عن واحد فاتح قلبه سبيل

إيه يعني
لما تموت م الضحك حبيبتك
على خيبتك
طبعا مش هياكلها الدود ليسخسخ
مع إنك هتموت قبليها
والدود مستنيك لمّا تشرّف
وحبيبتك غرقانة ف دمك

*******
إيه يعني
لمّا تموت ف النوم
ويصحوك بالطبل البلدي
كأنك أول مرة تموت
ف بلاد بايعاك وبايعها
وبتحلف بالختمة
إنك مش بتحب عليها سواها
كل يومين
رغم إنك متأكد
إن غرامك فيها شوارع وقهاوي
وأحلام ومواجع بتقلبها
ف كباية الشاي الصبح يوماتي
وبتشرب

********
إيه يعني
لو مالقتش حبيبتك مستنياك
تحت المطرة برعشة وخوف
وشوية ترمس
من حقك تزعل وتدوّر وشّك
على أول بلكونة بتفتح شيشها
وتطلع واحدة تلم غسيلها المبلول
بإدين عريانة بتلمع ف النور
لكن مش من حقك ترفع إيدك
وتصد المطر الدافي
إيه يعني

إيه يعني
لو قمت من النوم الصبح
مالكشي مزاج للشغل
لأنك ماحلمتش من شهرين
بطلوع النخل وبركوب الخيل
فكّر بس ساعتها
إنك مسكون بالعصافير والنحل
ولابد تغني أغنية
لأول مرة تقولها لنفسك
عن واحد محبوب من طوب الأرض
وقلبه اتوزّع عالأحباب
وعايش دلوقتي من غير قلب

*******
إيه يعني
لو حاوطوك الخونة ف كل مكان
في الشغل
وفي البيت
وقالوا عليك اللي ما يتقال ف الخمر
طنشهم واحد واحد
واعزمهم واحد واحد
على شاي
و"اتجبى" عليهم
انت أحسن منهم
وبتملك قلب ينور ف العتمة
لكل الضالين
إيه يعني
صلي بهم مرة
وهايتوبوا معاك

********
إيه يعني
لو قالوا عليك مجنون
ومخاوي عروسة البحر
وعندك جن مصوّر
بيحلي كلامك وسكاتك
ويرش السكر على كل عمايلك
إيه يعني
ماعرفوش إنك سيد نفسك
ف قبيلتك
وبتصحى الصبح يوماتي
وتغسل قلبك م العتمة
بحليب الشمس
وبتسمي وتطلع على باب الله

</td></tr></table>

منقووووول

شكرا ام شروق علي الموضوع الجميل
الممزوج بالدعابه والطرافه ايضاً

المقطع طريف فعلا يا عبقر
بس تحس فيه بغضاضه كده من الشاعر
ودايما المعانى تبقى فى بطن الشاعر حتى لو كان ظاهرها طريف

» عابر سبيل
» عش كعابر سبيل
» عابر سبيل
» بالصبر ستمتلكى قلبه
» على الحجار - مش عابر سبيل