الابنودي .. في رثاء عبد الناصر

بعد عقود من رحيله

الابنودي يجدد رئائه للزعيم

مرثية لجمال عبد الناصر- قصيدة لعبد الرحمن الأبنودي

بادْلكُم حرّية .. بسجن

أبادلكم سِلْم .. بحرب

أبادلكم صوتى .. بصمت

أبادلكم اسمى .. بصوت مجهول

أبادلكم فدادين الطين

بالعتمة فى رطوبة الزنازين

أبادلكم حاكم عادل بالفرعون الجبار

الجنّة .. بالنار

الراحة .. بتعب القلب

أبادلكم أمن .. بخوف

زُهرّية ورْد .. بكباية دم

وحياة مرتاحة أبادلها بموت

أبادلكم ضِحكاتى .. بغمّ

ورفيقى أبادله بمخبر كلب

أبادلكم لو كنتوا تبادلونى

تاخدوا سنواتكم وتردُّولى السنوات

صعب تردُّولى السنوات

صعب تبادلونى برجوع العزة

ومعنى الوطنية والأوطان

للشعب

ورجوع دمّ الشهداء

والوجه الأصلى لكلمة أعداء

ونضارة وجْه الفقراء

وكرامة تساوى كرامة كلّ اللى اتسلبوا

والنصر .. لكل اللى من غير حرب

اتغلبوا

بادْلونى .. وجوه بوجوه

ولغات بلغات

خدوا كل اللى حيلتنا من ألوفات:

اللى اتنهبوا .. واللى لسه حيتنهبوا

وردوا للأمة رجولتها ونخوتها وقُدرتها

ردُّوها من تابع مذلول

لزعيمة لاستقلال

من قُطعان سايحة .. لرجال

ردولها كل اللى سرقتوه من مال

ادفعوا عنْها ديون الأطفال

نعم فعندما تشاهد اولي الكلمات
تيقن تماما انه الخال
وما اروع ما يقوله الخال الجميل
وخاصه في اعماله التي لاتنسي
ومنها الرثاء الجميل
تحياتي ياعمنا الحبيب علي حسن الاختيار