يخرب بيتكم

موضوع: يخرب بيتكم الجمعة يونيو 01, 2012 10:12 pm

يخرب بيتكم
قصيدة للدكتور أبو زيد بيومي
عضو اتحاد كتاب مصر

مش خلصانة ليه حواديتكم
مش بتفضّوا ليه في سيرتكم
اتوضّــيتوا بدمّ بــلادي
ولا فيش ركعة شرّ تفوتكم
يخرب بيتكم

ياللي سرقتوا الكرسي بــ خِفّة
نزلت كَفّة ... وطلعت كَفّة
أعمى بيمسك صاري وْ دفَّة
غرقت أرضنا في جَهَالتكم
يخرب بيتكم

ياللي سجنتوا الشعب فْ هَمُّه
ياللي شربتوا كاسات من دمّه
بَسّ .. كفاية .. يا ريت تِتْلمّوا
يوم ورا يوم بتزيد عداوتكم
يخرب بيتكم

ضيّعتونا جيل ورا جيل
و حَبَسْتونا في التأجيل
و فرشتونا تراب و نَجِيل
فوق روسـنا ترتاح خطوتكم
يخرب بيتكم

كل ماروح ف حتّة ألاقي
ليكم فيها ديول وبواقي
لمّا أدوّر إيه الباقي
دي حِـتّــتكم ... دي حِـتـّـتْكم
يخرب بيتكم

ما تْعبتوش لـَفّ ودوران
ما شبعش الكلب السعران
ياللي ضميركم فيكم هان
مات ماسْــتناش لحظة موتكم
يخرب بيتكم

حِلّوا شويّة وسيبوا سمانا
سيبوا الأرض تحسّ خُطانا
ليه جايّين على بُكرة ورانا
بعد الماضي ما أكله حوتـْـكم
يخرب بيتكم

نعمل إيه .. يعني نْسيبهالكم
نفضل يعني عبيد سلاسلكم
نفضل فوق اكتافنا نشيلكم
نـحبس كل كلامنا فْ صوتكم
يخرب بيتكم

هل جُوّاكم فيه إحساس
انتم ناس ليها قلب وراس
و لاّ أبالسة ولابسين ناس
طب إيه ينفع فِ جبِلّتكم
يخرب بيتكم

لو شياطين ... قُلْنَالْكو أعوذو
لو إنسان ... لوينَالْكم بوزو
إيه يصرفكم ... إيه بِتْــعُوزوا
إيه يفنيكم ويفتّتكم
يخرب بيتكم
يخرب بيتكم

</blockquote>

الف شكر علي المجهود الرائع
الذي تبذليه لتجعلينا
نواكب الاحداث ونري كل ما هو جديد
تقبلي وافر التحيه والتقدير يازهرتنا الغاليه

» يخرب بيتكم
» يخرب بيوتكم
» يخرب بيت رخامتك
» يخرب بيت القسوة
» يخرب بيت الستات يا رااادل