّة
وإنك تطبطب فوق قلوب متيبّسة
وإنك تحسّ
إن الثوابت كلها طلعت فاشوش
وإنك تحس إن أنت من جواك هاموش
وإن الرتوش صبحت علم
وإن القلم عمّال بيكتب أجنبى
وإن الكلاب فى الغرب بيسبّوا النبى
يا كل واحد عاش أبى لدرجة ملاك
مين اللى خلاك تنحنى
مين اللى داس
على عودك المفرود وخلّاه ينتنى
يا كل واحد عاش أبى
يا كل كائن عاش غبى وهيموت غبى
الغرب بيسبّوا النبى
وأنا مكسبى العار والهلاك
الغرب راسم لامتلاك كل النفوس المتعبة
الغرب واقفين للرموز الطيّبة
يا دموعنا يا اللى أنتى تمللى قريّبة
هتفيد بإيه الطبطبة تحت الخيول
كل المعانى اتهلهلت جوّا العقول
كل الكلاب فى الغرب مقطوعة الديول
وولاد زناة الأرض بيسبّوا الرسول
وأنا نفسى أقف وأهتف وأقول
إن الشعوب الطيّبة مالت
وإن الكواكب كلّها انزالت
وإن العيار الفالت اتحكّم
مش جاى أقول الشعر وأتهكّم
أنا جاى أقول الحق
احنا خلاص داخلين زمان الرقّ
أنا نفسى أقول للأفعى جوّا الشقّ
إن الأساس خايخ
وإن السلام ويّا الكلاب بايخ
وإن الوجع شايخ على ضفاف القلوب
وإن الضمير جامد جمود الطوب
وإن الزمن مقلوب على دماغنا
وإن الكلاب نازلين على صداغنا
أنا نفسى أقول للأفعى لدّاغنا
إن احنا رغرغنا كما الأموات
وإن التاريخ قلّاب ماهوش فوّات
وإن السكات يمكن يكون خطّة
واللى احنا فيه دلوقت دا محطة
والقطر لازم يستقيم ويفوت
حق الرسول هنجيبه بالنبّوت
حق الرسول هنجيبه لو هنموت
حق النبى الغالى
أنا ليه بقيت بصرخ بصوت عالى
مش واقف أتفرّج
الناس فى سيرك كبير وبتهرّج
يارب يا مفرّج كروب الصدر
أنا ناوى أقوم وأدعى ف ليالى القدر
إنّى أتوهب لله ولأحبابه
وإنى ما أخبّط غير على أبوابه
وإنى ابتسم قدّام رسول الله
وأقعد معاه وأقعد مع أصحابه
يا رب تجمع قلبى فى رحابه
واجعل كتابه الأول الآخر
ليه الكلاب عمّاله تتقدّم
واحنا اللى ليه دايرين بنتّاخر ؟
مين اللى حطّ الردّة ع الفاخر
ليه البواخر نايمه ع المينا
ليه انتظرنا الغرب يدّينا ؟
ليه سيبنا بعضينا على السكّة ؟
الفكّة دايرة تهزّ فى جيوبى
والتوب دة مش توبك ولا توبى
التوب دا توب أمريكا والدنمارك
وأنا رافض التطبيع مع الخاين
الشمس طالعة ونورها مش باين
وأنا دمّى مش هاين ومش خوّاف
وها أقولها حرّة وعلّقولى النّاف
أنا كلّى شوق للساحة والسيّاف
أنا مش هشيلك تانى ع اللكتاف
ولا ناوى أخاف منّك وأطوف وأسعى
أنا عندى أشيل القصعة وأصبح حرّ
يغرق شراعك أو يطول البر
لازم ندوس ع الشر بالجزمة
لازم نقول سبّ الرسول أزمة
لازم نقف ويكون لنا لازمة
يا نموت فى وسط الحر من غير زاد
الغرب بيسبوا النبى يا ولاد
سَبُوا النبى يا عباد بتعمل خير
سَبُوا النبى يا اللى انحنيت للغير
يا كل طفل بيتولد بضمير
الغرب بيسبوا النبى
يا كل كائن فى الزمان اللولبى
يا كل واحد عاش أبى
لازم نقف ونقول لهم
الا النبى ***** الا النبى

صلى الله عليه وسلم

ويجب ان تكون هناك وقفة لنقول لهم الا النبى

كلمات غاية فى الجمال والروعة وفيها حس دينى

وغيرة على ما يحدث وما يُقال على نبى الله صلى

الله عليه وسلم . شكرا ام شروق على نقل القصيدة

الرائعة التى تدافع عن النبى صلى الله عليه وسلم

وكل الشكر للشاعر / سعيد حامد شحاته على

القصيدة الاكثر من رائعة

عليه افضل الصلاة واتم التسليم
اللهم اعز الاسلام والمسلمين
وانصر نبيك المصطفي الطاهر الامين
امين امين امين
شكرا زهرتنا ويجب علي المسلمين جميعا نصرة نبي الله محمد ختام المرسلين
عليه افضل الصلاة والسلام

الا النبى
استهانوا بكل شىء وتجاوزوا حدود الادب فى كل شىء
لكن عند النبى صلى الله عليه وسلم ملايين الخطوط الحمراء
الا رسول الله صلى الله عليه وسلم
شكرا سعيد
شكرا حماده

أنا ناوى أقوم وأدعى ف ليالى القدر
إنّى أتوهب لله ولأحبابه
وإنى ما أخبّط غير على أبوابه
وإنى أبتسم قدّام رسول الله
وأقعد معاه وأقعد مع أصحابه
يا رب تجمع قلبى فى رحابه

» عااايش\ سعيد حامد شحاته
» ميعاد مع ديك الفجر\سعيد شحاته
» للأمانة \سعيد شحاته
» ثورة نبى للشاعر سعيد حامد شحاتة
» كلام أخضر\ سعيد شحاته