الاسطى حندق فى راس السنة

الاسطى حندق فى راس السنة

الليلادى فى راس سنتنا
سهرة لكن تبقى إيه
فيها روقة البال ياحندق
تسوى ميت مليون جنيه
عيش فى عمرك ليلة واحده
الفلوس لزمتها إيه
وإنت جيبك فيه يا حندق
أربعة وخمسين جنيه
يعنى أبقى فى النزاهة والوجاهة
أحلى من أجدعها بيه
وانت وياك نص مـّـيه
واللى طالبه حتلاقيه
روح ومدد فى التياترو
وقوم ونام ماتقولش ليه
وزع المشاريب وهيص
إنت واخد منها إيه
إنت رايح تصرف إيه
يعنى راح تصرف تلاته ، وللا خمسه
وللا عشره ..
قول يا شيخ عشرين جنيه
هى ليلة .. بس ليلة
تبقى وسط الناس دى بيه
هى يعنى السهره إيه
مش قزازه .. ومزه ترمس
قول وفنجان نسكافيه
والتياترو حيبقى زحمه
رقص إيه .. والمغنى إيه
المهم غزالتى سرحت
رحت لابس بنطلونى
خدت عجلة عبده اخويا
رحت حاجز .. دخلونى
قلت آكل .. أكلونى
قلت أشرب .. شربونى
قلت افرفش .. فرفشونى
وابتدت تتـقل دماغى
والكرى يداعب عيونى
قلت أنا أجدعها مجدع
ريحونى
وآخرة السهره الجميلة
بالفاتورة فوقونى
قلت عاوزين منى خمسه .. وللا عشره
وللا عشربن .. خلصونى
قالوا مطلوب خمسميه
قلت يا خلق الحقونى
هم خمسين اللى حيلتى
فتشونى
هى لحظة وبعد ثانية
غبت عن وعيى وظنونى
الفتوات العداله
فوق بلاطها مرمطونى
اللى لكمه ، واللى عضه
واللى مزع بنطلونى
حتى عجلة عبده اخويا
كسروها وكسرونى
فوق قفايا الدق نازل
قلت ياناس ارحمونى
والقفا ساعة ما يسخن
لون عنيك يصبح لمونى
والكفوف تنـزل تطرقع
مدفعيه الكترونى
ثم قالوا هيـله بيـله
فى الزبالة وطوحونى
ملتقتش أى واحد .. وللا واحده
خلصونى
اللى قال يطلع حرامى
واللى قال شحات بارات
واللى قال لأ .. لأ يا سوسو
إنفصام شخصيه عنده
نفسه يبقى من الزوات
واللى قالت يا .. يا مامى
تلتـقاه سفاح بنات
واللى شاورت شوف ياتوتو
بنطلونه ( أولـد ) خالص،
والقميص مليان حاجات
بعدها عرفت الحقيقه
وانكشف عنى الحجاب
بعد ما شربت الطريحه
بالجزم بعد السباب
قلت ترسو .. يروح لترسو
هو ده فصل الخطاب
وآدى حفلة راس يا حندق
بعدها شفت العذاب
قوللى مين قالك تقرب
تنحشر وسط الكلاب
إنت فاكر إن صنفك
فى المكان دا له حساب
إنما دستورنا واحد
والسياده فى الكتاب
كلنا يا مصر سيد
فى الخطب والانتخابات
إنما فى السهره .. لأ
كل صنف وله دولاب
مين يقول ان المدمس
زى كفيار أو كباب
إنت أيوه صحيح مواطن
أنما إيش جاب لجاب
هم .. هم .. واحنا .. واحنا
كل شخص وله مناب
إحنا نفضل .. زى ما إحنا
فى الشكايه والعذاب
أما هـمّ .. ألف رحمه
والدعاء المستجاب

منقوووووول

قلت آكل .. أكلونى
قلت أشرب .. شربونى
قلت افرفش .. فرفشونى

الاسطي دا رايق قوي قوي يازهرة هههه
شكرا بجد علي الموضوع وكلماته رائعه
تحياتي زهرتنا الغاليه

بس فى الاخر فسحوه الرايق
وعرفوه مقام الغلبان ايه لما يطمع فى توب غير توبه
شكرا عبقرينوو

» يا بخت من قدر وعفى ..دا رأى الاسطى زلطة
» عندما يجتمع باسم يوسف و الاسطى زلطة من اجل تحليل احداث ماسبيرو فماذا يحدث
» على راس السنة قلة قناوى
» رمضان السنة دى
» لا تتزوّجي في هذه الأيام من السنة