فى ذكرى ميلاد الزعيم عبد الناصر 15 يناير

مربعات معاصرة (1)
تاه النــــــدم باكى أسير ســـراب انـــعدم
حار الألم ف تلذذه عند العذاب بعد القدم
سقط العلم مذلول ملطخ باللى خطه القلم
معلول بأرض بطونها صابها النضوب م السقم
...................................................
فاضحه حقيقة القبح متستره بعورة
محبوس يا طير الحق مستنظر الثورة
شايلة بريق مستقبل لأجيالنا الجاية
تقلع جدور العفن تنزع سموم حيه
(ومستــــــــــــــنظـــــــــــــرين)
......................................................
(الرجال الآن)
شاب الرجال فى شبابهم واتبدلوا عواجز
يستفحلوا فى مجالسهم يتوصفوا كعوانس
وامروا نسوانهم يتوحموا ع الفارس
اللى برا جدودهم م البؤس والحابس
........................................................
(دعاء العجزه)
طوق النجاة انكسر واتبقى منه حطام
مرفوع فى صورة علم من تحت منه ضلام
ياللى أنت كنت الأمل فك العمل معقود
مدفون معاك فى القبر سارى بقاله عهود
.........................................................
(بيان من الآخرة)
الفارس الفانى عاد للتراب مأزوم
واللى اندفن فى القبر محاله منه يقوم
حامل معاه سيفه مصقول بهيبة الحلم
الــلـى اتقتــــــــــل معــــــــــــدوم
..........................................................
(وبرده البطل حى)
عاجز وعاء الجسد قدام شموخ الروح
زال الكيان للأبد والحى منه طموح
ساكن ضمير الأمة يزعق فى وقت الغمة
يمد المخلصين بالهمة ويداوى فينا جروح
............................................................

(2)(قبل كل شئ)
أنا مصرى ناصرى
من يومى
إصراره ناشب
فى هدومى
يأزرنى دايما فى الشدة
يشاركنى فرحى
و همومى
إن حس فيه
لوع وخنوع
يفزعنى واقف
من نومى
ناصرى وافتخر
..............................................
(3)عودة إلى الماضى
(وصف)
ثاير وشايل أحلامنا
بيخوض بنفسه
فى قلب النار
عروقه تنبض
بالثورة
ضد جحيم الاستعمار
وعقله مشغول بالفكرة
ازاى نطهر الامصار
رمزى
جمال عبد الناصر
..........................................
كان صرخة تدوى ضد القهر
وضياء فى وسط غيم الدهر
ناصر
يا حامى ذوات الفقر
يا جمال
يا نصرة المظاليم
..........................................................
(البداية)
فارس وكان مقدام
انسان شجاع ونبيه
جاى فى زمان اسود
خلصنا من بلاويه
ماسك بأيده الشمس
زايل غبار الأمس
ينهى عهود الهمس
وعصر كلمة (بيه)
هاتف بأعلى الصوت
(أرفع رأسك يا أخى قد ولى عهد الاستعباد)
.........................................................
جاى من الماضى البعيد
يسبقنا فى المواعيد
حامل بشارة عيد
وأمانى تتحقق
كان شئ ما يتصدق
وحدة ما تتفرق
وجموع شعوب
مبتهجة بالحلم
تتعلق
..................................................
(فى زمنه وفى حينه)
ياما معجزات
وقته حصلت
وآمال وخابت
و أنكسرت
ورغم ده
مصر صمدت
أبدا
ما هانت
ولا خانت
..................................................
(أسألوا التاريخ)
أصبح تاريخنا مغاير
بيصد كل جاير
وبيعدل فى المصاير
وبيرد الحقوق
كانت منبر تحرر
بيفوق كل تصور
بتقود كفاح تطور
ماشية فى طريق من نور
كان الزهو فى كلامنا
كانت العزة فى سلامنا
وعلو أصداء آدانا
بتعلن إنه زمنا
وخروجنا من الجحور
................................
(4)مشاهد من النهاية
(الطبيعة)
انتحبت الخضرة
من قسوة القدرة
واستوحش الوادى
من عتمة الآتى
والنيل بيتحسر
ب لوعة المحروم
.........................................................
(عزرائيل)
وسط ارتعاش القوم
من طلة المكتوم
بات عزرائيل يصرخ
باكى بفؤاد مكلوم
نادم على فعلته
ليوم ما القيامه تقوم
يحضن فى كفن الجسد
دامعه عيونه الدم
ينهش فى جلده اللوم
قايل :_
لا كان بايدى الحياه
ولاكان بأمرى الموت
دى مشيئة الجبار
مالك الملكوت
تنفذ سهام القدر
من غير سؤال وجواب
متغلفة بالحكمة
اللى محاوطها
سكوت
............................................................
(الجماهير)
فيضان حشود بيسير
وقلوبها حالها عسير
مش واعية ايه بيصير
ونهايته انهى مصير
ادى الشهيد انقتل
بعد ما عضده انفتل
من هم لا يحتمل
وحمول تهد جبال
ولاعدش فيها رجوع
أصل الرجوع ممنوع
رغم الهتاف موجوع
بيقول له عود يا جمال
............................................................
(آهين وآه)
ومصر لابسه سواد
فى ليلة زفاف عواد
بجيوش تدق الكعب
تأذن بنهب الشعب
وجوازها من قواد
وآهين وآه يا بلد
آهين وآه ياجمال
...................................................
بقلم : محمود صابح
-------------------

رحم الله زعيم الامة الرئيس الراحل المصرى جمال عبدالناصر

الذى رحل جسدا ولكن تظل روحه ترفرف فى عالمنا فلم ولن

ينساه الشعب المصرى والعربى بل والعالم اجمع .شكرا استاذ

محمد ابو العبادى على الموضوع القيم وعلى المجموعة الجميلة

من الرباعيات وعلى تذكيرنا برجل لم ولن ننساه ما حيينا .

رباعيات ولا اروع ولا اجمل من كدا والله
رحمه الله واسكنه فسيح جناته
هذا الرجل بحق ابن صعيد مصر الغالي
الرجل الذي عرف الحق ودافع عنه لااخر لحظه
الزعيم بحق جمال عبدالناصر
شكرا جزيلا عمنا الاستاذ الكبير محمد ابو العبادي
علي الموضوع الجميل

رحم الله الزعيم جمال عبد الناصر

الذى احب وطنه وشعبه وقضيته واخلص

لهما فقابله الشعب حبا بحب واخلاصا

باخلاص

وشاكر لك اخى سعيد مرورك الطيب

الذى اضاء الموضوع

خالص تحياتى ومحبتى