مساجلة شعرية فى الرباعيات

........... عدد المساهمات : 26070

ملينا حكم ومواعظ من غير ما ليها اثر
تعالى اسمع كلامى هتشوف فيه العبر
قول من غير افعال هو اللى سايدنا
يا ما نفسى اعرف حقايق واشم عنها خبر

رايحه علي فين ايامنا وفين تودينا

لاعمرها في يوم فرحتنا ولاكانت دوا لينا

قاعدين وساكتين وبحكم الاله راضيين

لاجانا منهم خبر ولاعرفوا مكان لينا

........... عدد المساهمات : 26070

الدنيا دايره ومش عارفه فين مركزها
تاخدك فى توهه وبرضه ما تعرف فين مطرحها
اركنها على جنب وامسك يقينك فى ايدك
لا هى لازمانا ولا حتى عايزين نشوف ملامحها

أنسي الزعل والهم ........ربك كبير شايف

ومسير الكلام يتلم ........وبكره مين عارف

يمكن يآتي الفرج........ ونفرح مع الفرحين

ولحين ماياجي اليوم......... بكلامنا نتلاطف
..............

........... عدد المساهمات : 26070

فجر الهدايه هل فاتح لى ......ابوابه
ربك كريم وحليم..... مايسيبش احبابه
والحزن ما لهوش دوام والسلوى دى علاجه
نور اليقين دا شعاع ما يسيبش ا اصحابه

الله الله الله

طيب
............

هغير انا القافيه وهروح اسرح....... واشوف البحر

لانه بيوحشني....... وامواجه لها في القلوب السحر

امد له ايدي.......... عساه الموج وشطآنه تطاوعني

يلاوعني ف ايامي ..........وسنيني افديها له نحر

........... عدد المساهمات : 26070

رحنا للبحر ومعاه قلنا وعيدنا
البحر اصله غويط وهدوءه يعجبنا
لكنه يقلب فى ثانيه يودينا ويجيبنا
قالوا عليه غدار وغضبه يتعبنا

صح كلامك ...صدق من قال ان من الشسعر لَحِكْمَةْ

.........................

انا عارف انه غويط ...... وهدوؤه اكيد ماكر

وعنه قالوا كتير... ولقولهم انا فاكـــــــــــــر

وعارف ملوهشي امان..... وغدار ودا طبعـــه

لكن ف وقت المحن.... بيكون له علاج ساحـر

........... عدد المساهمات : 26070

ريح الغضب لو هبت صعب نوقفه
البحر شايل بلاوى كان اولى نريحه
ونيجى نعتب عليه ونقول مالهوش امان
طيب مش كنا احسن بإيدينا نفرحه

هو الكلام معقول..... محدش يقول تاني

والكاظمين الغيظ .....لهم الجنان عالي

والعفو والمغفرة .....شيمتنا ف الايمان

ومن لام مع اللايمين ...الهي يكون فاني

جميل يا ابو جمال
نغير الاتجاه
ونسافر لغااااية سوريا

...

ينام العرب كتير....على قد ما يناموا
ويصحوا كما الاسود واهو شكلهم قاموا
بشار ولا كنت اسد ولا فى يوم هتكون
حاسب حسابك تقل هتغور مع اللى غاروا

الاُسْد في الغابات.......امشي ولا تخافي

انتي ملوك المكان .....واكلك لحم صافي

وبشارالاسد........ لا لحق اسد ولافار

وهيبقي نمره اتنين....... بعدك يا قذافي
.......

الله الله الله
انا بقي هكتفي بالمشاهده والاستمتاع بما يقال

مش هقدر اجاريكم هروح فين انا فيكم

من عذاب وحزن لبحر لقيته عنديكم

نوايا حلوه وكلام مغزول يالواو والنون

ولسوريا رحتوا بينا والاسد دبحتوه وسطيكم

مين قال انك ما تقدر............ تجارينا ف كلامنا

شايف كلامك زين........ ويفوق الوصف واحلامنا

كان الكلام ع البحر.............. جانا الاسد بَعْدِيِه

عاوزينه يرحل ويمشي .......ويسيب البلاد وديارنا

الظلم دا له نهاية والطاغى راحل اكيد
مين قال ان العداله يومها لسه بعيد
بشار هيدوق مرارة وحشيته وغباه
وسوريا هتروق وتصفى وتلبس توبها الجديد

الظلم دا له نهاية والطاغى راحل اكيد
مين قال ان الداله يومها لسه بعيد
بشار هيدوق مرارة وحشيته وغباه
وسوريا هتروق وتصفى وتلبس توبها الجديد

دورت علي كل الأسي والقهر لقيت السبب ظالم

يدمر ويخرب بيوت البلاد اذا كان من ظلم حاكم

وحواليه بطانة الســــوء وغير الكرسي مايهمه

ويخطب ف كل الناس ومتصـور انه صبح عالم

ملعون ابوها السلطه وحب الكراسي

اللي تخليني ادوس علي اهلي وناسي

ادمرهم واخرب بيوتهم وبجيشي وسلطاني

والله كله زايل بس للاخره المعدول اكيد ناسي

سكن قلبي.......وليه شوقه.......وله لَهْفَهْ

ولا هخبي.......هقول له يوم.....علي غَفْلَهْ

مش ذنبي......يدق القلب ..... علي سَهْوَهْ

ولا بيدي ......يسيل الدمع .......ولا سَهْلَهْ

هعد نجوم........في ليلي ........وعزّ الضهر

واقول محروم......من النظره......ملاني القهر

ولِلِّي يِلُوم.......هكون فارس...... واركب مُهْر

غِوِيِت العوم.......ف بحوره........بقالي دهـر

رضيت البعد.......مابيَدِّي........لكن بناجيه

وعِشْت السهد.......وفؤادي........يحن إليه

هوفي العهد.......وبيه هُوَّا.....هعيش لياليه

وزي الشهد.......هكون بلبل.......وغَرِّدْ ليه

هسيب القول........لو قال لي ........كفايه كلام

وامسك نول......واغزل بيه.........لنفسي لجام

كأني فلول........ومداري.........ف وسط زحام

وَخَلِّي القول...... يهمس لُهْ .........بأحلي غرام

الله الله علي الروقان والجمال

ما تاجي بينا علي الغالي نصلي

نعطر اللسان بذكره والكلام يكون متحلي

اصل كتر الكلام والعتاب واللوم مش هيفيد

ارمي ورا ضهرك وانس اللي فات وعنه ياغالي ولي

بقول يا نية الشوم دايره شمال كيداني
انا اقوم من النوم ريشه القلب كيداني
لما اضعضع الحال لقيت الناس كيداني
كلمة خصيمي كضرب السيف كيداني

ياعاتب عليا ........ كانت ايام واهي راحت

بس الفكر احيانا........شم الريحه لو فاحت

افضل صلاه ع النبي .............وآل البيت

وبذكر الحبيب....... كل ريحة الورود فاحت
.....

تفكرني بكلامك اجمل ايام وعهود
ايام مكان الادب بين الرجال موجود
قالوها زمان كلمه حكمة وقاعده بتلاللي
اللي يشرب من زمزم ليها اكيد هيعود

دوا الامراض ف التقوي ......وف الايمان

وكل كلام يحتاج له ..........اكيد برهان

وكل مصيبه لو حلت ..........وراها ذنب

مش قولي.........كلام قاله الحكيم لقمان

نقول القول وتلاقينا بنفرح بيه

كلام حلو موزون ومشينا عليه

اصل الايمان شيئ في القلب ومكتوب

لكن الطبع غلاب ونعمل ايه فيه

هقول القول من تاني .......واصلي عليه

نبينا الزين ويا بخته .....اللي يشفع فيه

ويسقيه شربه من يده..... ف يوم الحشر

تكون له دواه ...ومن حر الضمأ ..ترويه

هصيغ الكلام وليه انا هكون واعي

نفسي اروح الحجاز بس بفلوسي وبدراعي

ما ينفع والله اروح علي حد هناك بجمايل

زيارة الحبيب النبي ليها اصولا وفروض بيها انا واعي

يا رايح الحج ما تنسي.......السبحه والمصلاه

تطوف البيت وتصلي ...وشكل الكعبه ما احلاه

اقول حاجه ................و خليها بعقلك دوم

لو الايمان دخل قلبك.......شكل الكعبه ما تنساه

هقول ايه ومش قادر انا في المدح اجاريك

ليك اسلوبك الجميل واروح فين انا فيك

بتقدر تغزل من الكلام اشعار وتفنن

وتمدح في النبي الزين بجميل معانيك

ما تجاجي نغير الرتم شويه يا كبير ؟
ونقول
طبيب معايا الم عاد له زمن لم طاب
طمني ياطبيب انا صغير ولسه شباب
قالي اسمع هقولك من سؤال لجواب
استعمل الصبر اصلي الصبر ليه طلاب

اههههههههههههه

طيب ثواني بس
..

براحتك يا كبير

بيقولك ايه ياعمي في الامثال والحكم بتاع زمان

كل اللي بينا انتهي والمستخبي بان

وعرفت انه خسيس الاصل واطي جبان

انا كنت فاكره رفيق عمري وراجل حر

اتاريه عديم الرجوله وحكماه المرة يا غلبان

بلاني العشق وبناره.............. انا حسيت

ومن غلبه د نساني ..........السراج والزيت

وميت دكان باعوا لي الصبر ..........ما كفوا

طب اعمل ايه ........نسيت حتي طريق البيت

عفوا
...........

تقولي كلام زين عن الحب واسرح فيه

العشق له ناسه وفي نني عيونها تداريه

تخاف علي الحبيب الغالي لايتبهدل

تقول القول وتمضغ للكلام معانيه

ناس تشوفها تقول.................... انها حاميه

وناس بالعكس دايما................... تكون هاديه

شورة المره خايبه ......................ولو صادت

خراب شهرين لو صادت ......وخراب العمر ف التانيه

هبدي الكلام معاك واتم انا في الدور

اصل الحريم اعتاب وكل واحد له دور

دورك في الربايه تعودها من البدايه عليه

ولوسمعت شورتها والله لم تشوف النور

اقول ولا استناك

عشان منخربطش القوافي؟؟

ههههههههههه
لا قول يا عمنا

ريس انت ........وف كل الكلام قوال

ولك وقفات..... وف كل الدروب جوال

شاورهم ايوه....... بس الصح خالفهم

ولو ونِّيت ......يحاوطونك بألف سؤال

لا والله اصلهم بيفكروني بالفقر القديم واحواله

الفقري لما سعد راح جابله حصان بلجامه وعداله

وجاب جوز كرابيج عاوز يحكم فيه بعداله فاكر الدنيا طابت ليه

فقره القديم سمع بيه كان في اخر البلد ف الشرق عداله

اههههههههههههههههههههههههههههههههه

حلوه
.................

طيب طالما جات سيرة الفقر

اعاذنا الله واياكم منه

لو كان الفقر رجلا لقتلته كما قال الامام علي رضي الله عنه وارضاه
.............

أمانه يافقر مع الغلبان.................. خد بالك

لا ف يوم ناسيني يافقر ولا يوم غبت ......عن بالك

قام الفقر ع البين ....................ضربه بكفين

ماباقي غير ضرسين ..............يافقر خد بالك

هههههههههههههههه
طيب خد دي عندك

البركه شحت وقلب الخلق بقي جاحد

حتي الامانه اختفت والصاحب صبح جاحد

وفضيحة العرض في الشارع بقت موضه

ايامه سودا من قابل رب كريم يوم العرض وهو جاحد

دنيا وفيها ناس على كل لون

عايش فيها كما المجـــنون

اعمى يجر اعمى للضلمة

ويقوله هانت او اكيد هتهون

نامت على كتفى ف عنيها نظره شر

نعومه الملمس بيخفى خلفه الغدر

خايف على نفسى لتفوق تخربشنى

قومى ياقطتى أصل ......الحب مش بالجبر

ومين قالك بس يا صاحبى تعاشر قطط

القطط اصلها الغدر واللى عاشرها اتنقط

اصل الطبع غلاب واللى عاشرها قبلك اشترط

لاجل العشرة تدوم اضحك عليها بزين العرط

والعرط :هو الكلام الذي يخرج من الشفايف ويكون هدفه اللعب بالعقل

قاعد ووسط الخلق انا مبسوط ومتعافي

فرحان وبضحك واقول ربنا للعباد شافي

خيرك ياربي عليا كتير والنعمه بيها انا حاسس

وحشني كلامك متقول حاجه معانا يا ابوعبد الشافي

-----------------------------------
مع حفظ الالقاب والمقامات اكيد ومكانتك محفوظه يا كبيرنا وعمنا الغالي

اعتذر بشده والله

من زمان ما مريت من هنا
................

طيب
..............

ياشايف كلام الناس ..........إصحي للكلام معناه(1)

واوزن كلامهم زين ............لـ تصيبك المعناه(2)

الكاس للصاحي ............ولكل من جلس معناه(3)

وإن تاهت فراستك يوم ......هتلاقي الحلول معناه(4)
.........................

1= معناه..اي تأويله
2=المعاناه اي التعب
3=معنا اي في صحبتنا
4=معانا اي لدينا

بقول الاه ومن قلبي طالعه بتوجعني

يسمعها خلي وبيا يوم هو لم يشعر

كأن الاه سحابة طيف وايه يعني

كلامه كضرب السيف والله بيوجعني

يا سيدى سيبك من الناس وعمايلهم
قالوا خيرا تعمل شرا تلقى خدت ايه من مجايبهم
يا عزله كيفك وحشتنى اراضيكِ
لا الناس تشوفنى ولا اشوف انا مساوئهم

مين يقدر علي البلا يصبر ويتحمل

دا لازم يكون عنده صبر ويكمل

ودي صفات في الدنيا قل تواجدها

ربك معين وبندعي يارب كمان سلم

مالنا ومالها الدنيا دى بيعه خسرانه
تغزل لى توب الامل وتسيبنى حيرانه
وتشيل وتحط فى من وين ولوين تاخدنى
اعملى ما بدا لك بقى بجملتها دىخساره

مع الايام ..تمر علينا ....ساعات حلوه ..وساعات صعبه

وكله تمام ......حمدنا الله ......علي الحلوه...وع المره

يجينا كلام......يوترنا ........يعصبنا .........كده بشره

وكل سهام .......من الاحقاد........مردوده ......وبالذره

انا مشيت علي قافية حماده ..قبل المساهمه الاخيره

هويت الغالي من صغري...... وباعني رخيص

كتمت انفاسي بالقوه وقليبي..... جعلته حبيس

سنين بتمرقدامنا سبحانه ......ما يرضي الظلم

وتحت الحيط قاعد ينعي...... ما اصله خسيس

» هاشــم الرفاعى ومختارات شعرية
» فكاهة شعرية
» مختارات شعرية
» الشاعرة نهى محمد فى امسية شعرية بقصر ثقافة دشنا
» مساجلة عن تدنى مستوى الشعر بين اجمل الشعراء \ محمود وحيد \ حلمى قاسم \ عبد الفتاح عبد الشافى