بكره أحلى يابلدي

عدد المساهمات : 1 العمر : 62

بكرة أحلى يا بلدي

وترقص حروف القلم
بين الصوابع
تهتف وتصرخ بحبك يا بلدي
يا أرض الجوامع
يا أرض المصانع
وأرض اللي بزرع
ويضرب بفاسه أرض المحبة
تطرح غناوي
في أرضك يا بلدي
طلعت شموسنا تصبّح
وتحضن في كل المواني
فجرالليالي ... زقزق وجانا
وشقشق ونوّر ... وقال كلمته
مصر حتبقى رمز الخلود
رمز الكرامة أرض الجدود

مهما اتظلمنا
مهما اتسجنا
مهما اتسحلنا
بنصبر ونصبر
لكن نحذّر...
نفهّم ..
نقول
ولما الحكاية تبقى عصابة .... عصابة جنون
يجي الطوفان
وتطلع خلايق تنور شموسنا ويجي النهار
وتبقى العصابة شوية فيران
وتفضل بلادنا بلاد الامان
وغنوة قلوبنا في كل الزمان

ياناس يا قصايد....
يا كل الشموس
صبرنا .... صرخنا بوجه الطغاة
قالوا علينا شوية عيال
وقالوا سبوهم دي حمقة شباب
وهاتوا منهم شويه لأكل الكلاب

كانت عيونا... بتبحث علينا تدور
وتمشي الخطاوي برغم السلاسل
تشد الشموس تيجي تنور
نفكر في لقمه
نفكرفي هدمة
وغرفة تلم الولاد
والست اللي عايشة لابسه الحداد

عصابة سيادته تنهب وتاخد
ولما عيالنا تكبر يا صاحبي
تطفش ... تسافر
فيه اللي يغرق
وفيه اللي يفضل مهاجر
وآه مصر يا أرض المزاهر

كانت عصابة سيادته
تنهش وتاخد
تسرق تبيع
تاخد فلوسنا
وبره بسرعه بسرعه تضيع
كانت تلمع في سيرته
تقول وتكدب
إن البلدي دي صارت حياتو وعيلته
يأمر وينهى والحقيقة كان عميل وقال إيه سيادته

سرقوا الدهب
باعوات بلاش غازنه
نهبوا المتاحف
مخلوش ولا حتى خزنه
باعوا البلد يا خلق هوووووه
علشان واحد نتنياهووووووه

البلد مش بلد اللي يخونها
واللي يبيعها للأعادي
وفي كل يوم يدبح كرامتها
ويزور صبحها النادي
ويعري جسدها للي رايح واللي غادي
آه يا بلادي يا بلادي

قولنا للفجر يطلع ويمسح ضلمته
وجبنا الشمس تفضح حضرته
وتسكته
هو وعصابته المجرمة
قولنا ناخد حقنا ونقول للدنيا
دية أرضنا
مش حتفضل عزبته ولا يوم حتبقى حتته

دي مصر الغلابة الشقيانين
والتعبانين
والمعجنونين في تراب شوارعها الحبيبة
واللي سهروا يشوفوا بكره في حضنها
علما وفقها .....
وحريم شباب بنات وطلبة
كل ولادها فيها بحبوا أرضها
بيحبوا نيلها ورملها
والصحرا فيها الخير بطولها وعرضها
والسما ونجومها السهرانين في عشقها
عرفانا وسكنا قلوبنا
وهيا نبضها
بكره أحلى يا بلدي
بكره حلم العمر
يطرح ورد وجناين فل
وشمس بكره حتحلا
علينا لمّا تطل
وتبقى مصر جميلة
وتبقى زي الفل
ونقول دي مصر جنة ربنا
دي مصر حته مننا
دي مصر ست الكل
بكره أحلى يا بلدي
بكره أحلى يا بلدي

بقلم عوض خاطر 12/7/2011

ويضرب بفاسه أرض المحبة
تطرح غناوي

تشبيه جمالى رهييييب
قصيدة معبرة عن حال الشعب والقهر اللى كااان
شكرا لك على القصيدة الجميلة
واهلا ومرحبا بك

كلمات جميلة يا استاذ عوض تسلم ايدك

واكيد بكره احلى ان شاء الله واهلا وسهلا

بك فى ومضات السها

قصيدة رائعة جد ا

وان شاء الله الغد افضل من اليوم

ونري كل شئ يرجع بثوب جديد ملئ بالخيروالهناء

لشعب مصر الباسل الذي لطالما كان صابرا ابيا

متحملا لكل الشدائد والظلم الذي وقع عليه

شكرا استاذ عوض خاطر علي هذه القصيدة الرائعة

ومنتظرين منك المزيد والمزيد ان شاء الله

ولما الحكاية تبقى عصابة .... عصابة جنون
يجي الطوفان
وتطلع خلايق تنور شموسنا ويجي النهار
وتبقى العصابة شوية فيران
وتفضل بلادنا بلاد الامان
وغنوة قلوبنا في كل الزمان

تشبيه قمه في الجمال وهو لسان حال الجميع
ستبقي بلادنا في امان ولن يستطيع اي شخص ان
يستبيح حقوق الشعب المصري العظيم ولا يقدر
علي ارادة شعب فهو كالطوفان وينطبق عليه
اتقي شر الحليم اذا غضب
شكرا استاذنا الفاضل علي الموضوع القيم