مناظرة طريفة بين هو آند هى

دعونا اليوم نطرح موضوعا طريفا
عباره عن مناظره او معركة بين
هو
و
هى
هو وهى كلا منهما يريد ان بنتصر لجنسه
خلينا معاهم للاخر وتعالو احكموا
مين اللى هينتصر
هو ولا هى

وانا هبدء الموضوع
وهديكم مثال وارشح طبعا زهرة بنت ساحه الطيب لتكون اولي المتسابقات
وتكون معي في المناظرة المرتقبه

غلطت ياناس واستاهل ما يجرالي

ربيت وعلمت واكلتها من الغالي

كتمت جرحي في قلبي

اعمل ايه ؟؟ معذور

روحوا يا جنس مغرور تاجيكم من العالي

احنا القوارير اللى رب الكون خالقنا

فينا الجمال والحنان والرقة فى ملامحنا

وانتم صنف نمرود ما يتمر فيكم شى

تعبنا واحتار دليلنا قادر منكم يريحنا

صنف النسا كياد والعيشه معاه مره

تمكر وتخبص وتنكر الجمايال بالمره

في عز شبابها قبل الخطوبه تبقي امورة

وبعد الجواز تشبه لدوده وطالعه لسه من الجرة

قبل الجواز زهور فى جنينه مسقيه

ومن عيشتكوا الشوم تدبل الورده وتبقى مطفيه

لا محنه ولا رحمه مشغلينا يا اخويا فى وسيه

عبيطه اللى تقول جواز خدنا ايه احنا مالكلمه ديه

قبل الجواز بتكون ورده ومن العيون مخفيه

وفي الخطوبه غندورة حلوه وكفوفها محنيه

وف الشبكه ترسم له حياه حلوه وورديه

وبعد الجواز تنكر الجميل يقولها وشك للحيط وقفاكي ليا

راح الشباب منك وراح الجمال بقيتي رجل طبليه

يا محلى العريس وهو متغندر ومتنحنح

داخل لها بالورد والياسمين ويقول يا حلو ما تصبح

والحس هادى وجميل والكرم اوضح

بعد الجواز تقول شمشمون عالأكل متربع

والحس يعلى تقولش ..........بتجعر

والبخل توبه ناقص يربط عينيه وبيها يسرح

عامله فيها بنت ذوات وبالشوكه والسكينه اكلتها

عاوزة تعمل للمسا لمات وتفرج عليه بنات حتتها

تقولش شنطه في ايدها وامها من السوق جابتها

والراجل ياعيني عليه مسكين ومغشوش بضحكتها

وهي بغشمها وخبثها داخله علي طمع وياه ياخيبتها

متعرفش معني الرجوله وانها في بيته هتتصان كرامتها

قاعده في بيت ابوها خدامه وتعمل طول اليوم بلقمتها

راحت معاه البيت وعيشها عيشه عمره الغندورة ما شافتها

راح المكياج والبويه وظهر ضبها وبعجره في قورتها

فرحانيين بالكوافير وتشوفها تقول يامحلي زينتها

البويه خداعه ياخلي وخد بالك من عفاشتها

طبعها الردي بيظهر بعد الجواز يبقي تغور بغباوتها

ياريتك ياصاحبي فضلت عاقل وكنت عميت في نظرك ولا شفت باب بيتها

قاعد مبحلق ليل ونهار فى هيفا وف نانسى
اقول له هات اجيب ماسكرا ولانسر عيون
يقول لى غورى من وشى
كات واقعه سودا يوم ما شفته يا مرايتى بتغشى

قالوا زمان امثال علي الحلوه وطيبتها

قالوا خد الاصيله بنت الاصول معروفه بقيمتها

طلع كلام مذوق ومن الحقيقه كمان خالي

لافيكم طيبه ولا مروه والواحده منكم الراجل يرمي طوبتها

الست زى النسيم ساعات ييجى ويروح
تشاغلها تعطف عليها معاك تيجى وتروح
تفديك بروحها لو كنت خفيف الروح
تدعى عليك بالكوم لو عشرتك نيله
ولو جرت لك مصيبه تزغرت بدل ما تنوح

الست دي بلوه ومسيحه ومنيله بنيله

تاخد فلوسك وتدعي عليك بالزوفه والكيله

تنهب شبابك ومالك وصحتك وتروح

زي العمل الردي يقعدلك في طلوع الروح

خدها نصيحه مني ياصاحبي وين ماتروح

في شط الغرام ف مطروح ابقي لزها واديها ميله

مش لما يروح يصيف ويعيشوا زى الناس

فى كتمه عايشه وبين حيطان مسدوده

تصرخ يا سيد ياللا بينا حتى نروح للنوبه

يقلب لها جيوبه ويدعى الفقر

الهى لا تكسب ولا تربح ان شالله ياكلك قطر

علي طول الزمان تلاقيها كدا نهباه وفاكره من عيشته عيوبه

تزعق بصوت مبحوح وتجعر تخليه ياعني يطلع من توبه

يسلم للكريم امره ويقول ان دا قدرة في الحياه ومكتوبه

عامله زي بقعة زفت وقطران عمرها ماهتطلع من توبه

لو راجل اصيل وكريم فى العيشه يكفيها
لا يسيبها تعول الهم ولا تبات الليل مغلوبه
وهى من نفسها هتخاف على ماله وتصونه
لكن نعمل ايه ابو طبع مايل راسه دايما كده مقلوبه

طبع الشحاته والمنظرة الكدابه تلاقيه دايما في جورتها

تتمنظر علي الناس وفلوسها شيلاها وتروح تشحت صحن جارتها

فاكره نفسها كدا ناصحه وبتستعمل ذكائها متعوسه دا لاجل خيبتها

راجلها راجل عال مكفيها لكن طبع الدنائه ردي غلب علي اصلها وتربيتها

طبع الدناوه دا شين وعمره ما قرب للاصيله جنب باب بيتها

تعطى ما تاخد وتسقى الجميع من مية قربتها

وهو داخل مكشر والهم ناصب صوانه

تقولش داخل فى ميتم والحزن مخلوق عشانه

اصل كانوا زمان يقولو ان الحريم اعتاب

واحد حظه حلو ياخد اصيله تقلق عليه لو ف مره غاب

ودي نادر وجودها ودا كلام اكيد ومتوثق كمان بكتاب

ومعظمهم غشم ياخساره في وش الراجل تلاقي علي طول كشرتها

مبوذه وبوذها مترين والعكننه مكتوبه في قورتها

وان جاها في يوم ضاحك بقله عقلها ترد ف وشه الباب

الست لو فيها ايه هو بإيده يعدلها
لكن غشيم الفعال دايما مسود عيشتها
خلاها كرهت نفسها من كتر شقاوتها
تشكى لدى ولدى ولا عمره انصلح حالها
مصيبه تاخده بقى عامل زى البومه فى عشتها

يعدل فيها وهي منيله بنيله
سنينه معاه كحله ومدة الحبس طويله
سجنوه في سجن لكن ياسلام فردي
بيتمني الاعدام المسكين ولا يرجعلها ليله

داخله القفص فرحانه بالزفه
فستان وطرحه ومروحه لافه
قال يعنى داخل الجنه وقصر عرشه جميل
مش عارفه ان اللى ساكن معاها اسمه سبع الليل
شهر عسل ينقضى والبصل ينباع بالكيل

كان حالف لما تبقي معاه يهنيها

يفرح زي خلق الله ومن ماله يكفيها

طلعت مقلب ومطب جامد وخده المسكين

قسمته طلعت يانس سودا يعمل الغلبان فيها

كات راسمه دنيا جميلة فى صفحة ملونه
عصافير بلابل ايه فراشات بلون الفرح
مسكينه لقيت هم فى زكايب ومصيبة ما الوالدين
الام تشخط وتنتر خدامه جابها لها

بخت العدل مال والمايل صبح معدول
مسكت القلم اكتب وقع القلم معدول
فرشولي الارض حرير ولونها كمان بمبي
بعد الجواز لقيت امها كل يوم في البيت جنبي
ياقلبي ما كنت خالي ايه وقعمك مع دول

اسم الله على والدتك قاعده وفارشه سرير
فى برج المراقبة تقولش وظفوها غفير
لا عاجبها اكلى ولا لبسى والحال على فين
تطفح تقول اكل مسمم والملح كتير
والرز قال ايه متعجن والسمن كتير
تاكل وتلغ وتتبرطم غاويه التقطيم

البركه دايما في الست حماتي

عكننه وقله ادب ومنغصه علي حياتي

هات وودي وماسكه كل ما في يدي

وان زعلت بنتها في يوم تاجيلي وتجعر

يارب يدهسها اتوبيس وانا ازوقه ليهدي

امى حبيبتى عايزه تضمن لى حياتى
اقصقص ريشاتك واضمنك لمماتى
لكن امك بتاخد مالفلوس الوفات
تقولش فاتحه لها بنك وعليك بتعمل حجوزات

علي الاقل الست الوالده بتخاف علي ضناها

حاسه بوجيعته وغلبه علي امره مهما كان دا ضناها

تشيل فلوسه وليه هي عليها هتحافظ وهتحوش

اما الست والدتك علي اموالي الخاصه بتلم وتكوووش

العيب مش عليها حرمنا العيب علي والدتها واللي رباها

قال يعنى المال معاه متعبى فى زكايب
دا انا بطبخ اللحمه يا اخويا مبالقليش نايب
امك واختك واخوك ومراته وعياله
عدمتنى العافيه دول حتى قالوا من ماله يهنى له

كانوا الجدود زمان للكلام كتير قالو

حكم ودرر مازالت بتتردد وكل واحد بيقول علي حاله

اعزم ما بدالي من مالي واكيد هيهنالوا

مش احسن من ناس زارعه نفسها وسطينا

وكل يوم زي الشحاتين يجوني ويقولوا غدينا وعشينا

اوصيكي ياحماتي ومعاكي المعدول جوزك

خليك تقيل زي السمن لما تروح لحد ومتدلقش علي بوزك

لما تروح مليان كبير وصغير يرحب بيك

ويقولوا خليك واحشنا وانت جنبينا

اههههههههههههههههههههههههههههههه

والله انا مستمتع جدا

وكل واحد عاوز يبين انه علي حق فيكم

يعطيكم العافيه
...........

مستمتع بجد يا ابو جمال
يعنى نكمل تقطيع فى فروة الرجل والمرأة
خلاص على بركة الله بس من غير زعل
الموضوع ترفيهى بحت

اه ضمنت صوت اخر معايا في صف الرجال
الا وهو العم الجليل اللي احنا منتظرينه من زمان
وطبعا الموضوع طريف وفكاهي فقط ليس الا وبدون زعل دا اكيد

طيب ياللا كمل
وخلينا كده لغاية ما نشوف اخرة المناظرة دى ايه

ماشي لحظات واقول اللي متقالش قبل كدا

بخت العدل مال واتعدل بخت الوحشين

الحلو ياناس ملهوش حظ وقع مع الوحشين

حظه منيل ومقندل ونعمل احنا ايه

قالوها اهل زمان بأمارة واحنا مسمعناش

عمر المخده ما تجمع بين اتنين حلوين

ربك من فوق سبع سماوات قالها فى كتابه
الطيبين للطيبات والخبث له اعتابه
وقالوا فى الامثال من لم الشكل على شكله
وكل واحد ضميره يتلقاه ويجنى ضميره وما جابه

لا مفيش زعل ولا حاجه

خدوا راحتكم

انا مليش في الهجاء اصلا يابو حسام
..............

ياعمنا انت استاذنا كلنا في كل حاجه
وهنكمل انا والزهرة بنت الاكابر
وهنقدم ما يتم التفكير فيه
علي قد حالنا يعني بين اخين
ونشوف النهايه هتودينا لفين

حلوه وجميله ومن بيت عالي ومناظر

دا الشكل اللي شفته قبل الخطوبه وانا ناظر

اتبدل الحال من بعد شهر العسل ياحبايب

من غلبي لقيت اكبر الكيمان كومي وزياده عليه نايب

بقي اهون عليا اني اتعمي ولا اكون ليها انا ناظر

بتلت ليه فى القول وتعيد
يوم الزفاف دا كان يوم بعيد
بس لسه فاكره ما فيه وما جرى به
قالوا الكدب دا تجمل وطلعت فيه انت فريد
سويت لى البحر طحينه وجدت بكل ما فى الايد
وتفكرك مرايتى امتى جبت لى فستان جديد

جميل السجال

اخوتى ادم .... وحواء

افضتم فى .... القول والهجاء

اكثرتم من ... الحروف

بما فيها الالف ... والباء

شئ مدهش .... ورب السماء

خالص مودتى وحبى

هى كده حكاية بنى ادم وحواء
لا تنتهى يا استاذ محمد
ومشاكلهم كما الملح فى الطعام
والسكر فى فنجان القهوة
ولا غنى لهو عن هى
بس احنا واخدينها فى قالب فكاهى شويه
شكرا استاذ محمد

اسعدتنا بقدومك الجميل
وكلماتك الشيقه
وهي كدا صراعات الحياه بين ادم وحواء
ولكن هنا مابين اخ واخت بيناقشوا الموضوع بطريقتهم الكوميديه طبعا
اسعدنا تشريفك يا استاذ محمد ابو العبادي

ناكره للخير انتي والله من يومك

تعبتيني وصرفت فلوسي علي هدومك

يوم للشوبنج ويوم كوافير ويوم مكياج

وياريته بفايده زي القرد لما بتصحي من نومك

مش عارفه ليه الراجل منكم دايما باصص بره
لو كان معاه ملكة جمال برضه عيته تزوغ بره
فى مره يا ولاد الحلال قلت افرحه شويه
غيرت لون شعرى وركبت للعيون عدسات
وعملت ميكب والطقم الجديد ياااهوو
وهو ملقوح عالقهوه زى ما كان معتاد
مشيت قدامه فى الشارع ومهديه الخطوات
لقيت عينيه هتطلع والسحنه مفروده
والبسمه على الشفايف من هنا للجيزه
وقال يا حلو هدى حرقت لى قليبى
يا اما نفسى تعطف وتسمح وتكون انت نصيبى
اوقف يا جميل هقول لك عالكلام المفيد
رايدك وطلبت ايدك وادفع مهور الوفات
بالذمة يا ناس قولولى الحق من غير مجاملات

لو فعلا في يوم كنت شفتك حلوه

عمر عيني ما تشوف غيرك لاجوه ولابره

ادلعك وعن الحب في قلبي انا احكيلك

يمكن تحسي وتخلي عندك دم حتي لو مره

ودن من طين وودن من عجين وماسكه منديلك

دموعك وقت طلباتك دموع تمساح

لو شفتيني مرة جاي للبيت وانا مرتاح

وليكي عندي طلب وفيه مصلحتك تفتحي الباب قبل ما اطلع المفتاح

تقولي جيت خلاص عندي يانور عيني وقلبي ارتاح

افرح انا وياكي واشعر بالحب وقلبي يكون مرتاح

تاخدي طلباتك وتخلص معايا مصلحتك تقولي يوم ماشفتك ماطلعله صباح

هي كدا الحريم اعتاب واحده تسعدك وواحده توريك العذاب علي الباب

ياما انت ظالم يالليل وورتني العذاب الوان ونفسي ارتاح انا مرة

يوم ما ربنا يخلصني كدا منك انا هكسر وراكي مش قله والله ليكونو 100 جره

شايفين ...شاهدين ...ناكر الجمايل والمعروف
فى العيشه دايما مفرط ومتهمهوش العشره
فيه واحده ست يا اخوانا تحب الخناقات
تحب تعيش فى مشاكل من غير اسباب
البيه عايزنى بصراحه اصرف عالبيت
ارجع من شغلى على المطبخ وكمان ترتيب
وشهريار راجع بدرى ونافش لى الريش
ومية تلكيكه فى تلكيكه قرف وخلاص

طبع الخبث والحيله لوحدكم يابنات حوا والله واخدينه

تكوني مطهقاه في عيشته ومبهدلاه ومطلعه عينه

يوم ما ياجي يفك عن نفسه او ينطق الغلبان كدا بكلمه

ويقول ياناس انا منها ياربي ومن افعالها خلاص تعبان

تلمي الجيران عليه وتقولي مظلومه ياخبيثه وتعكنني عليه وع اللي جايبينه

يا سيدى فهمنى بالراحه على المطلوب
مش ناقصه انا كتر وقاحه اعمل معروف
اشمعنى انت بتتودود مع صابر اخوك
تحكى له على كل حياتنا وبكل برود
وتشكى منى وتتشاكى ..كلامك مرفوض

لو كنت لقيتك في يوم هاديه ولكلامي كدا سامعه

مكنتش كلمت حد خالص ولا حد لعيوني شاف دمعه

اصل الادب يابنت الناس والله تلاقيه غالي

والحق علي الوالد سابك للوالده وفاكرها هتربي علي الغالي

وعاش حياته ونسي ان البنت زينتها في ادبها وتنتسب لبيت عالي

قالوها زمان لولا الادب مكانوش عملوا للعلوم جامعه

هى وصلت للدرجه دى يا اخرة صبرى
اسم الله يا اخويا على جنابك انت المتربى
انا اهلى ربونى لكن انا ليا حقوق
واللى مايشوفش عيوبك يتعمى دا اكيد
احكيلهم انا ولا تحكيلهم عا الواد محروس
فاكر مجايبك وعمايلك ..دايما مفقوس

» مناظرة فلسفية
» مناظرة بين الحيرة واليقين
» ياللى عايز تتزوج / مناظرة هو آند هى (يوتيوب)
» مخلوقات في مواقف طريفة
» قوافى طريفة على كل شكل ولووون