ثورة نبى للشاعر سعيد حامد شحاتة

"مصر يا أمّه"
يا اللى كنتِ ملَبِّسانى
من زمن قفطان وعِمّه
يا اللى كنتِ معلّمانى
ف ساعة الغُمّه أستغمّى
يا اللى كنتِ بتجبرينى
إنّى أحضنك وأجرى أستحمّى
يا اللى كنتِ بتقتلى فيا الأمل بضمير وهِمّه
يا اللى كنتِ بتكسرينى ف لحظة الحسم المهمِّه
مصر يا إمامة الأئمه
مسلمين أو أهل ذمه
كلنا طالعين بنهتف ع السكك
من جيش لأمِّه
ضد غُمِّه
كلنا طالعين بنهتف ع السكك
من جيش لشعب لناس أبيِّه
ضد كل اللى انحنى وباع القضيه
كلنا طالعين بنهتف:
جمهوريه.. جمهوريه
كلنا طالعين محرَّكنا الحماس ع السمسميه
كلنا طالعين عشانك بالزلط والمدفعيه
بالقلوب الدافيه والجتت العفيّه
كل واحد فينا فارس
كلنا مش ثوْرَجيه
إحنا أولاد الطُرح والجلابيّه أم الكِمَام
إحنا أولاد بيرم التونسى وجاهين والشيخ إمام
إحنا أولاد البيوت العتمه وإقفاص الحمام
إحنا أولاد المزارع والمصانع
إحنا أولاد الكنايس والجوامع
إحنا جيش الانتقام
إحنا طلق الثوره فى إولاد الحرام
إحنا سيف ومسلّه ومشَنّة سهام
وإحنا قطَّاع الطرق وإحنا السلام
وإحنا بركان الغضب ساعة الصيام
وإحنا أحلامك وطيفك فى المنام
مصر يا مراية الكلام الحلو
يا عشوش اليمام
اللى مات فى الثوره عايش..
بس واقف فى الأمام
واللى عاش للثورة بيؤم القيام
واللى نادى بثورة شد لنا الحزام
واللى قام بالثورة..
ناس متعلمه ومن غير علام
يعنى ثورة شعب بيحب النظام
شعب بيؤدى التمام لتراب بلاده
شعب بيحرر ولاده
شعب بيبرّر حياده
شعب بيدرب جياده على العناد
"مصر يا أمَّ البلاد"
يا أم طاسه وقله وإشارة حداد
يا أم شُومه وفُلّه وعروق امتداد
اللى قام بالثوره واد بيشد واد
اللى قام بالثوره شعب بيبتسم ساعة الجهاد
شعب واقف يدعى ع النمرود وعاد
يعنى ثورة شعب كاره للموساد
شعب كاره..
للحياد المُر ولزيف الحقيقه
شعب عاشق..
راح يقدم روحه ويفادى العشيقه
شعب فجَّر ثورته يولَّع حريقه
شعب ما اتأخرش كَسْر من الدقيقه
من سُعاة القصر..
لشيوخ الطَريقه
طالعه أمتنا العتيقه
وعامله صُوله وصَولجان
بالملايه اللف واليشمك وكيس البرتقان
طالعه فلاحه بغلق من غير ودان
طالعه دلاله بحلق وبديل حصان
طالعه أمتنا العتيقه تؤمنا ف وسط الميدان
طالعه رابطه الرايه وصمام الأمان
طالعه بتسلحنا ..
بسيوف الإيمان والصبر والعهد الجديد
طالعه لأجل تحنِّى مصر الطيِّبه بدم الشهيد
طالعة تهتف بالجريد للنصر والشعب العنيد
طالعة م الزنزانه..
كاسره القيد وقضبانها الحديد
طالعة م الزنزانه..
تهتف عيد وعاده
مصر واقفه تباهى بولادها السِّياده
بس ليه ما اتمخضتش
بصوت يهز المنطقه قبل الولاده؟!
مصر يا سكر زياده
قلبى مخنوق م البلاده ولانحطاط
قلبى مخنوق م الوجع والذل لجام السكات
قلبى مخنوق ..
من وشوش الأنتيكات التايهه فى وشوش البنات
م الحاجات الدايره بتدوس ع الحاجات
من رصاص الموت وصمت الدبابات
م الجينات الخايفه وصمود الجينات

كلنا واقفين على حدود الحارات نهتف بقوِّه
مصر يا أرض النبوه
يا اللى واقفه معانا ضد الفتْوَنه وظلم الفتوّه
مصر يا أم النوَّه..
أجمد - م - المروِّه و - م - الكلاب
إحنا طين الأرض والطوب والتراب
إحنا ريحة الورد وسطور الكتاب
إحنا طرحه ولاسَه وشويِّةْ تِيَاب
إحنا ناب الحق وسنان الحساب
مصر يا اللى بتضحكى خلف الحجاب..
من غير حجابه
ثورتك..
ثورة وطن ضد الديابة
ثورتك..
ثورة وتر وقصيده وحكمدار نيابة
ثورتك..
ثورة ملايكه وخلق واقفين للعصابة
ثورتك..
ثورة نبى وثورة غلابة

قصيدة جميلة جدا

وبالفعل كانت الثورة هي نقطة الالتقاء ولم الشمل

التي جمعت كل طوائف الشعب المصري بإختلاف انتمائاتها وطوائفها

وباختلاف مستوياتها الثقافية والمادية وبأختلاف عقائدها الدينة والفكرية

فكان الجميع علي قلب راجل واحد ( في حب مصر )

شكرا سعيد علي هذا الاختيار الموفق

وكل الشكر للشاعر الكبير / سعيد حامد شحاته علي هذه الكلمات الرائعة

شكرا ايمن على المرور الجميل بالموضوع والثورة

المصرية كان لها مذاق خاص لأنها ضمت كافة طوائف

الشعب المصرى بلا استسناء ونشكر الشاعر سعيد حامد

شحاته على الكلمات الجميلة