وعلى القصد السلام

طَيَّرْت من بُرجي ..
سِرْب الحمام العُور ،
ورَسَمْت على سِرْجي ..
حِزْمة نمور وصقور ،
وشِرِبْت بير زمزمي ،
وشْبِعْت من جوعي !!.

قَلَعت تُوب العَبَطْ
ولْبِسْت رُوب الحَوَطْ ،
ونَتَرْت عن ضَهْري ..
تُقْل الحُمول الغلط ،

وبنَصْل وسواسَك ؛
مَنَعوني حُرّاسك ..
أرفع لِباب قلبي ،
سُقَّاطة التفكير
دَخَلِتْلي م الشبابيك ..
عاصْفِة غُبار نازي ؛
كَسَرِتْلي عُكّازي
وسَقيتْني خَمْر القَلَق ،
ورَميتْني بين شَطّين !! .

مَلَكْني ساعة زَهَقْ ،
كاشف كُنوز خيري
قال جاي يعيد ويزيد ..
سُلْطاني في زماني
عَشِّمْني وَعدُه بحَلَق ،
خَرَّمْت لُه وداني ،
وسَرَجْت خيل السَبَق
وهجرت أركاني
واما تِقِلْ سمعي ،
واحْوَلْ تصديقي
دَوَّقْني شَهْد الْمَرَقْ ،
واما جِري ريقي ..
قاللي الزَفَر بعدين ..
سَنِّيت أنا سناني
فدَفَس لي في خشمي ..
طَقْم بضروس السوس
وناولني عَضْمايَه !!.
إيه اللي كُنْتُه وكان ..
خَللا الهَدَد بُنْيان ؟!!.

وايه يا بُكْرَه يكون ..
لو طَبْ زلزالي ..
على الأساس الدون ،
وصَبْ بُركاني ..
على البُنا المايل ،
ومين يا أهل السند ..
قادر يكون المدَد
نزيل بإيدنا الْهَدَد ،
ونقيم أساس تاني ؟!!.

منقوول

اعجبتنى جدا هذه الكلمات الجميلة والمعبرة عن حال كل

من يبنى امال فيجدها كانت قصورا من الرمال وما هى الا

اوهام . شكرا ام شروق على الانتقاء الجميل

شكرا سعيد
والشاعر باين له صعيدى لهجته غريبه شويه

هو فعلا شكله صعيدى ي ام شروق لأن لفظ الخشم

ده متهيألى مش موجود غير فى الصعيد ويمكن فى

اليمن كمان فقط لكن الاغلب انه يكون صعيدى لأن

معظم الكلمات عامية صعيدية تقريبا