ادخل وقول الزجل وافتكر قعدات زماااان

مش حافظ مكدبش عليك

ياريت تفضى نفسك ياعبقرينو وتسجلنا شويه من المواويل الحلوه وترفعهالنا بصوتك يا بطل ياريت

يا استاذنا الغالي
انا مش منشد ولا مطرب المواويل دي ليها ناسها ومنشديها
انا مجرد مستمع جيد فقط ليس الا
اشرقت الانوار بتشريفك للموضوع

يا ميت خساره علي اللي حب ولا طالشي

ادي حبل الوداد قصر ولا طالشي

وليل الحزن بيطول وليل الفرح ما طالشي

طبيب ياغالي تعالي لي واكشف علي الاجراح

الجسم بولي والعضم راخر راح

انا نمت وصحيت لقيت جمع الحبايب راح

اوصيك ياغلبان اوصيك ياعاشق متندمشي علي اللي راح

لو عملت طيره وبجناح غير رزقك محطولشي

........... عدد المساهمات : 26070

فرطت قلعي ما جانيش ريح

وعاودت ع البَر ناوي

ياما ناس زيِّنا مجاريح

لكين صابرة ع البلاوي

امانه خفي البكا يا عين بلتيني مع الناس دول

انا دمع عيني سال وانا بحادي في الناس دول

اجي انوي علي العمار يا جي التعب من الناس دول

امانه يادنيا ليه سايبه الاصيل وعاطيه الجبان عدلك

ليه يادنيا

كان هو ابدي بيكي يتم صفاه ويشوف ياعيني عدلك

عطياله قفا ليه امال فين ... فين عدلك

اتاريكي وطيه مينفع الا الغشيم عدلك

عامليني جبان وانا علي البلا قادر

اسألك يا الله ياللي علي العباد قادر
فيه مولي قادر يخلصني من الناس دووووول

يا ستي يا ام الجمال دا حلال علي جوزك

بلاش تتدلعي دايما علي جوزك

ولا انتي مستكترا نفسك علي جوزك

بتلاقي منه الرضا وتشبعيه حرمان

خليتي عيشته جحيم ومورياه حرمان

شيلي حمله كمان وياه وبزياد عليه حرمان

هتلاقي فين الحنان ياخايبه لو يكرهك جوزك

........... عدد المساهمات : 26070

يمشي الفقير وكل شيء ضده

والناس تغلق دونه أبوابها

وتراه مبغوضاً وليس بمذنب

ويرى العداوة لا يرى أسبابها

حتى الكلاب إذا رأت ذا ثروة

خضعت لديه وحركت أذنابها

وإذا رأت يوماً فقيراً عابراً

نبحت عليه وكشرت أنيابها

يادنيا بتجيبي فيا شمال ويمين

نفسي اكون مرتاح واخد لي فيكي يومين

بتاخديني لفوق وتنزليني تاني تحت

انا اروح من غلبك فين

هو انا مكتوب عليا اعيش فيكي حزين

تعبت منك ومن قساوتك واشتكي بس لمين

افرح فيكي شويه ولكن بتبكي العين

ياربي عديها علي خير ولا تشمت فيا اللايمين

ابو حسام

هتتعبي يازهرة لو حبيتي تجاريني في الموال

لا انا مش هجاريك انا هبوظهولك بس

سهران بتشكىوايش بيك

مش طايق حتى الخلايق

لو ضاقت الدنيا يوم بيك

يعدلها رب الخلايق

ثلاث قصائد زجلية باللغة العامية المصرية
من ابداع الشاعرة المصرية الساخرة
ايمان بكرى

-----------------------------
(1)
النساء و منصب الوزارة

قالوا الرجال إن النسا مالهمش في الوزارات
ونهار ابونا مِسا لو حكّموا الستات
في وزارة التموين و الاقتصاد بالذات
حتضيع فلوس البلد في اللبس و البوتيكات
بالذمة ده اسمه كلام
يبقى وزيرنا مدام
واسم البعيد فتكات
يختي عليه لو مشي
يدخل مجالس إشي
لابس قميص شفتشي
من كلمة واحده يختشي..وينزل صويت وعياط
يا اهل العلام والادب
اقروا التاريخ اللي انكتب..فوق الطريق علامات
كليوباترا حكمت بلد
بالحيلة ويّا الجلد
من غير لا خد ولا هات
وكام من وزير كان قفا
جه في الطريق واختفى .. ولهف وراه ألوفات
قصر الكلام يتقال .. مين فيهم اللي يفيد
مش مسالة عضلات
وساعات كتير ستات بيكونوا رجالة
ورجال بطبع النسا
وطالعلهم شنبات

(2)
مافيش حاجه
مانيش عايزة خلاص حاجة
ولا محتاجة انا لحاجة
ولو عايزة صحيح حاجة
مخليتوليش ولا حاجة

عموماً بصوا فيه حاجة
هقولها بس محتاجة
لعقول تفهم
ولو حاجة
مهيش مفهومة او حاجة
نفسرها بكام حاجة
نوضحها بكام حاجة
وأهى حاجة مع حاجة
هتظهر وتبان لنا حاجة
وانا ما بخفش من حاجة
مانيش مسنودة ولا حاجة
لكن ما بخفش من حاجة
لكن فرضاً لو هقول حاجة
هيحصل إيه ؟؟؟ ولا حاجة
هيعملوا إية ؟؟ ولا حاجة
و بعد الشر بعد الشر
لو واحد من القاعدين
من السامعين من الضالين
فِهِم حاجة هَيعملوا إيه ؟؟؟؟
اكيد برضُه ولا حاجة
فنتوكل على الستار لوجه الله نقول حاجة
فيه ناس بتعيش علشان حاجة
وناس بتموت علشان حاجة
وناس بتموت على الحاجة
وناس تديلك الحاجة
وتبقى ليها محتاجة
وناس تديلك الحاجة
و تاخد ادامها ميت حاجة
وناس تكبر تكون حاجة
و ناس تصغر علشان حاجة
وناس منظر ومش حاجة
وتلقاه كبيرحرس ونفير عليه منظر
وهو جبان وشيخ منصر
ولا يبـنش عليه حاجة

كلامى يا خلق فيه حاجة؟
لحد دلوقتى فيه حاجه؟
كلام عادى وبسيط جداً ولا فِهشِ ولا حاجة
ما انا ما أقدرش أقول حاجة
صحيح نفسى أقول حاجة وميت حاجة
لكن مش قادرة اقول حاجة
لأنى لو هقول حاجة
هييجى ناس بتوع حاجة
وياخدونى ورا الحاجة
وهو لو سمع حاجة
هيعملوهالى ميت حاجة

عموما بصو لو واحد من القاعدين
عاوزنى أبلغه بحاجة
يقول مايخفش من حاجة

نعم فيه إيه؟
لالالالالأ مافيش سرقه
ولا تهليب ولا تهريب ولا حاجة

وبتقول إيه
مصمصوا إيه؟ وخصخصوا إيه؟
ده كله كلام مفيش حاجه

قضية إيه؟
ياشيخ روح خلاص مافيش حاجه

حرامى إيه ؟ ولَكّح إيه؟وهرب إيه؟
شــفـافـيـه ومافيش حاجة

وبتقول إيه؟لالالآلأ عـــيب
لافيه تدليسولاترقيص
ولا تدبيس ولا حاجه

سمع مع هووووس
انا حاسسة انه فيه حاجة

دقيقة سكات لَتبقى حداد
انا حاسسه انه فيه حاجة

زمنكوا ياخلق فيه حاجة
ولازموا كام وميت حاجة
ده لو يعنى إذا كان فيه حاجة
انا عن نفسى مش حاسسة ولا بحاجة
ولا متضايقة ولا حاجة

سعادتك برضه مش زيـى مافيش حاجة ؟
أهـه بيقول مافيش حاجة

جنابك برضه مش زَيـىِ وعلشان زيي مافيش حاجة
أهـه بيضحك بيقول مافيش حاجة

ما أنا قولتلكو من الأول مافيش حاجة

عليا النعمه يا اخوانا مافيه حاجة
ورحمة ابويا ويا أبوك على إللّى جابوك ما فيه حاجه

وعهد الله . وعهد الله. وعهد الله
ما خللولنا ولا حاجه

بقلك ايه خلاص خلص و فركش
يلا يا اخونا مفيش حاجه

(3)

يا بنت بلدى

يابنت بلدي عيب ..لما اللجام هيسيب .. يسترخصوكي الناس
في بنطلون مزنوق .. وبلوزه شبر لفوق .. ولا حتى فـ الجمباز
عريتي تحت وفوق.. ولا عدش عندك زوق .. ولاحتى فيه احساس
لحم الخروف مدبوح ..بنجيبه بعد الروح .. ما تحصّــل الأنفاس
ولحمتك بالكوم .. دكان وطول اليوم ..مفتوح لأرخص ناس
يخرب زمنا زمان .. كأنه عُمر ما كان .. لالينا اصل ولا اساس

منقوووول

مين اللي ارتاح في الغربه ومين مبكتش عينه
طالت علينا الفرقه وفين الصبر فينه
غربة تبكي اليالي وتنسي الاخ اخوه
ملهاش الغربه غالي الغالي عند ابوه

يا طالب السعد من غير وعد تعمل ايه

غيرك بنا وعلا اللي خد من البنا ايه
تطلب من العبد هو العبد عنده ايه
اطلب من الله وارمي الحمول يا خي عليه

اطلب من الله يعطيلك من غير حسابات ياشاطر
واحد مهيمن وعلي كل العباد شاطر
الظهر عنيد وامتي بيعطي للشاطر
اذا كنت شاطر وعديم البخت تعمل ايه

...............................

منين أجيب ناس لمعناة الكلام عارفين
شبه الأمارة إذا حفظوا الوداد عارفين
شرعت سن القلم
رمحي جرح قمحي
جعلت عشقي الغنا زادي
وناس عارفين
ياليل يا عين يا وطن
يا صحرا يا بساتين
يا جرحي يا غنوتي
يا ناسي يا غايبين
موالي من غربتي اخضر
خضاره حزين
حزين كلام الغنا
والسامعين عارفين

يا عينى لو عدوا الحلوين بص بحذر
الشوق لا يرحم ولا بيلين ولا يوم عذر
اسنانى وقعت من النباتين وضاع النظر
والخيبة ان مفيش فيتامين غير فى الجذر
معادلة صعبة وعايزة عقول تحسبلها
ودنيا ماشية ومش معقول حنسيبلها
عايزة اللى يلعب عرض وطول على حبلها
واقول يا قلبى ما كنت تقول من قبلها
كبرنا والايام بتفوت عايزين نحب
وقلبى مش ناوى على سكوت
عمال يدب يقوللى قبل ما اطق واموت
اغطس وقب وهاتلى قلب ولو هلفوت
يفتحلى عب
يا قلبى يكفى ملام وعتاب
احنا فى هنا
لا يوم وقعنا فى هوى كداب
انته وانا ولا يوم قاسينا من الاحباب
هجر وضنى وسالنى سؤال وعايزله جواب
من كام سنة هوه صحيح الهوى غلاب
معرفش انا

__________________

هما مين و إ حنا مين .. ؟

هما الأمرا و السلاطين ..

هما المال و الحكم معاهم ..

و إحنا الفقرا المحرومين

حزر فزر شغّـل مخك

شوف مين فينا بيحكم مين ؟!!

..............

إحنا مين و هما مين ..

إحنا الفعلا البنايين

إحنا السنة و إحنا الفرض

إحنا الناس بالطول و العرض

من عافيتنا تقوم الارض ..

و عرقنا يخضر بساتين

حزر فزر شغل مخك

شوف مين فينا بيخدم مين ..؟؟!!

................

هما مين و إحنا مين ؟؟

هما الامرا و السلاطين

هما الفيلا و العربية

و النساوين المتنقية

حيوانات استهلاكية

شغلتهم حشو المصارين

حزر فزر شغل مخك

شوف مين فينا بياكل مين ..؟؟!!!

....................
إحنا مين و هما مين

إحنا قرنفل على ياسمين

إحنا الحرب : حطبها و نارها

و إحنا الجيش اللي يحررها

و إحنا الشهدا بكل مدارها

منكسرين أو منتصرين

حزر فزر شغل مخك

شوف مين فينا بيقتل مين ..؟؟!!!

................

هما مين و إحنا مين

هما الامرا و السلاطين

هما مناظر بالمزيكا

و الزفة و شغل البوليتيكا

و دماغهم طبعاً استيكا

بس البركة بالميازين

حزر .. فزر شغل مخك

شوف مين فينا بيخدع مين ..؟؟؟!!!

.....................

هما مين و إحنا مين

هما الامرا و السلاطين

هما بيلبسوا أخر موضة

و إحنا بنسكن سبعة في أوضة

هما بياكلوا حمام و فراخ

و إحنا الفول دوخنا و داخ

هما بيمشوا بطيارات

و إحنا نموت بالاوتوبيسات

هما حياتهم بامب جميلة

هما فصيلة و إحنا فصيلة

حادي يا بادي يا عبد الهادي

يا اللي عليك قصد الغنوادي ( الغنوة دي أو هذه الاغنية )

لما الشعب يقوم و ينادي

يا إحنا يا هما في الدنيا دي

حزر فزر .. شغل مخك

شوف مين فينا حيغلب مين

ـــــــــــــــــــــــــــــــــــــــ
دلي الشكارة

دلي الشكارة جنب الشكارة

و اقعد يا حفني ولعلك سيجارة

فكّـر شوية .. بالعيشة دية

إيه القضية إيه العبارة

من صغر سني

شقيان لكني

ما لط سني غير البصارة

....

و دخلت حارة من جوة حارة

و فكل حارة عليت عمارة

و سط المعامل بنا و مناول

بس المقاول كلني بشطارة

و لا خلى صرة و لا لقمة حرة

و العيشة مرة .. أخر مرارة

احمد فؤاد نجم

عالمحطة

عالمحطة … عالمحطة

واللي شفته أنا عالمحطة

طلعت الخفة أم شنطة

سلم الأوتوبيس … بنطة

حتة ملعب (بضم الميم ، أي ذات لعب ودلال) … والأكاده (أي بالتأكيد)

في الأوام (القوام) والحسن بطة

هيه خشت درجة أولى

والكراسي بإت (بقت أي أصبحت) منطة

سابوا تانية … وغلب تانية

والأطيع (القطيع) على أولى خطى

اللي يهبش في الجونيلا

واللي يعلى … واللي يوطى

بص واحد ماللي ( من الذين) هما دمهم فلفل وشطة

شاف صنايعي في البريمو

آل له خش هناك يا أسطى

تانية أنسب للي زيك

دي الحقيقة بلاش مغالطة

الأسطى آل له … ياعم روق (بتشديد الواو)

دي الحياة تحب المباسطة

وانت شايف … مش مغمض

حاجة ملبن … حاجة إشطة (قشدة)

والا يعني الكون حيخرب

لو فقير يلهط له لهطة ؟

________________________________

حلاويلا

حلاويلا يا حلاويلا .. يا خسارة يا حول الله

ده الثوري النوري الكلمنجي .. هلاب الدين الشفطنجي
قاعد في الصف الاكلنجي ... شكلاطة و كاراميلا ..

يتمركس بعض الايام ... يتمسلم بعض الايام
و يصاحب كل الحكام .. و بسطعشر ملة ..

حلاويلا يا حلاويلا .. يا خسارة يا حول الله

يا حلاولو لو شفتو زمان .. مهموم بقضايا الانسان
بيتكتك لتقول بركان .. و لا بوتجاز و لا حلة ..

حلاويلا يا حلاويلا .. يا خسارة يا حول الله

اش حالك يا قريب اليوم .. اش جاب التفاح للدوم
و اش جاب الغرفة ببدروم ... للعربية و فيلا

حلاويلا يا حلاويلا .. يا خسارة يا حول الله

جرانين و منابر و ادارة .. و معلق طلبة و زمارة
يعطل أهو بيسلك يابا .. و يجيبوا المنافيلا

حلاويلا يا حلاويلا .. يا خسارة يا حول الله

دا ترستق هلاب الدين .. بقى عاقل جداً و رزين
و يعن عند المجانين .. إن عشنا و متنا بعلة

حلاويلا يا حلاويلا .. يا خسارة يا حول الله

احمد فؤاد نجم

ياللي بنيت البنا قولي ايه في البنا بيعيب
قالوا الاساس المليح فوق منه الحديد ما يعيب
لو قدموله الدهب عنده الادب ما يعيب
ياسامع الفن باقي الحروف ع الزمن
كام مرة وانت تميل ع الغاليين يازمن
الولد المليح يحاسب منه يازمن
ومهما دار الزمن عمر الاصيل ما يعيب

انا ماليش شغلة
وعندي وقت كتيير
تعبت من المتقاطعة وحلها
ونومة السرير
أنتخت على الكنبة شوية
وأطلت التفكير
طقت ف نافوخي فكرة
أترشح وأبقى نائب كبير

لا أخدت شورة حد
ولا حتى عندي نية
هما كام يافطة عومي
وصورتين مية مية
وأمشي ف وسط الخلق
ألعن أبو الحرامية
أو أوعد الناس بالهنا
وأوزع عليهم حمصية

هتقولي وايه الفايدة
هقولك بص يا عم
هاقتل وقت فراغي
وانسى شوية الهم
ومكسبي مضمون
بقرايبي وولاد العم
واكل لوحدي بوغاشة
واطفحهم هما السم

اوعي ياغلبان تروح لجبان تشكيله
يغرك اللون مع شكله و تشكيله
ياخد بسرك يروح للغير يشكيله
وصبحت ندمان وشربت المرار ف الحال
من ميلة الدهر مش قادر اوقف ع الحيل
اوصيك وصيه يافقير الحال
لو ضاق بيك الحال لرب العرش روح واشكيله

حرااااااااااااااااااام عليك مش ناقصة نكد عالصبح

الواحد متنكد لوحده .ارحمنا يا ابوحسام يرحمك الله

وبعدين يعنى فى وجع القلب ده

كم الف نوبه اقول توبه ولا توبنا
وقعنا في الفخ 100 نوبه ولاتوبنا
رجلينا حفية ورا الاندال ولا توبنا
الدنيا لو ترفعك دراعين تحترمك
تخليك ولد عال وكل الناس تحترمك
اذا خف جيبك متلقي حد يحترمك
ياسمع الموال انا مألفه لجميلك
تمشي مع الردي يوم ينطفي اللون وجميلك
اهو راح جميلك ورا المعيوب ولا توبنا

كتير من الناس سابونى وانا ساكت

وقولونى قول من غير قول وانا ساكت

اذا كان جرى منى عيب ادينى وسط الرجال موجود

والرب موجود يخلص حقى وانا ساكت

كداب يالى تقول الاخ يتعوض

دا اخوك دراعك اليمين
مش منظور يتعوض

انا بمدح نبي زين ومدح النبي ياما غالي
اللي يصلي عليه دائماً غالي
اسمه محمد وعند الاله غالي
انا قاعد مع ناس حلوين ليه مقام غالي
سيبك من المال اصل الادب غالي
امشي مع الاصيل مشي الاصيل غالي
اوعي تماشي الخسيس قلبه من تلاك غل " غالي "
لفيت كل البلاد قلت الوطن ياما غالي
ادعي من الله انكم تعيشوا علي الغالي
انا بوليت ياطيبب عيان
وفيا الم من جو الحشي خلصان
اسألك يا الله من هذا الالم خلصان " خلصني انا "
كشف عليا الطبيب وقالي ياعليل دواك خلصان
اسمع كلامي انا اللي مؤلفه موجود
كلام حاصل ياناس مع كل زول موجود
اللي قال الكلام وسط المجال موجود
دا الطب موجود لكن الاجل خلصان

اه يادنيا اهو زاد عجبكي عشنا وشفنا العجايب
ناس حزينه وناس تغني ومغلوب يضحك لغالب
خليتي الاصيل عيبكي مسكين عدم الحبايب
انا مين في همي بكي معاي اذا بكيت اوعوا تلومني
شوف الاهل لما كانوا معايا ساعة البلاوي فاتوني
سيب العبد خليك مع الله علي ابتلي متلوماشي
اللي ليه ذنب يلاقاه اللي يعمله المولي ماشي

امانه ياطبيب عليا مات الحق
وهات الدوا اللي يوافق
ياما ناس بتعرف الحق ولجل الضرورة توافق
الصاحب الزين يتحط في الجيب
وتفج منه الروايح
شوف الردي لما يبدي بالعيب
ما تيجي منه غير الفضايح

ياطبيب في الزمان شفنا العجب واهو بان
صرفت مالي ما في ايدي وجيبي انا
اهل الكرم سابوه سكنوا التراب وجبان" جبانه "
رقدت عليل ولزمت الفراش واساه
اتبع ابن الكرام متقولش عبد ولاسيد
فقير وسخي اليد احسن من غني وجبان

انا عيان ياطبيب ولاحدش يقول عوافيهه
كرم السبوعه نشف واتبهدلت عوافيه
سبع الرجال اتصل كلب البلد عوا فيه
انا ايه اللي كايدني غير المعيره واللوم
محاسن الوجه اتغيرت والبها واللون
ولاتفرحوش ياعوازل
دا كل واحد لازم ياد له يوم
بكرة يجي يوم وترجع للاصيل عوافيه

يادنية كان ليكي صاحب حلو لكن يخسارة فوتيه
ليكي طعم كيف الشهد للي تحبيه تفتيه
ويخسارة علي ولد زين بين الرجال فوتيه
واللي تحبيه يادنيا تخليه علي القصور يحاكي القمر
واللي تكرهيه تكحتيله تحت الاراضي قبر
واللي شرده اتعدل وقام في اسرع حال فوتيه

انا راقد مريض ووصفولى بذر الخلى (الخل)
وابوى يدور فى البلاد مامخلى
ولما برد اليل محبوبى جاء داخلى
مسك رجل السرير يبكى ويقول ياخلى

عمر الاصيل لم يعيب والعيب ميقوله
اسال عليه تلتقيه في المشي بيريح
ويقدر العيش وعمر السر ميقوله
ونضيف في العرض ذي الورد بيريح
قضي حياته خلاف الجد ميقولو
ولفظه تلقاه دوس للجرح بيريح
سيبك من اللي تشوفو في الطريق ميسد
مشيه لعله واذااحتجته في يوم ميسد
اللي يبيعك تبيعو واتركو ميسد
وصاين الود في جفون العيون شيله

شـَهبة و تشبه الديب
و اتعجب اللي أراها
بقيت ركوبة مساليب
و نقاقير تُخبُط ْ وراها

لو ســـرســب الــرى يـبــقى العيب
فى البطّال..........(الدرباس الفاصل بين الحقول )

واللى يلــوف ع
النَجَـــس عمـــرُه ماكــــان بطّال.........( بطَل )

وان تقطـــع
السُنــطــــة تكبــر من جديد وتجـِـت..........(تنبت مرة أخرى)

وان
مــالـــت الـبـــت حيكـــون الأســـاس بطّـال

يا قهوجي باش هات ع الماش بصالي

عيني علي غزال زين من الشباك بصالي

طلبت منها الوصال قالت عيب اختشي دا عرض

اهلي علي الارض زي النمل بصالي
........

الماش= الاداة التي يمسك بها الجمر
بصالي = بصايه لي اي قطعه من الجمر

لغة الماء

استاهل انا اللي الاسي مني

وع الاراضي جريت

وخضّر الشِعب مني

وبناره يارب اتكويت
.............................

الشِّعب= غصون الاشجار والحطب اليابس الذي يستعمل كوقود تحت الماء

ايه التالق ده يا ابو جمال
الكلام بتاع الواو ده جميل جداا
وكله حكم رغم صعوبة بعض الكلمات
ياريت نكمل الموضوع ده ونجمع اكبر قدر من الزجل

كشف الطبيب ع العليل وقال للحضور آمين

قالوا ايه العمل يا طبيب وايه اخرة اللايمين

قال الطبيب صاحبكم لا بيه عله ولا امراض

روحوا وهاتوا الدوا وبلاش نخوض ف اعراض

غمزوا لبعض الصحاب ..مين اللي يقدر مين؟

طق العليل مات ..من قولة حق الدوا علي مين
...........

يعنى المريض كمان بخيل
خلاص يبقى يغور بالسلامة
خد الشر وراح

انا مش شايف انه بخيل يمكن بس هو طق

علشان مش لاقى اللى يدفع له تمن الدوا

وصحابه بيتعازموا على اللى يدفع والله اعلم

يعنى الراجل عنده دم

بالضبط كده زي سعيد ما قال

في حين ان الراجل مش مريض بمرض

عضوي ..وكلام الطبيب واضح في البيت التالت لكن اصحابه من بخلهم فكروا ان الدوا عاوز فلوس

وبيتعزموا علي بعض

اه يعنى فوروا له دمه خلوه طق مات
طيب ما يدفع هو بدل الغلب ده
ما اجملها المربعات الزجلية بروحها المرحة

صاحبنا مريض بالعشق ....مش حكاية دوا يا زهرة

قال الطبيب صاحبكم لا بيه عله ولا امراض

روحوا وهاتوا الدوا وبلاش نخوض ف اعراض

بس الراجل مش عاوز يوضح اكتر من كده لكن هما اغبياء

والله يا ابوجمال انا فهمت كده بس عارف الدوا غالى

علشان كده قلت خلينا بعيد احسن ههههههههههههههه

اه يبقى انا اللى فهمى بطىء
والعشق ما له دوا فقد مات كمدا من مرض لا دواء له
فالدواء مستحيل الاتيان به لسبب ما واصحابه يعلمون ذلك

وبعدين؟؟؟؟؟؟؟؟؟؟ ..اههههههههههه

هما فاكرينه دوا من ابو فلووووووووووووووووووس بتاع الصيدليات

اقول تاني؟؟؟؟؟؟؟؟؟؟؟؟؟

قول واشرح
ايه المانع يعنى
قول الموقف ككل بدل ما انا تاعباك كده

ههههههههههههه الموضوع واضح جدا

الراجل معنوى وحساس وهما ماديين واغبياء

الدكتور بيقولهم ده مش مريض مرض عضوى

ده مريض بالحب هاتوا له حبيبته وهما علشان

اغبياء فاكرين الدوا هيشتروه بفلوس خلو الراجل

طق مات ههههههههههههه

الله ينور يا سعيد

وضحت الرؤيا كده؟؟

خلاص فهمت
شكرا على التوضيح

اوصيك يا خلي للشكل الجميل ما تميل
خد الاصيله اللي تمشي في الطريق ما تميل
ياخاطب البنت شور الام قبليها
هي اساس العمل في الاصل قبليها
اسأل علي الخال وبعد الخال ابو ليها
اوصيك انا يا خلي للشكل الجميل ما تميل
خد الاصيله اللي تمشي في الطريق ما تميل
تشرب من المر وايدها للجبان ما تميل
البنت لو بتميل تبقي الام قبليها

بقول علامة الندل وسط الناس ما يبانشي
في كلمة الحق دائما يهد ما يبانشي
حتي ان اتاه خير وسط الجمع ما يبانشي
عايش وجاهل ع الدنيا ما يعرف بات
ونفسه رديه ودائما في المعاصي يبات
اذا جات سيرة المال مايعرفش ولد ولا بات
ويدس في البيت من العصر ما يبانشي

مايبانشي ( ما يبنيش )

يا مشرط الجراح أمانة عليك

وانت في حشايا تبص من حواليك

فيه نقطة سودة في قلبي بدأت تبان

شيلها كمان.. والفضل يرجع إليك

بيرم التونسى

الدنيا دي مدرسة بتربي وتعلم
ولكل شيء مدرسة بس اللي يتعلم
ونزلت بحر الأدب وأنا قصدي أتعلم
بصيت لقيت العجب خلاني أتالم
فيه ناس اساتذه أدب بالفن تتكلم
ولاحد يسمع لهم ولا حتى بيسلم
وناس ناقصها الأدب وناقصها تتعلم
واخده الطريق منظره في الفاضي تتكلم
لكن سير الأدب حيخلي منظرهم
زي اللي طلعت فوق...
رقصت على السلم

محمد العشماوى

مهو اصل الادب فضلوه علي العلم في الكتاب
تقرا اشعار عن الادب قالوها اعظم الكتاب
كلام كبير وكلام حلو لكن للي يفهموا معناه
تفيد بأيه ياندم لقليل الادب لو جالك يوم وقالك انه تاب ؟

إن كان حبيبـك عســـل ،، قوم الحَسُه كله

و عــم سيّــد أبُــو ُ زِهــدة النسيم مَـال لـُه

و الشِعرّ طاوِع لِجامُه ،، سَار على جَمْرُه

رهين إشارته و عُمــــره لم في يوم مَلـُّّه

إن كان حبيبك عَسَل ،، و انتَ عَسَل يا حبيب

بعيد عن الجيرة لاكن ،، مِن لـُغايا قـــــــريب

شاهقة المعاني في صوتك ،، شمســها نـورنا

يا أكـروباتي الكــلام ،، وَدِّي المعاني و جيب

ههههههههههه وماله تعالي واخوكي سداد
خدي دي

بقول كلامي وكلامي ليك موزون

ياللي اتعلمت فن الشعر والواو والنون

الاخوه الطاهره حلوه وبليها انا مفتون

ربك يديم الصفا ويكحل بنور النبي العيون

فِيه ناس جمالها عَجَب .. و للوجود زانو

زينـة و قلبك دهـب .. يا بخت من صانو

و الكلمة مِنـِـك دَوا .. خلـِّت قلوب لانـــو

و مين يواسي العليــل ..غير بَـس خِلاَّنو

يا وردِك اللي انتــشىَ ..هايــم بألـْـوانــو

و اللي يشوف طـَـلـّتِك .. بينسى أحزانـو

يا زينـة المنتــــدَى ، يا وَتــر في ألحـانو

أشـُق ضىّ القمر ،، نـُصِّين ،، و انـام بينهُم

ألاقِـي غـاوي غنـاوي جانـي في الأحــــلام

شايلاه طيور في السما ،، فاردِين جناحِينهُم

و ف إيدُه هَمس الوَتـَر ،، مالي الفضا أنغام

» بشير عياد يطلق رصاص الزجل على سارقى الثورة
» اكتب وقول يا خال
» مجموعة نغمات زماااان للموبايل
» فاكرين برامج الطفولة زماااان
» م الموسكى لسوق الحميدية ....صباح زماااان