منايا تفتحى بابك

منين ابدأ كلامى
ومين
هيسمع صوتى ونِدايا؟
ليالى العمر بتعَدّى
وانا وحدى
وجوّايا
وأقول أحلم .. الاقينى
بتوه فيّا
وفـــ سنينى
وأقول أبكى ..
ما لاقى غير دموع جافّه
وآههَ فى الضلوع
واقفه
وسيل أحزان بقاله زمان
بينهينى ويتشفّا
انا طير الهوى المدبوح
انا القلب الِ بات مجروح
انــا صـرخـة يـتـيـم عــايــش
بيشرب من دَمُهْ المسفوح
انا اللى الظلم آسرنى
وساكِنى
وحالف ع البُكا ما يبوح
انا الِ الفرح هاجرنى
وهاجمنى
وخد منى حياة الروح
على صوت الألم فيكى
صحيت وهمومى تعبانى
حلمت فـــ نومى ادفّيكى
واشيل من بكره حرمانى
اتارى الحب تاه فيكى
وانا بحلمى بقيت جانى!
يا سجنانى على اْعتابك
دموعى فيا محبوسه
ومش قادر على عتابك
وشايف صوره معكوسه
مابين رمشى وأهدابك
حياتى بس ليكِ إنتِ
وحلمى زارعه ف ترابك
يا روح القلب وسفينتى
منايا تفتحى بابِك
أفوت منه واعدّيلِك
تدوب فيا سنين حزنى
بشَربة ميّة من نيلك
واعود تانى لخِلّانى
ونجرى عليكى ونجيلك
نسَطّرلِك حياتنا حروف
بقرآنِك وإنجيلك
ونبدُرلِك أمل منقوش
على قمحِك على نجيلك
ونرسملِك طريق مفروش
بأمجادِك يغنيلك
نعلّيكى ونبنيكى
نجَمّلها أراضيكى
ولو ظالم عليكى يجور
بروح القلب نفديكى

أحمد فؤاد هاشم

كلمات جميلة جدا وانتقاء رائع

شكرا اختنا ام شروق على كل ما تنقيه

من اشعار جميلة وعلى تعريفنا بشعراء

لما نقرأ لهم من قبل

الشعراء المميزون كثيرون
وربنا يزيد ويبارك ان شاء الله
ونجيب للشاعر المزيد من اشعاره
شكرا سعيد