قصيدة الريف

موضوع: قصيدة الريف الأربعاء أكتوبر 19, 2011 1:37 pm

بتقولى اوصف لى بلدكوا

يعنى ايه الريف؟

اقولك

كفاية انك تفطرى بريحة الرغيف

او فطيرة فى قلب فرن

او عيال بيلعبوا فى الجورن

ابدأ معاكى م الشروق

كفايةافوق

على زقزقة عصافير

كانت شمس الصبح منها تغير

لما تجى لى على شباكى المفتوح

ومن كسوفها مكنتش يوم تقدر تبوح

لما تسبق ضيها

وتجى لى لحد سريرى

انا عصفورة جوايا حبايا من غيطك

فكان لازم ابات واصحى داخل بيتك

انا فلاحة ذيك بردوا

عملت العش داخل ارضه

و صار خوفه على قشى

كما ترابه كما عرضه

كأنى بقت له من اهله وبعد دا كله

بتقولوا بتنده له

شوفوا عشايا كات حباية من طينه

ومن اسبوع سقط من خده وجبينه عرق مالح

كان لعشايا امبارح

فنا جياله كل صباح

لان فى حقى لو جت نومة عالفلاح

ولسة معاكى فى الشروق

انا نفسى افوق

على صوت هدوء

وتزعجنى فى الصبحية حباية ندى

تسقط على ايديا ببوسة م الفضا

بتقولى دا معنى البكور

انك تشوف النور قبل الشمس ما تشقق

انك تشوف الخير فى بوق الطير

فتصدق

ويبقا ايمانك بان الطينة عنوانك

وان البذرة الوانك

تلون بيها ارض الغيط

فتطرح ساعة شىء اصفر

وشىء احمر

واكل وخيط

من قطن لوزته مفتحة

نجمعها فى ساعة الضحا

ونشيد على لسانه نقوله هيلا هيلا

ولو يذيد الحر ندوبه فى ضليله

ونحب لو يجى التعب

فى يوم حصاد القمح ولا الرز ولا جمع العنب

لما يخش الضهر ونتغسل بالعرق

ونتدارى من شمسنا

بين الفروع والورق

ونطلع على راس ارضنا

لترعة ماهياش غويطة

اهو نبرد جسمنا منا قلت لك

حياتنا ابسط من بسيطة

ويجى غدا مالبيت فى الايالة

واى حد يعدى يتقالوا تعالى

وكان عشتنا دى جوة الدار

الفرق انك عاليمين تلقى مية وعالشمال تلقى خضار

وكل شىء فى الغيط تلاقى

زرع مشتاق للسواقى

تروى عطشه لما جاله حر لطشه

وقال

يا مية لما غفلنا شوية

وكأننا نايمين فى قصر

وفوقنا على صوت الادان للعصر

نكمل الشغل بهداوة

بعد ماتهل التراوة

هو دا شغل العصارى

ويحلى التسالى ويا جارى

واشوف زرعته ومهما كان بينا زعل باقية فى قلبى محبته

ايوة كان بينا زعل

ماهو للاسف انه انشغل

فى غيابى انه كان يراعى

الارض

بس مالهوش داعى

وكل دا راح بالسلام والرد

مالطينة واحدة والتراب

مفصول بحد

يدوب مننا وفى يوم السقية

واروح اغير جوة ارضه الجلابية

لما تهل علينا ساعة المغربية

واحلف عليه بميييييييييت يمين

عند العشا يقول امين

وارجع لدارى واحلى لمة

وحضن ابويا وشوق عيالى

واخواتى ومتخافيش

عمرى ماهنساكى يامة

جى ريحك عالمصطبة

وتزيحى همى بالطبطبة

ونقعد نناقر فى اللى رايح واللى جاى

وتتفرش حصيرة السهر

بعد العشا والشــــــــاى

ويجى وقت الحكاوى ونحكى

مش مهم هننبسط ولا هنبكى

كفاية نومة عالفضفضة

والسر يبقا فى بيتنا علم

الريف دا نعمة ربنا الريف دا حلم

فنا مش لاقى وصف فى ريفى

كفاية ان شتايا هو صيفى

منا فصول السنة زرعى وخضاره

انا عند الغريب يختاره له داره

ممكن تلاقى البساطة فى الطرق

والبساطة فى الهدوم

حتى البساطة فى حلم جوة النوم

اوعدك بارض مش متسفلتة

ولا فيها رصيف

ولا فن العمارة

بس اوعدك

تشمى من جوة ترابى دا ريحة البكارة

وهتعرفى معنى الشرف

ان فلان لو مد ايده هيتعرف

لو قل ادبه هيتعرف

والمريض له عندنا حق الزيارة

ليه لما جيتك احتجتى منى ميييييييت امارة؟

انى اقول الصرخة اااااااااااااااااااااااااااااااه

لقتها جواكى رخيصة اووى الحياة

علشان كدة بريفى راضى

يعنى اخويا فى شدته اكون له فاضى

وان جارى يلاقى قوته جوة دارى

وان عزمه يتولد لى فى انكسارى

شوفى الطيابة والعزة جوة ناس غلابة

همها يعدى النهاردة ويجى بكرة

بالحلال

والستر فى المال والعيال

وعايشين الحياة بالفطرة

انا شاب ريفى

اللى كان بينك وبينه

عرض طينه

ليه هجر

فنا فايت العمار

جوة الحصار والزيف

ماهو مستحيل الريف يتباع بالحضر

الشاعر\محمود ابو العينين

فعلا ... مستحيل الريف يتباع بالحضر فللريف مميزات

لا يشعر بها الا من عاش فى الحضر بكل عيوبه . شكرا

ام شروق على القصيدة الرائعة للشاعر /محمود ابوالعنين

وفى انتظار المزيد من اعمال الشاعر الجميلة

بالتأكيد الريف رغم بساطته وقلة امكانياته

الا انه يتصف بالعديد والعديد من المميزات

التي تجعله افضل من الحضر فيكفي ما فيه

من هدوء وخضرة ومزارع وهواء نقي بعيد

عن عوادم السيارات والمصانع وضوضاء

المكن والتروس

وملئ بالتماسك والترابط فيما بين اهله

فالكل معروف وليس هناك من هو مجهول

لذا اذا سرق احد او اخطأ فان الجميع يعرفه

ولا يهرب بفعلته كما يحدث في الحضر .

شكرا ام شروق علي هذا الاختيار الموفق

الريف نقاء بكل ما فيه
ليس من عوادم سيارات ولا ضوضاء ولا تلوث
انما نقاء داخلى لازال يثمر فيه بعيدا عن دنيا الزيف والمكر والخداع والمادة التى طغت
حتى انها حاولت اختراق الريف لكنها لم تستطع التغلغل فيه بقوتها
شكرا سعيد
شكرا ايمن

» قصيدة دار المسنين
» قصيدة حب
» قصيدة من وحى الهجرة
» قصيدة اجهلكِ
» قصيدة كراملة