مواويل ربعاوى مقفولة

دُلِّـــونى ع الزيـــن قولولى فيـــن مَسكانُـــه(1)

رمشُــه جـــرحنى تقـــولشى ياخيّ مسكانُــه(2)

من يــــوم هويتُـــه وعقـــلى صايبـــُه توهـان

والجسم همــــدان كأنى خــــدْت مسكانُــــه(3)

***************************
1- مسكنه
2- موس كنّه ...كأنه موس
3- مسكّن وبنج
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

بُعد الحبيب ويل وشوقى فى القليب مُرسال(1)

لــــُه مدّة غايب ولا يوم ع الجريح مرسال(2)

القلــب جَــــدران وجسمى بالخــلايق ضاق

وبعتّ له سِياق ولاردِّش فى يـــوم مرسال(3)

***********************
1- مُر سائل
2- مرة سأل
3- رسول وخطاب

لمَا خَرْ عسل الخـدود جِبنا الكاسات نَمْــلوا(1)

والحب جبّـــــار فى ليل ونهار مين نَمْــلو(2)

واللى يريــــد العسل واجـــب يعِــس عليه

لاحسن يضيع من ايديه ويعوم عليـه نَمْـلو(3)

*************************
1- نملأ ونعبأ
2- نام له
3- النمل
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

طول عمرى ماكرَهش غير كُتْر الكلام والتَل(1)

عاشق غزال الفلا لو كان بطرحـــة تَـــــَل(2)

ع الشوك اروح لـــه مااخلِّى عزول يوعالى(3)

وانـضُر غــــزالى ولـــو سكَــن الجبـل والتـل

*************************
1- التل هوالكلام الذى بلا فائدة
2- نوع من انواع الطُرَح لنساء الريف
3- يوعالى أى يرانى
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ياللى ربطتى المَلـــَس فوق الجبين حِـــلِّيــه(1)

وشرابى لــــو مُر نظـــرة بالعيــــون حَــلّيه(2)

من يـــوم لمحتك وانا رايـــح مع الرايحيـن

والقلب مسكين ماعـــارف فى الهوَى حَليـه(3)

**************************
1- فكّيه
2- اجعليه حلوا
3- حال ليه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نظرة بعيـــن الرضـــا ياام الخــــدود عنّاب(1)

من يوم هويتِـــك ماعـارف الخوخ م العناب(2)

عايقــة يابكْــرة عـــرَب ملفـــوفة بـمـلايـــــة

خلّــيتى كـــل الصبايا يقرطــــوا ع النــاب(3)

***************************
1- لون العناب
2- العنب
3- على الناب
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كُحيـــلة بـــدلال ولابســــة شـــال خلفيها(1)

ليها وجــــه زى القمـــر والشِــــفَّة خلفيها(2)

من يــــوم رأيتـــها حِـــرِم نومى وليلى طال

تُخــطر بخلخـال وكـــل النـــجع خلفـيها (3)
**************************
1- خال فيها ولاق عليها
2- خال فيها أى حسنة
3- خلفها
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

من بَعد هجْـــر وجفـــا ياصبيـــة عــــزّيتى(1)

بُعـــدِك خوتنى يالابســـة الوردى ع الزيتى(2)

يامــا شباب اتكـــوى ولانــــال رضاكى ولَـد

مــوَّتى نص البــــلــد ولا جيــــتى عـــزّيتى(3)

*************************
1- اصبحتى عزيزة وغالية
2- على الثوب الزيتى
3- أى لم تجئ لتعزى

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو ارسل رسالة متصل

مجموعة جميلة جدا من المواويل وتعريف بمعنى كل كلمة

شكرا استاذ عادل على المواويل الرائعة وفى انتظار العديد

من كتاباتك الجميلة

رائع يا استاذ عادل
رباعيات جميلة كما عودتنا دوما فى اشعارك
شكرا لك

تسلم الايادي استاذنا الغالي
رباعيات قمه في الجمال والروعه
تسلم ويسلم قلمك الجميل