أسامى حاجات للشاعر سعيد حامد شحاتة

نسيت نفسى ؟

ما نيش ناسى

وكل الناس دى مش ناسى

دا أنا فلاح

من الأرض اللى ولداكى

وأنا الواد اللى خلّاكى

تدوسى برجلك الحافية على راسى

هنا أول حواديتى

بدت م الساقية والطينة

ودا مش عار

وليل لحظة مخاض الشمس

نبّّتنى فى ركن الدّار

بقلبى اللى اتملى زينة

من الترعة وم الهدّار

وشعرى اللى انفرد ضلّة

على العشّة وع الدوّار

دا أنا أسقف لك رموشى بيوت

وأخلّى ضلوعى ألف جدار

وحتّة نار

يدوب منّك تدفينى فى ليل ساقع

وواد دمه عسل صافى

وواد دمه كدا فاقع

وبنت بتلبس التوكة

على ضفيرة تغطّينى

وبنت بتلبس التوكة

على راس شعرها واقع

وطفلة تمللى تلعب لى فى كرّاسى

نسيت نفسى مانيش ناسى

وكل الناس دى مش ناسى

..........

بدمّى ودم كل فقير

بنكتب كل شئ فيها

حكاياتها ومعانيها

وحالفين يابه ع المصحف لنحميها

ولو كان التمن جسمى

يموتوا الناس على ترابها

ويفضل اسمها واقف ومتسلطن على اسمى

ماهيش أم البشر دولت

دى أمى

وأمى أنا رسمى تسمّى عليّا بالرّاحة تدلّعنى

وتسهر جنبى لمّا أرضع تبلّعنى

وتقرا الفاتحة فى ودانى

وفاكرانى

مانيش فاهم ولا معنى

ولمّا تنام وتحضننى

لا كون ولا دنيا بتسعنى

ما أنا عيّل وفى اللّفة

ولمّا أشهق بتتشاهد

وترفعنى كدا بخفّة

أقول الآه

ترضّعنى من النيل اللى داير يجرى جوّاها

كلام موزون

وتقرالى تاريخ ( أحمس )

وقصة عمنا ( توت عنخ )

وحكاية الهرم ( خوفو )

وبضحك لمّا تحكى لى عن ( أكتوبر )

وأنا محزون

وأطلّع شئ من المخزون

هنا دارى

فى ريح توتة

عليها تمن تاريخ ماضى ومتقيّد

ودى دار ستنا خضرة

ودى دار عمّنا سيّد

بتستنى وبنغنّى

حبيبتى الغالية والعالية عن المخاليق

أنا اللى تمللى بتشعبط

فى باب الأوضة والتحاليق

وبلبس لك فى لبس يليق

وبعطش حتى لو هشرب

محيط ميّه من التحاريق

بقول اسمك

يبل الريق

وأنفض نفسى م المتكرّر الحامض

وأشكّل لك كلام غامض

ما حدّش يفهمه غيرك

أنا عطشان

ونفسى أشرب

خنان بمورد من زيرك

أنا طيرك وطيّارك

وجارك لحظة الشدّة

بتوه دايما فى تغريبتى

وحضنك بعمله ردّه

وأنام على صدرك الطّيب

وأبوس فى شفايفك الماسى

نسيت نفسى

مانيش ناسى

وكل الناس دى مش ناسى

دى ناس تانية

لا تعرف ايه بلاد طيبة

ولا النّوبة من المنية

ولا الضحكة من الآهه

وأهى سجلات بتتعبّى وتتفضّى

ويحشوها وفى الآخر

بتبقى أسامى مالياها

أسامى حاجات

ديكور بيكمّل الدنيا

ويعطفنا على جملة ف كلام بايخ

ما لوش لازمه

تقول شاعر

تحسّ بقلبك الشايخ

وليل أزمة

تحس بنار بتحرق كل شئ فينا

مواويلنا وغناوينا

تشجعنى

تقوللى نعد
ّى للعالم

أقول لك مين

يا صاحب البين يعدّينا ؟

غير الرب اللى خالقنا

على السكة عفار طاير

ولما نزوغ يسابقنا

حاجات مكتوبة فى سجلات

يا دوب علشان تلاحقنا

تضايقنا

ولو شافت أمل لينا

بتخنقنا

تقول نوصل

يجوز نوصل ولكن فين ؟

دى مش أوّل خطوط اليأس

دا البؤس اللى جوّانا

وع الدّانة وفى القارب

أكيد لازم هييجى اليوم وراح نوصل

مادامت مصر جوّانا

وحضنانا وبنحارب


سعيد حامد شحاتة

روووووعة
اجمل ما فى القصيدة ريحة بلدنا الطيبة والحياة البسيطة
والارض والزرع وتعبيرات الفلاح الاصيل
شكرا سعيد
وشكرا للشاعر سعيد شحاته

قصيده في قمة الجمال والروعه
تسلم لنا ياسعيد
والشكر لصاحب الكلمات الجميله الشاعر سعيد شحاته

ابوحسام

ام شروق

كل الشكر على المرور الجميل والشاعر سعيد شحاتة

له العديد من الاعمال الجميلة سواءا العاطفية او الوطنية

وسنحاول ان ننقل اغلبها ان شاء الله